السلام عليكم ورحمة الله وبركاته
ده اول موضوع تقريبا اكتبه في القسم الاجتماعي ! لاني في مشكلة ومحتاج رايكم
انا طالب في سنة خامسة صيدلة اخر سنة او اخر ترم بمعنى اصح ودعواتكم انه يعدي على خير ان شاء الله
وبشتغل في نفس الوقت في شركة جرافكس "web development" شركة توب لاين !
وعندي مشكلة ان الحج مش بيقتنع بحاجة اسمها صيانة للعربية !
الياريس معايا حاليا بقالها خمس سنين ! ماتعملش فيها ولا صيانة ولا مرة غير صيانة الاف !
العربية خمس سنين بنفس الفلاتر - نفس الزيوت "اللى بيتغير زيت الماتورفقط" - نفس تيل الفرامل نفس كل حاجة !
انا كنت فاكر ان الامور طبيعية وانه التويوتا بتستمحل لحد مابدات المشاكل تظهر واحدة ورا التانية
وكل ماكلم الحج على موضوع الصيانات ده ! مش مقتنع بيه اخره بيغير الزيت وخلاص ! والانيل كمان ان عمي ماشاء الله لما والدي ساله قاله ده ضحك على الدقون سيبك من كلام التوكيل العربية زي الفل !
الفرامل عندي كانت بتهيس بس ماكتشفتش قد ايه الفرامل عندي ضعيفة الا لما سقت عربيات تانية ! لما سقت السيراتو لقيت الفرامل بسم الله ماشاء الله جميلة واستجابتها حلوة وباقل دوسة بتهدي العربية
قلت السيراتو عربية محترمة وفراملها ممتازة ! جيت سوقت النهارده الكورولا ال 1300 المفروض الفرامل تكون قريبة من فرامل عربيتي بالعكس انا الفرامل عندي فيها ABS+EBD ومش عارف ده موجود في الكورولا ال 1300 ولا لاء !
الا اني لقيت برضوا فرامل الكورولا باللمس وممتازة اللهم لا حسد
نزلت من الكورولا ركبت الياريس حسيت اني بدوس فرامل اكني بدوس على الهوا ! العربية لازم اجيب نص دواسة الفرامل في الارض حتى تبدا تستجيب ! <<< طبعا مش تيل فرامل بقاله خمس سنين ؟ ؟
قلت لازم افاتح الحج في موضوع الصيانات ده تاني لعل وعسى يقتنع !
كلمت الحج اول ماروحت من الجامعة يا حج الفرامل ضعيفة واانا لسه خابط اول امبارح في واحد بسبب الفرامل ماجبتنيش !
طبعا سمعت كلام جميل جدا !
الحج : ضعيفة ازاي ؟ مانا لسه واخدها منك امبارح مشوار وكانت زي الفل امال انا رحت بيها شبرا ازاي ؟ وكانت بتفرمل وبهدي وعادي مافيش مشكلة ؟
انا : ايوة ماهي ضعيفة بس انت ماشي براحة ولو سوقت عربية تانية هتعرف قد ايه الفرامل ضعيفة ومحتاجة تغيير تيل ؟ وبعدين مانا لسه خابط بسبب كدة معرفتش افرمل ؟
الحج : فتح صوته ! انت متهور ! انت بتجري بسرعة ! فرامل ايه اللى عايزة تتغير ؟ مانت لو سايب مسافة امان بينك وبين اللى قدامك كنت هتقف ؟ عايزني اغيرلك ايه في الفرامل يعني ؟ اشيل التيل الاصلي اللى مش بيتعوض ؟ لو مش عاجباك فرامل العربية ماتركبهاش
انا : ياحج انا ماقولتش حاجة الفرامل كويسة وزي الفل بس لو حصل معاك ظرف لا قدر الله وكنت محتاج فرامل جامدة عشان تقف ,, العربية والله مش بتقف !
الحج : انت عشان مستهتر وماشي بسرعة مانت لو ماشي براحة هتعرف تقف !
والدتي : دخلت في نص الحوار تهدي النفوس <<< انت مستهتر وبتمشي 120 ومش هترتاح الا لما يجيلنا تليفون نلاقيك في المستشفى وتودي نفسك في داهية
انا : ونبي يا حجة بلاش تهدية النفوس دلوقتي الله يكرمك
طبعا سمعت كلمتين في الجون !
