الموضوع: تغيير مقاس كاوتش الماروتي

السلام عليكم ورحمة الله وبركاته

اثباتا للصمود امام العدوان على القسم

ثاني تقرير في اقل من 24 ساعه ولله الحمد والفضل والمنه


طبعا الكل عرف اني كنت مسافر واخدت نقره جامده قوي جابتلي سلك من الفرده الاماميه شمال وربنا سترها من عنده

وكان لازم اجيبلي ستبنه عالقليل

نزلت الستبنه مكانها طلعت الاستبنه ملووحه جامد

والفردتين التانيين مرشقين خوابير

فطبعا مش هآمنلهم
خصوصا وان عمرهم الزمني من فبراير 2007 يعني 5 سنين متقفلين وعمرهم الاستهلاكي 37 ألف كيلو يعني على شفا حفره

وحيث ان كده عندي فرديتين ضاعو
يبقى مكنش قدامي الا اني اغير ال4 فرد واشيل الستبنه الجديده مكانها...


طيب
لفيت 3 مرات ولله الحمد على الكاوتش

مره مع حماذه لفة سريعه ولقينا فيها الجود يير الهندي بتاعها بنفس المقاس ب 250

ومره لوحدي لقيت فيها جي تي ب 280 نفس المقاس وشفت الجي تي ب 250 نفس المقاس

ومره كانت مع منسقنا العظيم اكسيل باشا وكانت هي المره

المهم

انا قلت مغير مغير ودافع ودافع ومتغرم وربنا يعوضنا ان شاء الله
طب ليه مجبش حاجه اعرض سنه ومتأثرش عالعفشه

بعدين خدت بالي ان انا اصلا مش لاقي المقاس الاصلي الا بالعافيه فهجيب اعرض ازاي ومنين؟؟

قلت لآكسيل متيجي نظبط الزوايا لان لو طلع الحدفه من الزوايا يبقى الاستبنه مش ملووحه وساعتها كنت هشتري فرده واحده وخلاص
فقالي على محل ممتاز في الحي السابع م نصر وتوكلنا على الله ورحنا وعلى جهاز الزوايا لقيت الزوايا مظبوطه ولله الحمد وكانت المشكله في الفرده فتحتم اننا نشتري ال4

طب ياعمنا عندك ايه؟؟ انا نفسي اللي على 155 (اعرض سنتيمتر) وعلى نفس الجنط

قالي تعالى نشوف اللي عندي
لقينا اللي عنده فعلا بالمقاس الاعرض وسبحانك يارب

النوع ايه يا اسطا؟؟

قال Spectra اندونيسي
ايه ده ياعم الحج؟؟؟ ده حاجه مش معروفه خالص

اسمع يادكتور ده على ضمانتي

بكام ده ياعم؟؟
متخلي

ياعم انجز
300 جنيه بس

ايييييييييييييييييييييه؟؟

ليه ياعم

يا دوكتور ده اندونيسي ووالله نضيف وانا عندي منه لكل العربيات وماشي جدا وسرعات وانتاج حديث

ياعم الحج لا لا انزل شوية

راح فتح الدفتر ومسك الآله وهاتك ياحساب قالي بص يادكتور 290 وهنظبط الزوايا بعدها

خليني افكر يا اسطا

ها يا اكسيل ايه الكلام تعالا نشوف سبيكترا ده ايه

فتحت النت من الموبايل وهات جوجل ودور مفيش
صحراء

لا ياعم اكسيل كده كتير

يمين شمال فوق تحت مفيش سبيكترا دي غير واحد قال انه راكبها على باترول وكان بيتساءل ايه نظامها

اكسيل قال روح فاصله

رحتله
ياحج هاخد 4 بكام بقا دنا مفامر وواخد فرد بقد كده محدش عارف عنها حاجه

قالي وتغامر ليه اتوكل على الله وجيب من حد تاني


قلتله انا مش هتكلم خلاص
هروح اجيب فلوس واجيلك...

ورحت جبت فلوس ورجعتله وتوكلت على الله وركبت الاربع فرد سبيكترا ايفوليوشن ده وغيرنا البلوف ورصصنا وظبطنا زوايا

جيت اظبط الهوا ظبطت برضو على 27

مشيت


حاليا كملت اسبوع ولله الحمد وعملت مسافه بسيطه مش كتير
بس الانطباع الاولي:

الجوديير ده كاوتش فاشل ومش هدفع فيه فلوس تاني لانه ناشف جدا وبيبهدل العربية

معدتش احس بالنقر والمطبات حتى لما عليت الكاوتش ل 28 ما شاء الله

الثبات اعلى شويه على حساب السرعه القصوى لان الاحتكاك بقا اعلى فالعربية جربت اجري بيها مش زي الفبريكا

النوع سبيكترا فعلا كويس وصوته اهدى من الجود يير

الزوايا لاول مره احس فعلا انها مظبوطه ما شاء الله

ظبط الزوايا ب 25
الترصيص ب 25
الكاوتش الفرده 290


تقييمي الفرق في السعر لو حسبتها ان تمن كل سنتي زياده في المقاس 35 جنيه يعني حوال 150 جنيه عن المقاس الاصلي بس في المقابل ارسى وعلى نفس الجنط وفنس الوقت الاداء افضل



هسيبكم مع شوية صور...

السلك وده جنب واحد لكن هوا كان طالع من كذا مكان للاسف







وفي ختام الموضوع احب اشكر عمرو اكسيل بجد على تعبه معايا في اليوم ده من اوله وجزاك الله خيرا ياعمور وباذن الله اردهالك في اقرب وقت

ودي هدية عشانك




تحياتي