ادمن صفحة رينو حيشلنى

ادمن رينو على صفحة فيس زفت حيشلنى ومرارتى حتتفقع منه وعايز اشتكيه بجد
معظم ردودى بيمسحها او بيعملها hide علشان انا مش بحب الاشتغالات
يعنى مثلا واحد داخل يشتكى من موضوع الحرارة من الدواسات
البيه يرد عليه ويقوله لم ترد لنا مثل هذه المشكلة وارجو التوجه الى اقرب فرع للكشف على العربية
ولما اقوله دى مشكلة معروفة تانى يوم مالقيش ال post
...............
واحد تانى بيشتكى من زنة دواسة البنزين
يرد عليه نفس الرد ويقوله دى حاجة غريبة ولم ترد لنا هذه الخزعبلات (المشكلة) من قبل
وارجو التوجه للبتجان المقلى علشان يكشفوا على العربية ويحلوا المشكلة
وطبعا انا مرارتى حتتفقع ومش قادر اسكت
علشان الاستاذ اللى بيسأل حيضرب مشوار طويل عريض لحد التوكيل وفالاخر مش حيعملولوا حاجة
يعنى من الاخر شغل تسجيد و بيبعت العميل ....... انا مش طالب منه حاجة غير الشفافية وبس
يعنى حرارة الدواسة يقول انها مش عيب صناعة لكن لازم يعترف انها موجودة ودة راجع لتصميم العربية وبيركبلها عازل فى الصيانة
دواسة البنزين دى حاجة موجودة ومعروفة لو ليها حل يقول ... مالهاش يقول بردو هى حاجة مش مؤثرة اصلا
بس فيه ناس رجلها حساسة شوية وبتحس بيها ... بس يقول انها حاجة طبيعية مش يقول للراجل اطلع على التوكيل
علشان يقولوا دى طبيعى ......... ولما اقوله دى حاجة معروفة وموجودة ومشكلة عامة ولا يبدى اى اهتمام
..............................
تيجى بقى لواحد تانى عايز يشترى رينو تلاقى الاهتمام والمعلومات كلها متوفرة وحاجة اخر دلع لكن لو مشكلة او استفسار عن قطعة غيار كله كلام تسجيد و اى كلام واتصل ب 16202
...............................
يعنى لو هم عاملين الصفحة دى علشان البيع والشراء والاستفسار عن تجهيزات العربية فقط يقولوا ومايتعبوش قلبنا معاهم
لكن لو عاملين الصفحة علشان كل الاستفسارات يبقى لازم يكون ملم على الاقل بمشاكل العربية الطبيعية اللى مالهاش حلول
على الاقل حتى العميل ما يضربش المشوار على الفاضى ويوفر عليه حرقة الدم والمشوار

هههههههههههه
معلش ياباشا هو التوكبل دايما كده وردوده غريبة واسعارهم اغرب اخر مرة اتصلت بيهم كنت بسأل على علبة البيئة لقيته بيقولى 10430 من غير ضريبة
قلت ممكن انا سمعت غلط او الراجل فهمنى غلط كلمتهم تانى وسالت عليها باسمها الدارج بيه جوة التوكيل لاقيته بيقولى يابيه مش انت اتصلت وقلتلك يعنى حتى مايتعبش نفسه برد شيك او يتأكدلك من السعر حاجة ترفع الضغط ومن ساعتها مش هاسأل فى التوكيل تانى وربنا يخلى عادل زوايا

انا معاك في كل اللي بتقوله بس مش معنى كده اننا نسيب لهم الصفحه لان العيار اللي ما يصبش يدوش
واحنا وراهم علشان نلاقي حقوقنا

وانا شايف برده ان فيه استجابات بتتم لبعض الناس اللي عندهم مشاكل في عربياتهم


الرساله اللي عاوز كلنا ناخدها ان لما يكون فيه مشكله عند واحد الناس كلها تسيحلهم على الصفحه علشان ياخد حقه وده نظام تكافلي بينا يعني زميلي النهارده في مشكله وانا بساعده بكره هكون في مشكله وهو يساعدني
والمساعده هنا عن طريق الكتابه