والمشكلة مش في الفرامل وبس ! لو على الفرامل كنت غيرت التيل من نفسي وريحت دماغي ! لكن العربية ككل بدات تفتح بقها !
الدركسيون بقى تقيل وبيهيس يوم كويس ويوم تقيل <<< لما شيكت في كتيب الصيانات لقيت المفروض زيت طلبمة الدركسيون يتغير ! مش عارف قصدهم على ايه والياريس باور كهرباء اصلا !
الفتيس عموما بقى سعات بحس فيه نتشات وسعات بيقطع ! <<< زيت الفتيس محتاج يتغير
العربية بقت سعات بتتنطط على الغيار الاول لما برعشلها بنزين في الزحمة <<< مشكلة شبه موضوع ال MMT ومش عارف سببها
بسمع صوت السير زي الفل لما باجي ادور <<< سير الدينمو عايز يتغير
سعات بحس بسخونة طالعة من عند الدواسات ! مش عارف سببها !
العربية بتتكتم خالص عند ال 160 << غالبا اما البوجيهات او فلتر البنزين والاتنين اصلا المفروض يتغيرو !
سعات اسمع اصوات عجيبة في العفشة <<< مش عارف في ايه في العفشة محتاج يتغير !
العربية بتحدف ومهما اظبط زوايا برضوا سعات بتحدف !
سعات اسمع طقطقة لما بشغل التكييف واخليه يجيب الهوا من جوة ! لما اجيبه من برة يختفي الصوت ! جايز فلتر التكييف عايز يتغير ! ! بس الياريس مافيهاش فلتر تكييف ؟ ؟ ؟
طبعا الفرامل بقالها كتير على كدة اكتر من سنة ! فغالبا الطنابير هتبقى حصلها مشكلة لان اكيد التيل اتاكل وحجر وبدا ياكل في الطنابير والفرامل هي ومزاجها سعات كويسة سعات تعبانة ! لكن بقالها مدة كدة بقت في التلاجة خالص !
وجايز يكون فيه مشاكل تانية انا مش متذكرها حاليا !
انا كل يوم وطول الفترة اللى فاتت وانا اقول كل شوية هيتنقع ونوديها التوكيل <<< كل شهر اقول طيب الشهر الجاي يمكن يوافق
ومافيش فايدة لحد مالبست اول امبارح صحيح اللى خبطت فيه هو اللى غلطان لانه كسر عليا بس لو الفرامل عندي عدلة كنت لحقت نفسي !
صحيح انا بشتغل والمرتب كويس الحمد لله بس العربية فيها حجات كتير محتاجة تتغير واعتقد لو رحت التوكيل هتتكلم في 3-4 بواكي عشان تتظبط وانا المرتب حاليا مايسمحش بالكلام ده !
خاصا لاني عشان في جامعة خاصة ومصاريفها غالية حبتين فمش بحب اتحامل على والدي في مصاريف شخصية ليا ! بقول كفاية اللى هو دافعهولي في مصاريف الجامعة !
بجيب متعلقاتي الشخصية واموري من المرتب بتاع الشغل فيدوبك المرتب بيكفي ! ويدوب لو عايز تركب حاجة بسيطة ورخيصة مثلا " اسبويلر - فلتر >.. " وكل فين فين اكون جمعتلي قرشين محترمين اجيب بيهم حاجة كويسة !
فدلوقتي بقى زهقت بصراحة وموضوع الفرامل بالذات بقى مخوفني جدا ! والحج مافيش فايدة مش عايز يقتنع ! ومش لاقي حلول
وفي نفس الوقت مش عايز اودي العربية برة التوكيل ! يعني مثلا لو هنقول كل شهر هغير حاجة مرة طقم تيل مرة فلتر بنزين مرة بوجهيات >... ! هتتعمل الحجات دي فين ؟
وفيه سيور وزيت الفتيس والماية الخضراء والكلام ده مش عايز اعمله برة التوكيل
بفكر حاليا اغير التيل عشان ابقى مطمن شوية وباقي الامور لما ربنا يسهل ! بس برضوا خايف يكون الطنابير فيه مشكلة فكنت هبقى مطمن اكتر لو عملتها في التوكيل !
وعايز اعمل برضوا كل حاجة في التوكيل عشان ابقى مطمن اكتر
فايه الحل دلوقتي ؟ ؟ ؟ ؟
المفضلات