عايزين نقيم مدى استفادتنا من NileMotors

يا ترى قد ايه احنا استفدنا من المنتدى ده ياريت كل واحد فينا يقول ايه اللى استفادو من المنتدى و يحكى على اى موقف المنتدى ساعده فيه انا هابدأ بنفسى انا لما جيت اشترى سيارة طبعا كنت محتار و بناءا على مناقشات الاعضاء و ارائهم توكلت على الله و اشتريت الاوبترا و انا على علم كامل بكل المزايا و العيوب كأنها كانت مع أخويا باظبط و ماتفاجئتش بأى حاجه وكمان لما قريت مواضيع عن النيتروجين و مزاياه قمت حاطط نيتروجين على طول لثقتى التى اصبحت شبه عمياء فى اراء الاعضاء ياريت كل الاعضاء يتفاعلوا مع الموضوع ده عشان لما ييجى حد ينضم للمنتدى او ضيف يزوره يعرف قد ايه اهمية NileMotors لأى حد عنده عربية فى مصر و خارج مصر كمان

موضوع كويس قوي..
شكرا يافندم..
انا هاتكلم في نقطة مهمة جدا.. الا وهي ان اكبر استفادة حصلت ليا هنا..
اني ولله الحمد اتعرفت علي ناس.. هما معايا دلوقتي اصخاب و اكتر من الاصحاب..
وعلي وشك الوصول لدرجة اخوات.. مع اننا منعرفش بعض غير من فترة بسيطة قوي..
و الحمد لله اتعلمت حاجات كتير جدا عن تفاصيل و مميزات و عيوب العربيات..
بس بجد اكبر مكسب.. معرفة ناس كويسة جدا و محترمة زي اللي هنا ف المنتدي..

و الله عدى نقطه مهمة جدا عدت عليا انى اذكرها, تعرف بقى انى قابلت صديق عزيز ليا ماكنتش اعرف عنه حاجه من زمان و اتقابلنا صدفه هنا فى نايل موتورز

ايه ماحدش استفاد حاجه ده احنا كده شكلنا وحش اوى

الاستفاده الحقيقيه في كم المعلومات الهايله والمجانيه والناتجه عن تجارب وخبرات الاعضاء لاننا شعب نفتقد ثقافه السلع.نقتني السلعه للحصول علي الغرض منها من
غير نعرف ولو بقدر قليل وظيفه الجزء المكون لهذه السلعه.
bemo,ire

و الله عندك حق يا أخ Bemo

اكتر استفاده
اني اتعرفت علي ناس محترمه و زي السكر :)
و حاسس انهم اخواتي بجد وفيه بينا عشره كبيره.
بجد بقالي كتير ما اتقابلتش مع ناس كويسه كده:(
ربنا يديمها علينا نعمه يا رب :)

الاستفادات كتيرة اوي ... مش هنقدر نحصرها ... بس اهمها ان الواحد لما بيجي في باله حاجه عن العربيات بيلاقي اجابة حتى لو مش كافيه ... بس بيلاقي اجابه ... ده غير مشاركة الجميع في هموم الاخرين وخاصة المتعلقة بالقيادة و ما حولها

دا سؤاال دا؟؟

بص يا سيدي .. اللي استفدته هاتعرفه من انك مدمن و بتدخل كل يوم علي المنتدي ! ..
كفايه انك بتعرف ناس محترمه .. و ناس اهل للثقه ... و سيبك من المعلومات ... لاْن انت بزرار علي النت هاتعرف تجيبها ... انما فيه نقطه .. ان فيه ناس بتجيبهالك لحد عندك بمجرد السؤال عنها ! .. يعني عندك ناس بتعمل ريسيرش بدالك .. ناس بتديك الفيد باك عن المنتجات و الخدمات و المراكز المختلفه .. ناس بيوفرولك خدمه استشاريه في مجالات الحياه المختلفه لو طبيب او محامي او غيره ... ناس بتدلك تروح فين و تيجي منين ... ناي جديده تخرج معاها و تيجي معاها ... ده حتي لو قلت لواحد يسالك علي حاجه هايسالك عليها ...ده حتي بيعملوا رحلات و مصايف جماعيه و الجو اخر حلاوه هنا ;)
اعتقد يعني ان ده مش موجود في الحياه العاديه ... ولا حتي في اي منتدي تاني ... يعني كفايه انه كله مزايا ...و مافيش عيوب .. و ماتبصش لعيوب المشاحنات و المشاجرات و الكلام ده علي انه عيوب ... بصله علي انه وجهات نظر ...
متهيالي دي قمه الاستفاده ... و اعتقد يعني ان انا لو في يوم من الايام طلعت من المعتقل بتاعي ده .. اكون متشرف باني اقابل اي حد فيكم ...:d مش باقرع عليكم بجد :d