ادمن الصفحه مبرمج على كلام محدد فقط لا غير مش هيناقش معاك اىمشكله ولا حلها اصلا

الكلام المحدد المبرمج عليه
" حضرتك تشرفنا فى اى فرع من توكيلاتنا وهنفحص لك العربيه ........... مركز رينو فى خدمتك "

بس ادى الكلام يعنى انت مستنى منه ايه ؟

على العموم لا تزعل نفسك ............ التوكيلات كلها معروف عنها الحاجات دى

اقتباس:

---

المشاركة الأصلية كتبت بواسطة lol86

هههههههههههه
معلش ياباشا هو التوكبل دايما كده وردوده غريبة واسعارهم اغرب اخر مرة اتصلت بيهم كنت بسأل على علبة البيئة لقيته بيقولى 10430 من غير ضريبة
قلت ممكن انا سمعت غلط او الراجل فهمنى غلط كلمتهم تانى وسالت عليها باسمها الدارج بيه جوة التوكيل لاقيته بيقولى يابيه مش انت اتصلت وقلتلك يعنى حتى مايتعبش نفسه برد شيك او يتأكدلك من السعر حاجة ترفع الضغط ومن ساعتها مش هاسأل فى التوكيل تانى وربنا يخلى عادل زوايا

---

قولى بقى سعادتك هو فعلا عادل زوايا متميز فى الرينو
ارجوك وضح مثلا اسعاره اقل من التوكيل
كفائته الفنيه...ارجوا الرد عشان كلنا نستفيد

هههههههههههههههههههههههه

اسلوبك رائع فى التوبيك

انا برضه حاسس بنفس الاحساس بس مش عايز اعمل موضوع فى المنتدى علشان الهجوم التتارى اللى حيحصل عليا :argue2:

كل ما اساله عن اى سؤال فى موضوع صيانات العربيه الاوتو او سعر قطع الغيار زى الفيتس الاقى الباشا ولا كأنه شايف البوست

بصوا يا جماعة مافيش حد فينا بيشكك فى كفاءة اللوجان بس انا كل اللى عايزه منه حاجتين
اولا -
لما يكون عربية فيها حاجة طبيعية ومعروفة عن اللوجان يقول للى بيسال انها كدة طبيعى
لكن يقوله روح التوكيل .. والراجل يروح التوكيل يدخل العربية الورشة وياخد العربية ويرجع يلاقى نفس الشيئ ولا اتصلح ولا حاجة (علشان طبيعى)
يقوم يدخل تانى الصفحة ويشتكى ... ويدخل الادمن يقوله لا حول ولا قوة الا ب الله حيتصل بيك واحد من خدمة العملاء
.. يتصلوا بيه ويروح الصيانة ويطلع زى ما هى وبعد كدة حيفهم لوحده
طيب ما من الاول ليه تشحططوا الراجل رايح جاى رايح جاى على حاجة تافهة لو ريحتوه حيتعايش معاها ومش حيحس بيها بعد كدة اصلا (حيتعود)

ثانيا -
لو مسح الكومنت بتاعى حعمله مجنون علفيس بوك ولو هو رينو مصر حعمله جروب رينو اسكندرية وحولعله فى الدنيا
ولو دخل الجروب وكتب بوست حمسحوله هههههههههههههههه
.............................................
يا جماعة احنا ربنا رزقنا بالمنتدى علشان نتواصل عليه ونتبادل خبرات بعض وعندنا فى المنتدى بدل اللوجان 500 لوجان يعنى عارفين اللى فيها
لكن فى ناس كتير مش بيتواصلوا على منتديات ولا جروبات ولا حاجة وبيدخل يسال فى الصفحة والراجل بيمشى ورا الادمن بدون اى وعى .. روح التوكيل حاضر .. ولع فى العربية حاضر .. بيعها وهات غيرها حاااضر
الناس دى بتصعب عليا لان دول عملاء زى بالظبط وانا مش بحب اللى يشتغل الناس ولا اللى يشتغلنى

