بجد محتاج مساعدتكم و رايكم ووقفتكم مع واحد لسه زيرووو فى البى ام دبليو

**M.Ayman** · 15-03-2012 03:22 AM

السلام عليكم ورحمة الله وبركاته

انا يا جماعه معايا بريليانس frv موديل 2010 بس دماغى فى التعديل و تظبيط العربيه و الكلام ده .... يعنى عملت exhaust system فى العربيه عندى (هيدر - مواسير + علبه ) و فلتر سيموتا اصلى و العربيه لقيتها مش قد كده يعنى حاسس العزم برضه مش جامد و سألت احمد الوكيل قالى الموتور بتاعها تيوتا تكنولوجيا بس صينى و ِوحِش فى التعديل فكنت ناوى كمان سنه كده اسقط بقى موتور لانسر 4g93T و ده 1800 سىسى و تربو بيطلع 201 حصان بيتكلف فى حدود 13 الف جنيه ....... بس ردود افعال اللى حواليه كانت بيقولولى حرام و مش هتجيب تمنهم و دول فى الارض لانك هتطلع تنزل صينى و محدش هيقدر شغلك هاتلك عربيه نضيفه لما تعمل شغل فيها فلوسك متترميش فى الارض

علشان كده عايزكم تساعدونى
ايه رايكم افضل بعربيتى ولا ابيعها -لو بعتها هتخلص على 58 الف بس ان شاء الله هيتوفر معايا اجمالى 70 الف على اقصى تقدير - ف لو رايكم ابيعها اجيب ايه -انا بحب قوى شكل الدبانه زى بتاعت احمد طارق كده اللى باعها او بتاعت احمد حماده - و تتشد بكام و يتسقطلها موتور جبار كده بكام -ولو ينفع ام يبقى حواااااار -

معلش انا ميح فى البى ام معرفش انواع ولا اشكال ولا اسامى و لا اسعار ولا الهوا

سؤال هل لو جبت البى ام هتبقى فاتوحة فلوس بقى و بنزين ؟!!!

ارجوكم ساعدونى يا رب تحجوا هههههه

**sheko_2000eg** · 15-03-2012 04:27 AM

بص ياباشا
هات e36 اللي هي دبانة و فعلا هي دي العربيات اللي هتحس معاها بالاداء و اللي هتعملو فيها هتلاقيه
موديل فوق ال95 موتور 1800 او 2000 بتعمل 200 كيلو في الصفيحة
هتعمل حوالي 70 الف ج او اكتر شوية
او هات دبانة من 1991 الي 1994 موتور 1800 او 2000 بتعمل 200 كيلو في الصفيحة
هتعمل حوالي 60 الف ج او اكتر شوية
طبعا الاسعار ديه تركب عربية محترمة يعني فابريكة جوة و مش محتاجة مصاريف
قريبة من الحاجات دي :

**M.Ayman** · 16-03-2012 01:41 AM

اولا ياباشا متشكر جدا على الرد ........ بس كان عندى كام سؤال

- ايه الفرق بين موديل 91-94 و 95-2000 فى كل حاجه من حيث الشكل و الاداء و الاستهلاك و الثبات و العزم و القدره الحصانيه و اسعار قطع الغيار ؟

- اول صورة عربيه دى كده استوك و لا متعدله اصل شكلها تحفه و نفسى فى واحده زيها كده و تعمل كام كده؟

- ايه اسعار قطع غيارها و اسعار تحويلها ل M/// بالكامل و معلش على جهلى بالعربيه ممكن تقولى ال M/// كام hp :) ؟

- ايه رايك اجيب ايه مو 91-94 ولا من 95-2000 و هل اجيبها متعدله جاهز ولا اجيبها استوك نضيفه و اعدلها واحده واحده و معلش تمنهم هيبقى كام لو متعدلين جاهزين ؟

اخر حاجه والله و معلش على الاطاله ..... انا نفسى اجرب العربيه دى يعنى مشوار مثلا او يعنى فتره قليله كده يعنى اشوفها اعرف عنها اكتر عن قرب ...... تعرف حد ممكن يساعدنى فى الموضوع ده علشان مفيش حد فى اصحابى خالص معاه الدبانه للاسف و نادرا منهم كمان اللى معاه بى ام اصلا :/

و الف الف الف شكر بجد

**fahd_628** · 16-03-2012 04:02 AM

الفرق فى السنين بيبقى فى الأويشنز زى ال ABS و ال Airbags و الحاجات دية موجودة فى موديل 1996+ فى مصر

