انت فين ؟؟؟؟................ و جاى امتى !!!!!
تلك الاسئلة اللعينه التى تلوكها السنه بنات حواء و خصوصا الزوجات منهم و ايضا الامهات ......
مش عارف ليه ؟؟ لدرجه ان هذة الاسئلة قد تحتل مقدمات اى مكالمه هاتفية بين الرجل و زوحته ... بل قد تكون قبل عبارات التحية زى السلام عليكم او صباح الخير او سعيدة او عامل ايه يا مدهول على عينك !!!!!!
مش عارف اهمية ظرف الزمان و ظرف المكان عندهم ... كانهم تحولوا الى اجهزة gprs هدفها الاول تحديد الموقع و الجهة بسكل جاسوسى استخبارى مريب ..... او انهم اصبحوا خبراء فى سلاح الاشارة .
اول ما اوصل شغلى صباحا .... اتصل بالبيت من تليفون الشغل علشان اطمن عليهم ... ومع ان جهه عملى معروفه للناس كلها و ايضا مواعيد عملى يعرفها القاصى و الداني ... تبادرنى بالسئوال الازلى التقليدى و تقولى : ايوة انت فيين ؟؟ و جااااااااااي امتى ؟؟ ...
انا : يا سيادة الكلونيل ... مهو رقم التليفون بتاع الشغل طالع عندك على الشاشه !!!! و كمان مواعيد شغلى معروفه اللهم الا من تاخير لا يتجاوز الربع ساعه حسب ظروف الطريق ....
شويه شويه ... ممكن تسالنى عن الاحداثيات بتاعت المكان اللى انا فيه ؟؟ شيىء غريب ......
مع انى ماشى بشكل تقليدى جدا و بيتوتى جدا ... من شغلى لبيتى و العكس ... يعنى لو رسمت طريق بالطباشير من اول باب الشقه لباب الشركه ... هتلاقيتى ماشى علية بالمللى ...... و لما اطلع من المطب ده .... تقوم رزعانى سؤال انأح من كده ظاهرة الشفقه و باطنه العذاب ... الا و هو ... تاكل ايييييييييييييه انهارده ؟؟؟
انا : اى حاجه يا ستى ... اللى تعملية ؟؟
هى : لا ... بس انت نفسك فى ايه ؟؟ علشان اخلص .. اقولها .. فراخ و مكرونه ....
ترد هى و تفقعلى مراراتى تانى : لا خلاص انا طلعت كيس لحمه الصبح .....
انا ... و لما سعادتك اخدتى القرار بتسألينى ليه .... ايه الهدف ؟؟؟ هى القاء الاسئله متعه يعنى ؟؟؟
كنت فى اجتماع الصبح مع صاحب الشركه ..... و فجأة جالى استدعاء عائلى عبر الموجه القصيره للهاتف الخلوى ... لاقيت عبارة (home ) هتنط من شاشه المحمول ترزع فى وشى فأستذنت و خرجت و نفس السؤال لكن بتحريف بسيط ... فين انت ؟؟؟ قمت بقى انا كمان مغير الاجابة علشان محسش بالملل و قولت فى اجتماع و سلام تفاديا للسئوال التانى .
صاحب الشركه ندهلى و قالى ... عارف يا حس ؟؟؟ انا من عشرين سنه كنت موظف كحيان و برجع الساعه تلاته العصر ... و فى مرة قولت للمدام عندى ... انتى مش عاوزة تصيفى فى مرينا و تسكنى فى مصر الجديدة و تلبسى من مصر الجديدة و تدخلى عيالك مدارس لغات ؟؟؟ طبعا هى ردت علية و قالت طبعا ...
قام قايلها طيب ؟؟ انا مستعد بس بشرط ... سؤالين مش عاو اسمعهم خالص منك .... لا تقوليلى انت فين ؟؟؟ ولا جاى امتى ؟؟؟؟
هروح اجرب انهارده ... وابقوا اتصلوا اطمنوا علية .....