اقتباس:

---

المشاركة الأصلية كتبت بواسطة blackhorse123

ادمن الصفحه مبرمج على كلام محدد فقط لا غير مش هيناقش معاك اىمشكله ولا حلها اصلا

الكلام المحدد المبرمج عليه
" حضرتك تشرفنا فى اى فرع من توكيلاتنا وهنفحص لك العربيه ........... مركز رينو فى خدمتك "

بس ادى الكلام يعنى انت مستنى منه ايه ؟

على العموم لا تزعل نفسك ............ التوكيلات كلها معروف عنها الحاجات دى

---

ما ينفعش يبقى متبرمج يا بلاك هورس لان دة واحد بيمثل كيان وهو المفروض لما اسأله عن حاجة يروح يسال عليها مهندس ويرد عليا رد قاطع الا بقى لو هو قاعد فى نت كافيه واحنا مانعرفش

ههههههههههههههههههههههههه انا عرفت الادمن الاروبة دة بيعمل ايه
لما بيتكتب بوست مش على هواة يقوم خافى البوست يعدى فترة من الوقت يكون البوست بقى قديم واترحل فى اخر الصفحة
ويقوم مرجعه تانى ويعمل نفسه مش شايفه وفى نفس الوقت الناس ماتشوفش البوست ههههههههههه
ولسة واحد بيشتكى من الموضوع راح مرجعله البوست تانى علشان حيتكشف هههههه

كانوا مرة بيتكلموا عن غسيل موتور العربية بجاز .. وده طبعاً مش مظبوط ..
فقلت له بس مركز الخدمة بتاعكم واللى انتوا معتمدينه فى المنصورة اللى اسمه العدوى بيغسل لى الموتور فى الصيانات بجاز حتى من غير ما أطلب.

توقعت انه يقول هنراجع مركز الخدمة أو حتى يتحرج أو أى حاجة، لكنى فوجئت انه قال لى ماتخليهومش يغسلوا الموتور بجاز ، وراجع المشاركة السابقة.

كويس يا زيزو انه رد عليك دة كان ممكن يقولك محروق مركز العدوى بجاز هههههههههه

يا جماعه مش أنا معايا رينو بس أحب أقولكم إن أدمن صفحة رينو أساسا منعنى من التعليق نهائى بسبب مهاجمتى ليهم فى موضوع أسعار قطع الغياروكانت ملحمه
بجد أسواء أدمن شفته فى حياتى

اللي مايعرفك يجهلك يا عم رينجو معلش - علي فكرة يا جماعة رينجو من اول الناس اللي اقنعوني وردوا علي في استفساري عن اللوجان ودا كان في اوائل سنة 2010 والحمد لله ربنا اكرمني باللوجان من 6 2010 صحيح ان الحاجات اللي انت زكرتها في العربية موجوده بس متهيالي ان الادمن من كتر ما سمع عن المشاكل دي زهق من الرد عليها وعشان كده بيرح دماغة وبوجه الناس انها تروح التوكيل وخلي بالك ان فيه ناس بجد بيخافوا يهوبوا ناحية التوكيل عشان ممكن يكونوا خايفين من التكاليف او المعاملة وهو ممكن يكون بيحاول يشجع الناس انها تتعامل مع التوكيل مباشرة وماتقلقلش من التعامل في التوكيل

ماشي بس انت عندك حق في انة المفروض مايشيلش اي بوست مهما كان فيه من كلام سواء سلبي او ايجابي لان ممكن لو هو مش قادر يرد ممكن يرد عليه واحد من الاعضاء والله ممكن نعرض علية الموضوع دا جايز يقتنع

هو مين عادل زوايا ده يا جماعه ...قطع غيار يعنى و ﻻ تصليح و يا ريت مكانه فين بالظبط .....علشان انا لسه جديد فى موضوع اللوجان :)