الموقع لا شك انه مفيد و لو كنت دخلته من زمان معتقدش انى كنت اشتريت هيونداى بسبب بلاوى غبور و لكن الاستفادة الحالية انى استطعت اظهار عيوب غبور اكثر حتى يحترس كل من يفكر فى شراء هيونداى
و اتمنى ممن يملكون هيونداى بالذات فى منتدى الهيونداى ان يكونوا اكثر واقعية فى الحديث عن الهيونداى و بعيدا عن العواطف او التعصب لهيونداى لمجرد امتلاك سيارة منها فمن يعاشر سيارات اخرى غير الهيونداى و يركب هيونداى بعد ذلك يكتشف انها ليست الافضل و عكس ما يتحدثون عنها
فقد قلل غبور من قيمة هذه السيارات تماما فى مصر و اصبحت ناقصة اشياء كثيرة حتى اقل الاشياء استخسرها فى المستهلك المصرى و اصبحت هذه السيارات فاقدة للجودة و الامان و مختلفة تماما عما نراه خارج مصر منه لله غبور .

هو فعلا يا بيشو.. الموضوع بقي ادمان..
انا متأكد ان في ستات في الموقع بقوا بيغيروا من نايل موتورز.
:) :) :) يعني في ناس بتقضي وقت علي المنتدي هنا اكتر من الوقت اللي بيقضيه مع اهله في البيت.. (انا عن نفسي كده بس انا لسة مش مرتبط..)

و كلامك عالي جدا يا بيشو و الدماغ ما شاء الله باين عليها رايقة اليومين دول.. ربنا يديم عليك الروقان..
و ربنا يفك شجنك من معتقل المغول بتاعك ده و نشوفك في مقابلة ولا حاجة.. :)

المنتدى مفيد جدا لآنك بتاخد خلاصة تجارب الأعضاء مع سيارتهم الحالية والسابقة

اقتباس:

---

المشاركة الأصلية كتبت بواسطة Ahmad Allawy

هو فعلا يا بيشو.. الموضوع بقي ادمان..
انا متأكد ان في ستات في الموقع بقوا بيغيروا من نايل موتورز.
:) :) :) يعني في ناس بتقضي وقت علي المنتدي هنا اكتر من الوقت اللي بيقضيه مع اهله في البيت.. (انا عن نفسي كده بس انا لسة مش مرتبط..)

و كلامك عالي جدا يا بيشو و الدماغ ما شاء الله باين عليها رايقة اليومين دول.. ربنا يديم عليك الروقان..
و ربنا يفك شجنك من معتقل المغول بتاعك ده و نشوفك في مقابلة ولا حاجة.. :)

---

نييييييييهعهعهع ... انا مش مرتبط و عاوز ارتبط :embarrassed2: :D الدماغ .. اسكت علي الدماغ .. الدماغ بتاعتي ليها مزاجات خاصه .. بس انا عارف اخرها .. و دي الميزه اللي فيا :D .. بس كلام صح و شامل كله ولا لا ء؟
و احب اشكر الاداره و كل المنظمين و القائمين علي السايت و المهتمين و كل الاعضاء .. و احب اهديهم اغنيه : ست الحبايب يا حنانا انتي :D

اليوم اللى مش بأدخل فيه على المنتدى احس أن فيه حاجة مش طبيعية!