بالنسبة لموديل 1991 و نصف 1992 فا بيستخدمو نظام تعليق مختلف عن الموديلات الى بعد كدة

من اول موديل 1996 بقى التكييف تاتش

بالنسبة لل M فا المحرك بيبقى 3200 سى سى و بقوة 321 حصان و تسارع من 0-100 فى 5,4 ثانية :) و اقصى سرعة محددة الكترونيا الى 250 كم/س :) حاجة صاروخ كدة :)

فية برضة M 3000 سى سى و دية 286 حصان و من 0-100 فى 5,5 ثانية و اقصى سرعة برضة محددة لغاية 250

دة بالنسبة للمواتير الى مش مواصفات امريكانى لأن المواصفات الأمريكانى اضعف بكتيير :) ال 3200 و ال 3000 الأمريكانى الأتنين 240 حصان و لكن مع فارق فى التورك لصالح ال 3200

و انا رأى تجيب واحدة ستوك و تعدلها انت على ايدك

بالنسبة للتحويل ل M 3200 سى سى فا انا اعرف واحد عملها ب 35 الف ( دة سعر السيستم بدون المصنعيات و الشغل و كدة )

و انا رأى لو انت حتقلبها M مثلا يبقى مش حيفرق الموديل :) لأنك حتغير كل حاجة تقريبا

**loserdavie** · 16-03-2012 04:07 AM

بص يا باشا بدام غاوى تعديل ابقى خليك فى موديل 92 وهاتها مشنة بس تكون اساسيتها سليمة يعنى تعملها 50000 جم واصرف عليها 15000 جم شامل الاتى ( موتور 2000cc بفتيسه بالرديادتير بتاعه بالشكمان بالكنترول وعفشة السته سلندر كامله والكردان وعدادات بتاعه ) العربية حتبقى عروسة واحسنلك تبيع عربيتك ديه لانها كمان سنتين حتبقى ب 25000 جم هى والاسبيرانزا

**sheko_2000eg** · 16-03-2012 04:45 AM

المشاركة الأصلية كتبت بواسطة fahd_628

الفرق فى السنين بيبقى فى الأويشنز زى ال ABS و ال Airbags و الحاجات دية موجودة فى موديل 1996+ فى مصر

بالنسبة لموديل 1991 و نصف 1992 فا بيستخدمو نظام تعليق مختلف عن الموديلات الى بعد كدة

من اول موديل 1996 بقى التكييف تاتش

بالنسبة لل M فا المحرك بيبقى 3200 سى سى و بقوة 321 حصان و تسارع من 0-100 فى 5,4 ثانية :) و اقصى سرعة محددة الكترونيا الى 250 كم/س :) حاجة صاروخ كدة :)

فية برضة M 3000 سى سى و دية 286 حصان و من 0-100 فى 5,5 ثانية و اقصى سرعة برضة محددة لغاية 250

دة بالنسبة للمواتير الى مش مواصفات امريكانى لأن المواصفات الأمريكانى اضعف بكتيير :) ال 3200 و ال 3000 الأمريكانى الأتنين 240 حصان و لكن مع فارق فى التورك لصالح ال 3200

و انا رأى تجيب واحدة ستوك و تعدلها انت على ايدك

بالنسبة للتحويل ل M 3200 سى سى فا انا اعرف واحد عملها ب 35 الف ( دة سعر السيستم بدون المصنعيات و الشغل و كدة )

و انا رأى لو انت حتقلبها M مثلا يبقى مش حيفرق الموديل :) لأنك حتغير كل حاجة تقريبا

1++++++
و اول صورة عربية متعدلة
الاستوك اهيه

دي الكوبيه

**M.Ayman** · 16-03-2012 03:32 PM

- طب يا جماعه اجيبها موديل كام تقريبا -و موضوع ان التعليق مختلف ف 91 و نص 92 هيفرق بعد ما تتحول ل ام \\\ - و هيبقى سعرها فى حدود كام يعنى مثلا 50 الف ؟

- موضوع الاير باجز و التكيف التاتش و كده بيبقى فى الام \\\ ولا لأ ؟

- معلش سؤال ال 35 الف دول تمن تحويلها كموتور و عفشه و فرامل و كده بس ولا ده كمان شامل كل حاجه زى الفرش جوه و الباكيتات و الطاره و كل البودى كيت بتاعها و كده ؟

