الموضوع: سندويتشين بيض بالفلفل الاسود ....... بتوع ابله ماجده ....

احيانا تنتابنى لحظات لأرى نفسى اعود و اغرق فى ذكريات الطفوله عندما كنت فى المرحله الابتدائية .....و خصوصا الذكريات الاليمه المرتبطه بالاكل .... و البيض تحديدا ..... و سبب اثارة تلك الحادثه فى حياتى و التى احاول دائما ان اضعها فى منطقه اللاشعور عندى هو سؤال برىء من عامل البوفيه عندى لما جه و قاللى : تفطر بيض يا استاذ حسام ؟
مرة ...فى يوم سبت و انا فى رابعه ابتدائى كانت عندنا مدرسه متدربة كانت واخده الفصل بتاعنا و فاكر شكلها لحد دلوقتى
دايما كانت معاها عصايا جريدة نخل ..... تخش الفصل العيال تتكهرب و محدش يجرؤ حتى يطلب يروح التواليت ..!!!
طبعا علشان انا كنت شاطر و بجاوب فمكنتش بخاف منها و كان الدسك بتاعى اول دسك ناحية شباك الفصل اللى بيطل على الحوش .... المهم فى الوقت ده كانت و الدتى بتحطلى السندوتشات بتاعى فى الشنطه و مببقاش عارف نوع الاكل او عددة الا لما اطلعه من الشنطه .... كان عندنا فى اول حصه العاب ... فضلت اجرى فى الحوش و جعت و طلعت السندوتشات و كانت بيض مسلوق عادي فأكلته و طلعت على الفصل ....
دق جرس الفسحه و كان كل يوم فى بنت بتقعد فى الفصل تخلى بالها منه و من شنط العيال ... جميل .....
انا بلعب فى الحوش تحت الفصل و لاقيت البنت ده بتنادى عليا من شباك الفصل و بتقولى : يا حسام .... انت نسيت السندوتشات بتاعتك ؟؟؟ قرب تعالى تحت الشباك احدفهالك .... طبعا انا مكدبش خبر و جريت تحت الشباك لاقيت كيس بلاستك اتحدف قمت لاقفه منها و بفتحه لاقيت 3 سندويشات بيض ... قولت يا سلام ... ده ماما متوصيه بيه قوى ...
المهم قمطت اول قطمه ... الله .. لذييييييييييييييييييذ ... ملح بقى و فلفل اسود و دلع ..... مفيش احلى من كده ....
التهمت التلت سندوتشات و طلعت ارمح فى الحوش ولا اجدعها حصان ...... المهم الجرس ضرب و طلعت الفصل و دخلت .. و اتفزعت لما لاقيت البنت اللى حدفتلى السندوتشات وشها منفخ و عماله تعيط و خلاص بتفرفر ... و اول ما شافت خلقتى قالى ده ميس ماجدة هتموتك .... انت اكلت السندوتشات بتاعتها !!!!!! ده لسه مقطعانى من الضرب و كل بسببك ؟؟؟ طبعا انا كنت فى احوج الاوقات للبامبرز لحظتها ... و عملت نفسى متماسك و قلتها ... و انا مالى مش انتى اللى حدفتهالى ... السندوتشات ده بتاعى انا جايبها من البيت ..... لسه مخلتصتش الكلمه و لاقيت العصايه بترن على باب الفصل ....و شبح ابله ماجدة متجها ناحيتى .... و بتقولى اطلع برة و افتح ايدك ؟؟؟ انت بتاكل السندوتشات بتاعتى ده يومك اسود ؟؟؟ طبعا بقى استكمالا لمسلسل الرجوله اللى كانت وخدانى ... و علشان منزلش من نظر المعجبين القابعين فى الصفوف امامى و بشجاعه منقطعه النظير !!! طلعت برة .... و فتحت ايدت و دقات قلبى كانت اعلى من صوت جرس الحصه .... قامت الابله ماجدة ( حسبى الله و نعم الوكيل فيها ) رفعت العصايه لغايه السقف و نزلت بيها على ايدىه .... العصايه كانت بتزن فى الهوا و هى نازله زى عواميد الكهربا بتاعت الضغط العالى .... و طااااااااااااخ ...
و افتح اديك التانية ....و طاخ ... و انا ما زلت متماسك ... حوالى 10 عصيان ...الهانم استغربت من رد فعلى ...
و امعانا فى القسوة و الانتقام .... قامت صرخت فى وشى و قالى لا اقلب ايدك على الناحية التانية ( انا فى عقل بالى بقى ... الله يخرب بيت ابوكى كفايه ... دول تلت سندوتشات بيض عمى .. امال لو كنتى جايبة امهم الفرخه كنت عملتى ايه بس ) و هى ...شغاله الله ينور و مع خامس عصايه على ضهر ايدى مدرتش بنفسى الا و انا بجرى من الفصل و نزلت السلم و طرت على باب المدرسه و جريت على برة و البواب قعد يصرخ و يجرى ورايا و طرت على البيت ......
و طلعت على امى ( ربنا يديها الصحه ) و لاقيتها مشغله الغساله و عماله تغسل .... قمت ضارب الباب برجلى و دخلت عليها و انا يتشحتف من كتر العياط .... امى افتكرت ان المدرسه وقعت ... فضلت تهدى فيه و انا مش جاى عليه الا عمال اسألها و اقولها : انتى حطيطيلى كام سندوتش فى الشنطه !!!! ؟؟؟ المهم حكيتها الموضوع كله ... قامت لفه العبايه و نزلت على المدرسه معايا .....و انا مش عاوز اخش المدرسه خالص ...المهم جرجرتنى و دخلت بيه مكتب الناظره و راسها و الف سيف تشوف الابله ده .... و الناظرة قلتلها خلاص انا هحل الموضوع ... و ده لا لازم تشوف الابله ده
المهم الناظرة قالتلها ده خلاص مشيت روحت و خلاص انا هنهى انتدابها دلوقتى و مش هتيجى المدرسه تاني !!!!!
و تانى يوم بعد معاناه رحت المدرسة و ايديه ورامه و فعلا الست ماجده ده متشفتهاش فى المدرسة تانى و العيال اصحابى فرحوا بيه اوى و قالولى انت بطل ..... و منهم واحد ابوة فرارجى ... قالى يا عم انا كل يوم هجبيلك سندوتشات بيض ...
و ده كانت حكايتى مع سندوتشات البيض ... بس بصراحه الابله ده بتعمل سندوتشات بيض احسن من امى ........