السلام عليكم يا اهالي المنتدى الكرام



طبعا كل الللي قرا عنوان الموضوع داخل يشوف ايه اللي دونزي بتقوله دا ما كانت بعقلها البنت ايه اللي جرالها و معقول اخلاقها باظت للدرجة دي و حتى لو اخلاقها باظت مايصحش تعمل موضوع كدا يعني في المنتدى و ... و.... و.......

بسسسسسسسسس ستوب

اوعوا تفهموني غلط دا انا غلباااااااااااااان


الموضوع و ما فيه يا حضراااااات السادة المحترمييييييييين ان انا كنت عند اختي من كام و كان عندها واحدة صاحبتها و بنتها اللي في كي جي 2 يوم و كنا بنتفرج على التليفيزيون و كان في البرنامج السقيل دا اللي اسمو الستات مايعرفوش يكدبوا و كانو بيتكلموا عن العنف في الاسرة المصرية بلا بلا بلا

فا الست الضيفة كانت بتقول تقريبا انه غلط لما الطفل يجي يقول لمامته ان فلان زميلي في المدرسة ضربني فا مامته تقولوا انت كمان اضربوا فا اختي قالت ايوة احنا ماما كانت بتقولنا كدا و احنا صغيرين قلتلها طيب انتي بتقولي ايه لولادك دلوقتي قالت بقولهم يشتكوا للميس و هي تتصرف فا صاحبتها بصيت لبنتها كدا و قالتها ايوة انا كمان بقول ل " رنا " بنتها اللي في كي جي 2 لما حد يضربك تقوللي للميس بتاعتك و هي تتصرف صح يا نونة

نونة : صح يا مامي

و بعدين رنا سكتت دقيقتين كدا و بعدين قامت منطلقة و قايلة : طيب لما زميلي يبوسني كتير اعمل اييييه يا مامييييييييييي ؟؟

مامتها تنحت كدا و كلنا فتحنا بقنا و بصينا للبنت نظرات يشوبها الشك و الريبة و الاذبهلال و الاستنكار و كل الحاجات الغريبة دي

و مامتها قالتها اييييييييييييييييه زميلك ايه اللي بيبوسك كتير دا اسمو ايه و انتي ساكتالو ليه و بيعمل كدا ازاي و ... و.... و....... و كانت هاتاكل البنت لولا ان احنا قعدنا نهديها و نقولها يا ستي دول اطفال و اصبري لما تفهمي و بتاع

قلنالها اصبري بس كدا و روحي المدرسة و شوفي ايه الموضوع و قعدنا نقول اكيد اهلو بيسيبوا يتفرج على التلفيزيون على حاجات ماينفعش يشوفها او افلام اجنبي او بيسيبوا يلعب على النت فا بيشوف اي حاجة غلط و اكيد اهلو دول مهملين و كزا و كزا وكزا

المهم بسأل اختي انهاردة ايه اخبار رنا اللي زميلها بيبوسها كتيييييييير ؟؟ قالتلي اه يا ستي ماماتها راحت المدرسة و قالتلهم على الموضوع و هما كلموا مامة الولد و جابوها و فهموا منها الموضوع من طأ طأ لسلاما عليكما و اتضح الااااااااااتي

الولد الدونجوان اتضح انه مش دونجوان ولا حاجة و انه الولد جاتلو اخت بيبي صغيرة لسة مولودة من تلات اسابيع و هوا كل ما يجي يقرب منها او عاوز يبوسها مامتوا و باباه يقولوا لأ بلاش تبوسها كتير عشان هي كدا ممكن يتنقلها اي امراض عشان هي بنوتة صغنونة و ضعيفة و ماينفعش انت تحضنها و تبوسها كتير

فالولد يا حبيبي راح المدرسة يبوس في كللللللللللللللللل زميلاتوا البنات اللي في الكلاس و روح يقول لمامتوا انا بوست زمايلي فلانة و فلانة و فلانة و محصلهمش حاجة و مش عيانين ممكن ابوس النونة بقى

بس بقى و فهموا الولد طبعا ان كدا غلط و الموقف عدى و الولد باس اخته و ساب البنات اللي في الكلاس في حالهم و طلعنا ظالمين الولد و ظالمين اهلو و الولد براءة الاطفال في عينيه

و دي كانت مغامرة رنا و يوسف في كلاس ميكي و عنوان الفيلم ان شاء الله " قبلات في كي جي 2"

محدثتكم من كي جي 2 كلاس ميكي
دونزي هانم