الموضوع: الرجاء النصح محتارة في جين 2

الجهل قاتل ............. للآسف معظم المصريين بيفتوا بدون معرفة

العربية و كل الكلام اللي اتقال عليها لحضرتك هو العكس تماما
يعني قطع الغيار متوفرة
العربية مفيش فيها أي مشاكل فنية إطلاقا
أداء رائع و ممتاز و كماليات و لا أروع بالسعر الخرافي ده
محلات قطع الغيار بدأت تنتشر خارج التوكيل لإنتشار السيارة
إعادة البيع في الوقت الراهن كويسة و مش ممتازة و لكنها في تحسن مستمر نظرا لإنتشار السيارة اﻵن
و بعدين لو حضرتك أشترتها دلوقتي ........... مش هاتفكر في بيعها بعد شهر .......... العربية هاتقعد معاك مش أقل من سنة تحت الظروف الطبيعية و في خلال السنة دي إن شاء الله يكون موضوع اعادة البيع اتحسن عن دلوقتي مع العلم إن اعادة البيع ليها مش وحشة

أتكل على الله و متسمعش كلام حد ............. ادام العربية عاجباك خصوصا إنها تستاهل .........

و شكرا

المشاركة الأصلية كتبت بواسطة gemino

يا استاذى العزيز توت باشا دى زميلة مش زميل
و بعدين انا ملاحظ ان كده حاتبقى فى منافسة بين الاخوة الزملاء و الاخوات الزميلات فى شراء العربية و شكلنا كده حانبقى اقلية قريب اوى

شكرا ياباشا على التوضيح ........... اصل أنا لما ردت كنت مستعجل و كمان لما لقيت الأخت الكريمة مستعجلة الرد فرديت بسرعة لأني كنت ناوي أرد لما أرجع من مشواري

و فعلا البنات بتقع في حُب الجين 2 بسرعة .......... أصل شكلها جذاب فعلا ..........
و باين هانبقى أقلية صحيح .............

السلام عليكم
الأخت الفاضلة

طبعا مش حتلاقي حد يشرحلك ويعدد لك مزايا الجن تو أكتر من الأخ توت عنخ امون ... هو مالك للعربية ويعرفها كما أنه واقع في حبها :) ربنا يبارك له فيها.

ولكن كما هو الحال في جميع السيارات فيها المزايا والعيوب ولكن (من وجهة نظر الشخص إللي بيشتري) بتطغى المزايا على العيوب ... وفيه بردة عوامل تانية إللي هيا الراحة النفسية لشكل العربية ,,, أهمية الكماليات ... جودة الوكيل .... توافر قطع الغيار .... سعر إعادة البيع لو حصل ظرف طارئ وإضطريتي تبيعي قبل سنة .... لان مش معقول نشغل بالنا بسعر إعادة البيع بعد خمس او تسع سنين بعد ما نكون خدنا خير العربية وبعد المدة دي كل العربيات سعرها بتنزل.

ليا عتاب على الأخ توت وهو بوصفة الناس إللي بتقول كلام على الجن تو بالجهل! يا أخي لولا إختلاف الأذواق والأراء لبارت السلعه.

مع إحترامي لرأيك وحبك للجن تو فأحب أوضح نقاط للأخت إللي بتسأل وقد تكون محل الأخذ بالإعتبار عند الإختيار:

1- الجن تو لسة مش منتشرة كتير وبذلك سعر إعادة البيع حيكون ضعيف لأن الناس لسة محطتهاش في التصنيف الصحيح بتاعها وكتير من الناس (عدا الخبراء) بيصنفوها في الجودة بعد الصيني وقبل الكوري.... ده مش رأيي بس ده رأي السوق المحلي وبأكد مش الخبراء.

