استشارة لرجالة السيات توليدو

**eltaweelll** · 17-03-2012 11:40 PM

انا بفكر اشترى سيات توليدو 2000 او 2001 فلو سمحتوا حد يقوللى ايه مميزات العربية دى وعيوبها واسعار قطع غيارها ايه وسعرها فى رنج كام والميكانيكية بتوعها كتير ولا لا ؟

**SYD** · 18-03-2012 12:32 PM

السيات توليدو 2000 عربية جميلة جدا وتشبه بنسبة كبيرة جدا البورا لنفس العام
تعتمد علي شاسيه وموتور وفتيس وعفشة البورا
وتشترك ايضا مع الجولف 4 والأوكتافيا في نفس المكونات السابقة

وطبعا تعتمد بشكل كلي علي تكنولوجيا فولكس

السعر يتراوح من ال55 لحد 65 علي حسب الحالة

قطع غيارها اعتقد الميكانيكية منتشرة جدا لأشتراكها مع الفولكس بورا وجولف 4 والأسكودا اوكتافيا في الموتور والفتيس والعفشة واعتقد الفرامل كمان

كصاج واجزاء خارجية واستيراد بصراحة معنديش فكرة وحضرتك تقدر تنزل وسط البلد لمحلات قطع الغيار في التوفيقية وشارع زكي وشارع سليمان حلبي وتسأل عندهم علي قطع الغيار واسعارها

بوجه عام

عربية في منتهي الرفاهية والأعتمادية والشياكة والبرستيج

والله المستعان
،
،

**ehab_mansour** · 19-03-2012 09:36 AM

طبعا مهندس محمد سيد قال المفيد و لكن العربية دي فعلا تحفه و ملعب واسعه و كبيرة جدا ما شاء الله و فيها اوبشنز كتيييييير جدا أعتقد لأني شفتها اكتر من مرة في التوكيل و مع ناس في الشارع

بتشترك مقدمتها مع مقدمة السيات ليون 2002 و اللي ايضا مش منتشرة في مصر

عيب العربية دي الوحيد هيكون في الصاج و الخوارج لعدم انتشارها و لكن كل شيء هتلاقيه ان شاء الله و لكن قليل
غير كده اشتراكها مع مجموعة فولكس هيخليك معندكش مشكلة في ميكانيكا و لا عفشة ولا محركات
وعلي فكرة العربية دي تقيلة شوية في البيع
وبالتوفيق ان شاء الله

**SYD** · 20-03-2012 11:57 AM

يعني احنا بنقولك كدة عشان تقول ابعد عنها ؟؟؟

لا طبعا مش دة الي نقصده

العكس صحيح

احنا نقصد انها عربية محترمة جدا والماني حتي النخاع
الصاج والبودي من برة بس هو الي اسباني ودة في كل السيات
لكن هيحتاج منك عشان تجيب فانوس ولا رفرف ولا اكصدام انك تلف علي بتوع السيات وتسأل عندهم واحد واحد يعني هتلف شوية
ثم ان كل عربيات سيات مش منتشرة ماعدا الأبيزا
يعني الي بيسري علي التوليدو 2000 بيسري علي كل عربيات سيات سواء توليدو بموديلاتها او كوردوبا بموديلاتها

وعلي فكرة هي مش تقيلة ولا حاجة في البيع بالعكس دي محبوبة جدا جدا ومطلوبة ، والعرض هو الي قليل منها لأن الي بيشتريها بيقتنيها ومش بيفرط فيها

صلي استخارة وتوكل علي الله

والله المستعان
،
،