- يا جماعه ممكن ان شاء الله لما انوى و يبقى معايا فلوس تبقوا معايا فى العربيه المتعمله اللى هجيبها تشوفوا الشاسيه سليم ولا ﻷ و ترشدونى على المطلوب والناس اللى هتعامل معاهم علشان انا فعلا محتاجكم معايا ؟

- كده 35 الف + 50 الف يعنى هحتاج فى رينج 85 الف جنيه تقريبا صح ؟ ولا اكتر ؟

بجد يا جماعه حاسس انى هكسب اخوات كتير فى القسم ان شاء الله

**mik_e30** · 16-03-2012 07:52 PM

يا كبير انت هتستحمل الام ومصاريفها؟؟؟؟؟؟؟
انت كنت بتسال الاول هتبق شفاط بنزين ولا اية
العربية ال 1800 وال2000 متوسط بنزينهة 200 او220 للصفيحة
تخيل 3200 بقي
سيبك من البنزين
انت هتعرف تمسك نفسك عن القوة الخرافية الي هتبق تحت رجلك؟؟؟ لان هتبق مغرية بغباء
انا كنت هشتري e30 عليها موتور m40 عادي مش الفئة ام كان 1800 سي سي وانا بجربها كنت خايف من الي كانت بتعملة واهي 1800 وجبت بيها تقريبا 190 عالصحراوي وكانت محملة 7 اشخاص والشنطة فيها حمولة وصاحبها كان مبهدلها وكان ممشيها بنزين 80
فما بالك 3200 ام ؟؟؟
هو الموضوع مغري جدا ومحدش هيعرف يتكلم معاك بس انا عن نفسي لو انت عايز سحب وسرعة وتجميع يبق بدل ماتجيب موتور ام وتصرف كل دا ومش هتلاقي طريق يستوعة القوة دي خالص هات عربية وسقطلها موتور is والاداء هيعجبك جدا او تجيب موتور 2000 6سلندر وهتعيش حياتك وممكن تقلبها صالون وعتب واكصدامات ام هتبق شكل الام في كل حاجة لكن موتور الام صعب جدا ومفري جدا

**M.Ayman** · 17-03-2012 12:25 AM

المشاركة الأصلية كتبت بواسطة mik_e30

يا كبير انت هتستحمل الام ومصاريفها؟؟؟؟؟؟؟
انت كنت بتسال الاول هتبق شفاط بنزين ولا اية
العربية ال 1800 وال2000 متوسط بنزينهة 200 او220 للصفيحة
تخيل 3200 بقي
سيبك من البنزين
انت هتعرف تمسك نفسك عن القوة الخرافية الي هتبق تحت رجلك؟؟؟ لان هتبق مغرية بغباء
انا كنت هشتري e30 عليها موتور m40 عادي مش الفئة ام كان 1800 سي سي وانا بجربها كنت خايف من الي كانت بتعملة واهي 1800 وجبت بيها تقريبا 190 عالصحراوي وكانت محملة 7 اشخاص والشنطة فيها حمولة وصاحبها كان مبهدلها وكان ممشيها بنزين 80
فما بالك 3200 ام ؟؟؟
هو الموضوع مغري جدا ومحدش هيعرف يتكلم معاك بس انا عن نفسي لو انت عايز سحب وسرعة وتجميع يبق بدل ماتجيب موتور ام وتصرف كل دا ومش هتلاقي طريق يستوعة القوة دي خالص هات عربية وسقطلها موتور is والاداء هيعجبك جدا او تجيب موتور 2000 6سلندر وهتعيش حياتك وممكن تقلبها صالون وعتب واكصدامات ام هتبق شكل الام في كل حاجة لكن موتور الام صعب جدا ومفري جدا

طب تعليقا على الكلام ده معلش ممكن اعرف العربيه بنزينها عامل ايه يعنى علشان كده انا خفت

و بعدين بافتراض انى ماشى عادى يعنى 3 rpm هيبقى بنزينها عامل ازاى ؟!!! و مصاريفها هل ليها مصاريف زياده يعنى عن العادى قطع غيارها متوفره و رخيصه ولا لأ .. انا كنت فاكرها كتيره و منتشره اكتر من الايفو مثلا باين كده من الكلام انها برضه قليله فى البلد

و بعدين بالنسبه للموتور هل ينفع عادى انط النطه دى من عربيه 102 حصان -فى الحقيقه عملت حاجه و تمانين

- للموتور الجبار ده !!!! .... ارجوكم جاوبونى علشان انا عايز العربيه دى برضه كاستعمال يومى .... تنفع ولا تبقى صعبه ؟؟؟؟؟

