بالنسبه لتأخير الدواره والبرجله في الثواني الاولى للتشغيل وريحه البنزين الني ده اعراض تسييل رشاشات
وزمن فتح الرشاشات بيبان بسهوله على الاسكانر
ولو عايز تتاكد (بطريقة بدائيه شويه) اذا كانت رشاشات فعلا او لا , وانت بتدور العربيه والدواره متأخره دوس سنه بنزين وثبت رجلك , لو دارت اسرع من المعتاد يبقا الرشاشات بتسييل فعلا ومحتاجه تتغير
وبالنسبه للار بي ام , دي محتاجه كهربائي يبص عليها
بس لي طلب صغير
اتاكد ان لمبه التشيك شغاله بوظيفتها الحقيقيه , يعني مش مربوطه على لمبة الزيت مثلا
وعشان تشوف لمبه التشيك شغاله تمام ولا لا , ممكن تخلي العربيه دايره وتفصل حساس الهوا الموجود على الخرطوم التخين اللي جاي من فلتر الهوا رايح على المنافولد
لو لمبه التشيك نورت يبقا كده الدنيا تمام , غير كده تروح لكهربائي
انا بقولك اتأكد ان اللمبه شغاله عشان احيانا الكهربائي لما بيلاقي اللمبه منوره على طول ومش عارف يطفيها فـ بيربط اللمبه على اي لمبه تانيه في التابلوه عشان تنور مع الدواره وتفصل بمجرد التشغيل , وفي الغالب بيربطها على لمبه الزيت
المفضلات