معلش يامتورايزر سؤال برئ يعني :Angel_anim:
هو البنت عشان تكون بتعرف تسوق صح لازم تشد مع كل الناس اللي ماشية حواليها وتسبقهم وتمشي بسرعات جنونية وتاخد غرز؟
يعني البنت اللي بتسوق كويس وبتلتزم بحارتها المرورية ومبتحاولش تتجاوز اللي قدامها طالما هو ماشي بسرعة معقولة ومتسابقش الناس ومبتغرزش عليهم ومبتاخدش الطريق بلطجة وتحدي تبقي بنت خايبة في السواقة ومبتعرفش تسوق؟
على فكرة انا بتعجبني ارائك جدا ومش قصدي من السؤال ده حاجة وحشة او اي اساءة لشخصك والله بس هي جت فيك انت بقي :D.
بس اصلي لاحظت حاجة اني في بداية سواقتي او بعد ماسوقت لوحدي بشوية بسيطة لما كنت بلتزم بجد ومكنتش بغرز ولا اخد شمال او يمين بلطجة وكنت ادي اشارة واستني وارمي سنة سنة كان في ناس بتبقي مضايقة من ده وعايزني امشي بسرعة (مع العلم اني مكنتش بمشي ببطئ مميت زي بعض البنات اللي المنتدي بيتكلم عليهم) وحتى في البدايات خالص لما كنت بمشي ببطء (طبعا لإن اي مبتدئ سواقة سواء بنت او ولد بيبقي خايف انه يجري بالعربية بسرعة ويفقد السيطرة عليها) كنت بعمل كده علي جنب وبمسك يمين عشان ادي فرصة للناس السريعة الفظيعة المهمة اللي معنهمش ريحة الصبر اللي في البلد انهم يتجاوزوني لكن اول مابتديت اشد حيلي واجمد قلبي في السواقة واجري بالعربية وزودت سرعتي وبقيت اخد غرز واعدي من عربيات واخد اليمين او الشمال بلطجة (مادام الإشارات مبقتش تجيب نتيجة بقي" بس رغم كده لسة بدي اشارات قبل ماخدها بلطجة يعني") حسيت ان الناس بقت عادية ومحدش مضايق من سواقتي ولا بسمع التعليقات اللطيفة بتاعة الشباب الجامد اللي بيسوقوا من وهما لسة بيتكونوا في بطون امهاتهم.
ده معناه ايه بقي؟ :k41:
وبعدين حاجة غريبة لاحظتها لما الاقي مثلا اتوبيس او ميني باص او اي عربية عموما تحدف عليا او تاخد غرزة غبية واحاول افاديه واهدي شوية بالفرامل واسيبه لحد مايغور في داهية الاقي ناس تعدي من جنبي (هما طبعا شايفين الموقف من البداية) يقولولي لا جمدي قلبك ودوسي فيهم متخافيش ، قوّي قلبك كده وخليكي جريئة السواقة محتاجة قلب جامد (وعلى فكرة اللي كانوا بيقولوا التعليقات دي رجالة) ونفس التعليق بسمعه لما اكون برجع بالعربية لورا سنة سنة عشان مخبطش اللي جاي من ورايا الاقيهم برده يقولولي ارجعي انتي هو هايخاف وهايقف يعني سواقة البلطجة والدراع بقت هي الصح وسواقة الإلتزام والعقل بقت سواقة ستات سواقة مملة وغشيمة. :k41:
فعلا الزمن ماشي بضهره ياجماعة بجد
وموتورايزر قال قبل كده لو ست غشيمة في السواقة اخرها هاتعطلك شوية لكن لو راجل غشيم في السواقة ممكن يتسببلك في كارثة مميتة
في النهاية بقي سؤال لكل الرجـــــــــــــــــــــ ــالة اللي معتقدين ان هما بس اللي بيعرفوا يسوقوا في العالم كله وأي كائن يحمل لفظ انثى يبقي مينفعش يسوق اصلا :
ياترى ايه هي قواعد السواقة الصح اللي تنفع في شوارعنا عشان البنات والستات تقلدكوا وتسوق كويس زيكوا؟؟؟؟؟؟؟؟
وسؤال مهم برده لو عربية طالعة من شارع جانبي وعايزة تطلع على الشارع الرئيسي ايه الخطوة الصح اللي يعملها عشان يطلع؟ بغض النظر بقي عن اللي سايقها راجل أو ست ؟
ياتري يفضل مستني لحد ماحد يتفضل ويتكرم عليه عشان يديله مكانه ويطلعه قدامه ولا ياخدها بطلجة ويرمي بوز العربية ولا يعمل ايه بالضبط؟
مع الوضع في الإعتبار ان احيانا في ناس بطلب منهم الإستئذان انهم يعدوني ومع ذلك ميعدونيش
المفضلات