انا فى عملى بأقعد على شاشات الحاسب وأعيش معاه من 8 ص الى حوالى 5 أو 6 مساء ومفروض أروح مأطيقش أشوف قٌدامى الكمبيوتر فى البيت ...... من يوم ما عرفت نايل موتورز وهو أصبح أكثر من 90% من وقت أستخدامى للانترنت .

اعضاء المنتدى الكرام فى جهدهم ........الكرام فى وقتهم ........الكرام فى أن لا ينتظروا مقابلا من أحد ........الكرام فى أمانة عرض المعلومة ........الكرام فى حاجات كثيرة جدا

لم يحدث أن دخلت أبحث عن معلومة ولم اجدها

لم يحدث أن وجهت استفسارا لاحد الاعضاء وخيب رجائى فيه

لم يحدث أن صادفت أستخدام أحد الاعضاء اسلوبا غير لائق مع عضو أخر

لا استطيع حصر ذوى الفضل على .... ممن أجابونى على اسئلتى

عن طريق المنتدى استطعت انتقاء سيارتى التى اشتريتها اخيرا وعن طريق المنتدى استطعت معرفة الكثير والكثير عنها

هذة بعض خواطرى حين رأيت الموضوع ولاأظن أنى قد وفيت اعضاء المنتدى ولو القليل من حقهم

مع شكرى واحترامى

نايل موتورز ده ادمان أساسا وانا بطلب من الاداره تعالجني منه

والله استفادة كتييييييييييييييييير و يا ريتنى عرفتة من زماان كان الواحد ما شربش مقالب زى اللى شربتها

اقتباس:

---

المشاركة الأصلية كتبت بواسطة dinow

و الله عدى نقطه مهمة جدا عدت عليا انى اذكرها, تعرف بقى انى قابلت صديق عزيز ليا ماكنتش اعرف عنه حاجه من زمان و اتقابلنا صدفه هنا فى نايل موتورز

---

وانا برضه
حصللي نفس الموقف
بس لاقيت صاحبي تختخ شويتين :)

أنا مش عضو في المنتدى من زمان (للأسف ) ، بس فعلا و الشهاده لله المنتدى كل أعضاؤه محترمين جدا ، و غير كده كمان واضح إن الناس هنا عندها خبرة كبيرة في السيارات ، و خدومين جدا .
يعني أنا مثلا عامل حادثة بعربيتي فدخلت على ورشة نايل موتورز و سألت عن قطع الغيار ، لقيت الناس دلتني بصراحة و في عضو زميل قالي لما أجيب الأسعار أقوله علشان يسألي عنده في بورسعيد ، و ده ونا لسه في المنتدا مبقاليش أسبوع .
غير كده واضح من أسلوب ردود الناس على بعضها ، إنهم فعلا بقوا أصحاب ، و الكلام ده مش موجود في أي منتدى تاني من المنتديات( الهلس) الي كنت دايما بدخلها .

اقتباس:

---

المشاركة الأصلية كتبت بواسطة hazem_khidr

اكتر استفاده
اني اتعرفت علي ناس محترمه و زي السكر :)
و حاسس انهم اخواتي بجد وفيه بينا عشره كبيره.
بجد بقالي كتير ما اتقابلتش مع ناس كويسه كده:(
ربنا يديمها علينا نعمه يا رب :)

---

+100000000000
ده بالأضافه الي اني بقيت المستشار بتاع العيله وزملاء والدي ووالدتي وزملائي اي حد تحصل حاجه في عربيته او عايز يشتري اويبيع عربيه لازم ياخد رأيي فيها (بأختصار اكتسبت كميه معلومات هايله )

الحمد لله رب العالمين
المنتدى ادانى حاجات كتير جدا اذكر منها
اولا تتمكنت من بيع سيارتى القديمه من خلاله
تانيا:وانا بشترى عربيتى الجديده 70% من المعلومات الى بتحدد قرار الشراء من عدمه عرفتها من المنتدى