ابدأ محاسب في مكتب محاسبة ولا محاسب في شركة...اشيروا علي ايها الناس

**salahlanser** · 21-03-2012 11:29 AM

الاختيار يتوقف على حجم المكتب يعنى لو مكتب مشهور او مكتب له وضعه فى السوق يبقى ممكن تضحى بالشركه و الاستقرار وتختار المكتب
اما لو مكتب مستواه عادى لما الشغل بيخف بيسرح المحاسبين بتوعه وبالتالى الشركه بتكون احسن
اما بالنسبه للبنوك فهى عاوزه واسطه وكمان البنك مش هايخليك محاسب كويس لانه سيستم وما عليك الا انك شغال على السيستم ده بس
اما من وجهه نظرى المتواضعه ابدا فى مكتب كبير هاتبقى محاسب كبير
ولو شركه (يفضل شركه صناعيه) ويا سلام لو محاسب تكاليف تبقى قوى جدا وليك وزنك برده وربنا يوفقك

**Ahmed_Rahem** · 21-03-2012 11:50 AM

زى كل الاخوة اجمعوا، التدريب فى مكتب محاسبة الاول افضل، هتتبهدل شوية - واذا متبهدلتش دلوقتى هتبهدل امتى؟ - بس المردود على المدى الطويل افضل ولو زوت شهادة مهنية هيكون افضل. لو ليك استفسارات للشهادات ابعتلى على الخاص.
والسلام ختام

**M!SHO** · 21-03-2012 01:55 PM

برده مكاتب المحاسبه الكبيره عايزه واسطه

وبصراحه الواحد ميضيعش سنتين ولا تلاته فى مكتب تعبان

**Ahmed_Rahem** · 21-03-2012 09:35 PM

المشاركة الأصلية كتبت بواسطة hesham hamza

برده مكاتب المحاسبه الكبيره عايزه واسطه

وبصراحه الواحد ميضيعش سنتين ولا تلاته فى مكتب تعبان

مش كلها المهم الواحد شخصية قوية ولغة كويسة ومبادئ واساسيات المحاسبة موجودة وهيخش على طول

**matrix_it** · 22-03-2012 02:45 PM

هو تقريبا اللى بيشتغل فى مكتب محاسبة بينسى انه انسان يعنى شغل كل يوم 12 ساعة و مرتب قليل و كدة

**hosammoner** · 22-03-2012 03:42 PM

لو انت شايف ان اساسيات المحاسبة عندك كويسة ومستواك عالى ودا تحكم عليه من مستواك فالكلية طبعا يبقى تتكل على الله وتروح الشركة عشان متضيعش وقت ويبقى فى دخل كويس وفيها هتتعلم كل حاجة وتستوعبها بسرعة والعكس صحيح لو انت شايف انك مش تمام اوى فالمحاسبة يبقى تروح المكتب تتاسس صح وبعد كده اكيد ربنا هيكرمك بشركة محترمة ان شاء الله بس تعمل حسابك على سنتين او تلاتة شغل طحن ومفيش فلوس بالعكس هتصرف كمان وربنا يوفقك ان شاء الله