الموضوع: بمناسبة الحمى القلاعية عايزين محل سمك كويس

المشاركة الأصلية كتبت بواسطة egyptiandiver

في ميت عقبة محل أسماك وادي النيل و ليه فرع في الشيخ زايد. جودة محترمة و أسعار غير مبالغ فيها

+1

المشاركة الأصلية كتبت بواسطة أبو إياد

طيب لما تنزل السويس جرب واشترى شوخرم وجربها ومع الصرمباق جرب البقلويظ
لا اسعار الجمبرى 60 و 80 و 100

حصل وجربت الشوخرم بس البقلويظ معجبنيش اوى عشان مكانش ماسك نفسه. :)

المشاركة الأصلية كتبت بواسطة أبو إياد

الجندوفلى - ام الخلول - البكاليدس - السريديا - الصرمباق

كل دول من القواقع البحرية ذات الاصداف تكسر الصدفة الخارجيه ثم ناخذ الجزء اللحمى الداخلى

وفيه ناس بتطلع اللحم وتسيبه فى الشمس مع شوية ملح وتاكله وبراحتك يا ناشف وتندغه(بس خليه لما تتجوز)هههه او طرى فى شوربة.

المشاركة الأصلية كتبت بواسطة hussein

معلش مش عارف اقتبس الردود بتاعتكو مره واحده بس واضح كده انى لازم اكون خبير علشان ماتخمش :(((

كلنا اتعملنا فى الاول وعرفنا ننقى ازاى بعد شوية.

المشاركة الأصلية كتبت بواسطة hussein

فى انواع فيها غش بالذات الفيليه
وممكن يكون سمك مش صابح او مستورد
انا بتكلم انى عايز سمك نىء مش مستوى

الفيليه ممكن تشتري سمكة بياض او ممكن قشر بياض( بس مش اوى يعنى) وتخلى الراجل يقطعوا فيليه اودامك. وتشترى النى من العبور او تعالى معايا السويس.

المشاركة الأصلية كتبت بواسطة SYD

اول تجربة وكانت سيئة جدا
اشتريت بوري مشوي ولما روحت اكتشفت انه شواها وهي مقفولة ومافتحش بطنها ولا نظفها
،

يا راجل يا طيب ده فيه ناس مبتحبش تفتح البورى لو مشوى بالذات عشان متضيعش البطارخ(السمنة زى ما معظم التجار بيسموها).

المشاركة الأصلية كتبت بواسطة أبو إياد

خلينا فى الانواع المتداوله وموجوده بسهوله
بالنسبه للسمك لازم تكون ريحته مقبوله وعنيه بتلمع ولحمته جامده شويه ولونها فيها احمرار وبلاش الحجم الكبير لان اغلبه بيكون مزارع

البلطى ( مقلى مشوى )
البورى والماكريل ( مقلى مشوى سنجارى )
الجمبرى ( مشوى مسلوق مقلى طاجن )
السبيط ( مقلى مسلوق )
كابوريا استاكوزا ( مشوى مقلى )


المشوى نوعين ( رده او زيت وليمون وده بيكون خفيف عن الرده )
المقلى معروف
السنجارى ( بورى او ماكريل ) تتفتح السمكه زى الساندوتش وتتنظف ويتحط عليها خلطه فلفل طماطم بصل جزر وعصير ليمون وبهارات ويتعمل فى الفرن بالظبط زى البيتزا
الصياديه ( البورى ) ممكن تقليها الاول او ماتقليهاش وندهن الصنيه بالزيت وبعد كده حلقات طماطم وبصل وفلفل وبعد كده السمك بدون اى شوك وعليه عصير طماطم وارميها فى الفرن
الصياديه ( الماكريل ) نفس البورى بس لازم تكون السمكه نيه مش مقليه ومن غير زيت نهائى

الجمبرى الطاجن او المشوى بيتعمل من غير ما يتقشر

السى فود جمبرى وسبيط وجاندوفلى وكابوريا وسمك مكعبات
الترتيب علشان فرق التسويه السبيط بعيه الجمبرى والجاندوفلى والكابوريا واخر حاجه السمك
وتجهز شويه دقيق بالزيت على النار ويضافوا للشوربه وعلى نار هاديه بقا مع توابل خفيفه وملح

ما تيجى نطلع طلعة يا ابو اياد. :) وعلى فكرة انا ابو اياد برضه.

المشاركة الأصلية كتبت بواسطة أبو إياد

هايحصل باذن الله بس خليها فى شهر 4 ونجمع ناس كتير من الاعضاء لو كده هانطلع ع السخنه واخر النهار نتغدى فى السويس ونرجع

كده انا وانت وشريف شيكو ابو اياد ربنا يزيد

اللهم امين.ربنا يسهل الامور بامره.

ناوين على صيد فى السخنة ولا ايه؟