2- وجود توكيل واحد وهو عز العرب ده علامة إستفهام كبيرة! وقالهالي أخويا كريم منير قبل ما أشتري لإني فعلا قكرت وروحت إتفرجت على الجن تو (لو عز العرب قل بأصلة يبقى لقيت نفسك في حارة سد!) .... فأنا أسمع إن عز العرب لحد دلوقتي محترم بس بردة مسألة أبخات وأعتقد في أخ في المنتدى كان كاتب عن تجربة سيئة معاهم.

3- توافر قطع الغيار أصبح أحسن من الأول بس الأول فعلا كان في ناس بتقعد فترة كبيرة مستنية قطعة غيار توصل من برة بس ده بيحصل في أحسن العائلات :)

4- تحفظي على الجن تو إن الخامات بتاعة التابلوة والفتيس مش قد كدة وعمرها الإفتراضي (الشكلي) مش كبير وبعد كدة بتقشر او بتبقع وده شوفته بنفسي في جين تو كتير وأدخلي على موقع 100 100 للسيارات وشوفي الجن تو إللي معروض للبيع.

على الجانب الاخر العربية ثباتها محترم جدا .... موتور شديد جدا .... علو عن الأرض.... شكلها عاجبني وشبابي قوي ولو إن في الخارج الريفيوهات على الشكل مش قد كدة .... بس مسألة أذواق.

لماذا انا على سبيل المثال لم أشتري الجن تو؟

1- العربية تعتبر جديدة على السوق المصري ولو حتى بقالها كام سنة بس مش زي تويوتا او هيونداي مثلا.
2- موضوع جودة خامات التابلوة.
3- الكماليات الكتير بسعر قليل بتفكرني بالخدعة الصيني بتاعة كل حاجة في حاجة واحدة وبسعر زهيد بس مش معمرة .... مش بقول إن ده بينطبق على الجن تو لإن لسة محدش جربها 5 سنين متواصلة؟
4- الموتور 1600 كتير على شوارعنا ومع غلو البنزين وأنا في الاخر موظف ومشايري كتير فمش عاوز حوت بنزين.
5- دي بقة جت من عند ربنا إرتفاع الضريبة على كل العربيات تبعا للسي سي وإرتفاع سعر البنزين إللي يخلي الواحد يفكر في موتور سعته أصغر قبل الشراء.
6- وجود منافس ياباني لها وفي نفس السعر (بغض النظر عن الكماليات) لإني بيهمني العربية وتأسيسها مش كماليتها.
7- يمكن أفدر اقول من وجهة نظري شراء الجن تو او أي عربية جديدة يعتبر مغامرة او مخاطرة وبالنسبة لي في هذة المرحلة من حياتي وخصوصا إني بقسط معنديش إستعداد للمخاطرة في عربية مازالت في حيز الإنتشار.

أتمنى أكون وصلت رأيي بموضوعية وربنا يوفقك للصواب .... متنسيش صلاة الإستخارة.

جود واف باشا ........... كلامك تقريبا كله صح
أنا مش بقول على الناس اللي جربت و بتدي رأي أنا بتكلم عن الناس اللي حتى متعرفش شكلها و بتفتي بس
بس أنا مش بتكلم عن أذواق
أنا بتكلم عن ناس بتفتي و هي مش عارفة
يعني مثلا لما أسأل واحد و أقوله أيه رأيك بين العربية المرسيدس و البي إم دبليو
ويكون الرد كالتالي

أنا معرفش حاجة عن المرسيدس بس البي إم فيها مميزات كذا و كذا و كذا

ده غير واحد تاني برضه يكون ميعرفش حاجة عن المرسيدس بس بدل ما يرد و يوقل أنا معرفش
لاءة ............. لازم يفتي و يعطيك رأي
و بتلاقي بقى أراء الكفتة بتطلع
يقولك دي ملهاش قطع غيار ,........... أو بلاعة بنزين أو موتورها سئ أو أي عيب و خلاص .......... في حين أنه مجربهاش نهائي و يمكن كمان ميعرفش شكلها