و الف شكر ياباشا على التنبيه بس هو موتور ال is ده ايه

؟ احسن من الاصلى ال 2000 بتاعها و كام حصان و الاوريجنال كام حصان اصلا و برضه البنزين عامل ايه ؟

**TheBuccaneer** · 17-03-2012 12:28 AM

المشاركة الأصلية كتبت بواسطة bor3ey

- طب يا جماعه اجيبها موديل كام تقريبا -و موضوع ان التعليق مختلف ف 91 و نص 92 هيفرق بعد ما تتحول ل ام \\\ - و هيبقى سعرها فى حدود كام يعنى مثلا 50 الف ؟

- موضوع الاير باجز و التكيف التاتش و كده بيبقى فى الام \\\ ولا لأ ؟

- معلش سؤال ال 35 الف دول تمن تحويلها كموتور و عفشه و فرامل و كده بس ولا ده كمان شامل كل حاجه زى الفرش جوه و الباكيتات و الطاره و كل البودى كيت بتاعها و كده ؟

- يا جماعه ممكن ان شاء الله لما انوى و يبقى معايا فلوس تبقوا معايا فى العربيه المتعمله اللى هجيبها تشوفوا الشاسيه سليم ولا ﻷ و ترشدونى على المطلوب والناس اللى هتعامل معاهم علشان انا فعلا محتاجكم معايا ؟

- كده 35 الف + 50 الف يعنى هحتاج فى رينج 85 الف جنيه تقريبا صح ؟ ولا اكتر ؟

بجد يا جماعه حاسس انى هكسب اخوات كتير فى القسم ان شاء الله

السلام عليكم...

أولا بالنسبه للأسعار
سعر النظام الميكانيكى لتحويل السياره إلى E36 M3 بمحرك M3 سعة 3000 سى سى بتتكلف 30,000 جنيه و المحرك إسمه S50B30

S50B30

E36 M3 Saloons "Sedan" 1992 - 1995
S50B30 سعة 2990 سى سى قدرة 286 حصان "282 حصان فعلى" @ 7000 أر بى إم و عزم 320 نيوتن @ 3600 أر بى إم

E36 M3 Coupes 1993 - 1995
S50B30 سعة 2990 سى سى قدرة 295 حصان "291 حصان فعلى" @ 7000 أر بى إم و عزم 323 نيوتن @ 3900 أر بى إم

تسارع من 0 - 100 كم/ساعه فى 5.4 ثانيه

سعر النظام الميكانيكى لتحويل السياره إلى E36 M3 بمحرك M3 سعة 3200 سى سى بتتكلف 35,000 جنيه و المحرك إسمه S50B32

S50B32

E36 M3 Saloons "Sedan" 1995 - 1998
S50B32 سعة 3201 سى سى قدرة 321 حصان "317 حصان فعلى" @ 7400 أر بى إم و عزم 350 نيوتن @ 3250 أر بى إم.

E36 M3 Coupes 1995 - 1999
S50B32 سعة 3201 سى سى قدرة 321 حصان "317 حصان فعلى" @ 7400 أر بى إم و عزم 350 نيوتن @ 3250 أر بى إم.

E36 M3 Cabriolets 1996 - 1999
S50B32 سعة 3201 سى سى قدرة 321 حصان "317 حصان فعلى" @ 7400 أر بى إم و عزم 350 نيوتن @ 3250 أر بى إم " الأم ثرى الكابروليه لم تنتج إلا بالمحرك S50B32 فقط".

تسارع من 0 - 100 كم/ساعه فى 5.2 ثانيه

نأتى هنا للتوضيح ماذا يعنى نظام ميكانيكى؟ نظام ميكانيكى كامل يعنى محرك (طبعا على حسب اختيارك على احد المحركين الموجودين بالأعلى) + الفتيس كامل (وبيكون مانيوال بالنسبه للمحرك ال S50B30 بيكون الفتيس "5 سرعات + المارشدير" اما بالنسبه للمحرك ال S50B32 بيكون الفتيس "6 غيارات + المارشدير" ) + العدادات + كنترولات المحرك + ضفيرة السياره + الشكمان كامل + العفشه كامله أمامى و خلفى بالكرونه "بتكون كرونه لوك" + عمود الكردان كامل + الريداتير ال 6 سليندر + إلخ... يعنى كل ما تحتاج إليى السياره فى الجزء الميانيكى و الكهربائى المتعلق بالتعديل مثلا ضفيرة السياره

