بخصوص دراع النور

**mgelgel** · 14-03-2012 06:57 PM

انا عندي دراع النور للنوبيرا2 كان الواطي بيعلق من وقت للتاني و يرجع يشتغل لوحده
دلوقتي فصل خالص بس العالي شغال عادي و كمان القلاب
هل من طريقة لاصلاحه بدل ما اشتري دراع جديد ب 150 جنيه و ياريت حد يقولي طريقة فكه
عشان انا دورت و لقيت زي سن صغير خلف الدراع و مش عارف يتفك ازاي؟؟؟ و شكرا

**محمد الشامي** · 14-03-2012 07:41 PM

طيب يا باشا ما تروح لكهربائي شاطر وتخليه يبصلك على الدراع يمكن يكون محتاج مجرد تنضيف

**tarek_2005** · 15-03-2012 12:08 AM

ارفع صورة ليه وانا اقولك علي الصورة طريقة فكه

**Abdm** · 24-03-2012 12:45 PM

المشاركة الأصلية كتبت بواسطة mgelgel

السلام عليكم و رحمة الله و بركاته
اولا انا اسف علي التاخر في الرد و ده بسبب اني كنت مسافر مامورية شغل
ثانيا نرجع لموضوعنا وهو دراع النور اللي مرة واحدة فصل النور الواطي
بعد ما رجعت من السفر نزلت النهاردة الصبح و قولت افك الفبرة اللي ورا الطارة و هي عبارة عن جزئين متعشقين مع بعض و ممسوكين بمسامير...
بعد الفك ظهر دراع النور كامل و هو ليه مجري كده بيتثبت فيها مع الطارة فقمت بفكه
الدراع راكب فيه عدد اتنين فيشة... واحدة صغيرة ودي بتاعة اضاءة التابلوه و النور الواطي و الفوجات
والتانية بتاعة الاشارات و النور العالي
المهم جبت افوميتر و اختبرت بيه الفيشة الصغيرة(النور الواطي) عن طريق تشغيل زرار النور الواطي و قياس الاطراف علي الفيشة فلقيت الدراع شغال تمام
قولت الحمد لله ندور علي حاجة تانية .. فتحت صندوق الفيوزات داخل الكبوت و راجعت علي فيوزات الاضاءة لقيتها شغالة بس لاحظت انه صوت تلقيط النور العالي مش جاي من صندوق الفيوزات
و بالتتبع لصوت التلقيط بتاع النور العالي لقيت الصوت جاي من ورا الفانوس الامامي اليمين
قمت فكيت الفانوس فلقيت وراه كتاوت نور متركب في نهاية الرفرف الامامي مع الاكصدام
ولاني شاري العربية مستعملة من اكتر من سنتين ف مكنتش عارف حاجة عن الكتاوت ده ......
المهم فصلت البطارية و فكيت اطراف الكتاوت (5 اطراف) و علمتهم طبعا لسهولة التركيب
و فتحت الكتاوت لقيت جواه ملفين واحد للنور الواطي و التاني للعالي و لقيت بتاع النور الواطي سايح و متفحم تماما قولت كده قشطة عرفنا السبب نبتدي بقي الشغل
روحت جبت كتاوت تركي ب 30 جنيه و ركبته بنفس الترتيب و و صلت البطارية وكله تمام
انا حبيت بس انقل التجربة البسيطة دي عشان الواحد يحاول يعمل الحاجات السهلة واللي مش محتاجة لكهربائي
و انا بجد بحس بسعادة و انا بمد ايدي في عربيتي و بصلحها
ارجو اني مكونتش طولت عليكم و اشكر البرنس الزميل tarek_2005 لاهتمامه بس معلش مقدرتش ارفع صور للموضوع

جزاك الله خيرا يا أخى الكريم على سرد المشكلة والحل . ويا ريت جميع الآخوة الآعضاء ينتهجوا هذا الطريق . يعنى لما يسئلوا أسئلتهم ويوصولوا لحل المشكلة يذكروها هنا مع الحل علشان الجميع يستفيد .
وجزاكم الله خيرا