و نفس الكلام على الجين 2 أو أي عربية مش معروفة قوي في السوق المصري
زي السوباروا مثلا
أنا بس عايز لما واحد يسأل سؤال لواحد تاني تكون الإجابة موضوعية ؟؟؟
مش إجابة و خلاص بدون معرفة
و هنا بقى تأتي مميزات المفتي المفتي المصري اللي لازم يديك رأي حتى لو معندوش أدني فكرة عن الموضوع

أنا مش بتهم حد و لا بغلط في حد ............... أنا بتكلم عن حقائق

بس صدقني يا باشا لو الناس مشيت ورا المعروف في السوق بس من غير ما تجرب حاجات تاني حلوة
كان زمان مصر مفيهاش غير فيات و بيجو بس
لأن أول ما الياباني دخل مصر .............. كان سمعته في الأرض و أثبت نفسه عن طريق كفائته و عن طريق مغامرة الناس و مش لازم تكون المغامرة كبيرة في حاجة مش معروفة خالص بس مغامرة لشراء ماركة ليست مشهورة و تفضيلها على ماركات مشهورة أكثر

و نفس النظرية تنطبق على الكوري في أوائل التسعينيات
فاكر كانت الناس بتقول عليه أيه ؟؟؟؟
و دلوقتي بيقولوا أيه ؟؟؟؟؟؟؟؟؟ و أيه وضعه من السوق المصري ؟

و موضوع إن عز العرب بس هو اللي معاه التوكيل مش موضوع كبير قوي
لأن الماركة عملت اسم كويس في السوق المصري و هاتلاقي موزعين كتير نفسهم يمسكوا التوكيل بتاعها

و على فكرة أنا مش منحاز للجين 2 أو ضد سيارات أخرى
أنا بس أحب أوضح حقائق .... يعني ما ينفعش الناس تدي رأي في منتج معين من غير ما تجربه و تفضل منتج تاني عليه و تقول أصله وحش من غير ما تجربه
يبقى الأحسن نقول ........ أنا معرفش حاجة عن الماركة الفلانية و أحب أبقى في السليم و أشتري المعروف و أمشي مع القطيع
و ده مش عيب اطلاقا
دي نظرية و دي نظرية أخرى
و أي عربية في الدنيا ليها عيوب و ليها مميزات و حتى أفخم العربيات و كل حاجة بتتقارن حسب ثمنها و إمكانيتها و أدائها
و أنا شايف إن أداء الجين 2 مع الثمن بتاعها في مصر و كمية الكماليات المحترمة ( كل الكماليات اللي فيها ماركات معروفة )
تبقى أفضل خيار لكل باحث عن سيارة بشكل حديث و بكماليات غير موجودة في سيارات بنفس السعر و أداء منافس لسيارات أغلىمنها بكتير
بس هي دي النظرية

و شكرا مرة أخرى يا باشا على الرد و على الرأي
أخوك توت

توت باشا او الاخ العزيز توت
بيعجبني العقلانية في الحوار بتاعك والشغف في شرح وليس الدفاع عن ما تحب وده شئ جميل وياريت كلنا يكون عندنا نفس الشغف والحب لما نعشق ونمتلك.

أعتقد المناقشة الجميلة دي المستفيد الكبير منها هي صاحبة الموضوع وربنا يوفقها في الإختتيار.... يلا يا سيتي بتشتري عربيات على حساب كلامنا وخبراتنا وفي الأخر ما بنشوفش ابيض ولا أسود ولا نسب من تمنها ولا حتى لفة بالعربية :) :) :)

يا باشا ألف شكر على الحوار الجميل

و صاحبة الموضوع إن شاء الله لما تجيب الجين 2 نكون أول ناس تبارك ............ و كمان لازم كنزي تأخذ لفة ........... متغلاش عليها

و ربنا يخليهالك يا باشا و يطرح فيها البركة ( دعاء جدتي لي )