بالنسبه للتعديل الخارجى إلى E36 M3 يتكلف 5000 - 6000 جنيه بالقطع الأصليه و ليس بقطع فايبر جلاس - و هنا تقدر تعدل الأكصدامات أمامى و خلف و العتب بتعديل فايبر جلاس هيكلفك 1800 جنيه و هنا هنصحك بميدو بيرفورمانس و هو بصراحه تعديلاته جميله للبى إم دبليو بالذات و الهوايات "المعروفه بالخياشيم" هتتكلف 500 جنيه "جديده" و هتركبهم عند السمكرى و هتضطر تدهن الرفارف مره ثانيه بعد القطع و لحام الهوايات و المرايا الجانبيه هنا عندك شيئين إما مرايا ال E39 M5/E46 M3 و المعروفه "بالفولدنج تويست" جديده تايوانى ب 1600 - 1800 جنيه أو تضع مرايا ال E36 M3 المعروفه ب"المرايات الشوكه" و هذه تقدر تشتريها استيراد و هتتكلف تقريبا 500 - 600 جنيه للزوج كاملين - اما الباكتات الجانبيه هتتكلف من 800 - 1000 جنيه استيراد

E46 M3/E39 M5 بتغلق عن طريق الدوران للداخل و للأعلى و تفتح بطريقة دوران للخارج و للأسفل و الغلق و الفتح بطريقه كهربيه كامله و أيضا مع السنتر لوك

E36 M3 بتغلق بشكل عادى مثلها كسائر المرايا يدويا

طبعا الزجاجه داخل المرايا فى البى إم دبليو كلها تتضبط كهربيا من الداخل

تكلفة الكهربائى فى التعديل إلى E36 M3 هتتكلف من 2000 - 2500 جنيه
تكلفة الميكانيكى فى التعديل إلى E36 M3 هتتكلف من 3000 - 4000 جنيه

اما بالنسبه للصالون الداخلى

سعر عجلة قيادة ال E36 M3 و هنا يوجد عدة أشكال لها لكن أفضلها شكلا هتتكلف 1200 جنيه استيراد

سعر الأوكر النيكل الداخليه و سعر الفريمات النيكل حول العدادات و غطا فرمل اليد ال M3 تسأل عنها العضو فهد لأنه اشترى هذه الأكسسوارات من الخارج بسعر جميل هو يحدثك عنها أفضل منى :) "فهد باشا ^_^"

فريمات العدادات

غطا فرامل اليد

الدواسات

و هذه كلها تقدر تشتريها يعنى ممكن كلهم يدخلوا فى مبلغ 1000 جنيه "جديد"

المشكله تكمن فى الكراسى هى اللى ممكن تدخل فى مبلغ 6000 جنيه "2 كرسى أمامى كهرباء و كنبه"

الكراسى اللى مش كهرباء

بالنسبه للكراسى اللى مش كهرباء ليس لدى خلفيه بسعرها, أيضا سعر الكراسى الكهرباء أنا قولت سعر قد يكون صحيحا أو خطأ

يعنى تقدر تقول تكلفة تحويل سياره من E36 عاديه إلى E36 M3 كامله خارجى و داخلى حدود 50,000 جنيه. طبعا هتمسك معك سعر جميل جدا لأن ال M3 بشكل عام مش كثير للتكلفه الكبيره فى تعديل واحده و من هنا أيضا الأصلى منها بتكون أغلى لأنها أصليه من المصنع. و طبعا السياره مشكله على سبيل المثال أحمد طارق باع ال E36 M3 اللى كانت معه على 160,000 جنيه و السياره كانت تقريبا موديل 1995 و عدلها لكن وضع عليها محرك ال E46 M3 بقوة 343 حصان و هذا سعره يختلف طبعا الأسعار المذكوره بالأعلى

الموضوع: بجد محتاج مساعدتكم و رايكم ووقفتكم مع واحد لسه زيرووو فى البى ام دبليو

LinkBack

أدوات الموضوع

عرض

بجد محتاج مساعدتكم و رايكم ووقفتكم مع واحد لسه زيرووو فى البى ام دبليو - انشر الموضوع فى :

-

-

-

-

-

-

-

المواضيع المتشابهه

اية رايكم....محتاج مساعدتكم

إلى محترفين المنتدى فى البى إم دبليو

داتشيا نوفا فى شكل البى أم دبليو

عضو جديد فى منتدى البى ام دبليو

اللى عشاق البى ام دبليو

الكلمات الدلالية لهذا الموضوع

المفضلات

المفضلات

ضوابط المشاركة