الموضوع: عملت حادثة بالميجان و دى الحكاية .. ربنا يرحمنا من سواقين النقل الاغبياء ..

اول حاجة هقول الحمد لله على كل حاجة

اول امبارح كنت في المعمورة الصبح مع اصحابى و كنا بنلعب بلاى ستيشن و قاعد مش في دماغى خالص اطلع بره المعمورة و لقيت واحد صاحبى في الاكاديمية في ابو قير بيكلمنى و قالى تعالى خدنى عشان هو بيشد عربيته فمش معاه عربية ....
المهم قلت اروح اجيبه و قلبى كان حاسس ان في حاجة مش عارف ليه و كأن الواحد بيروح لقدره لان ده مش طريقى خالص لانى في كامب شيزار ..
مشيت في الطريق و خرجت وحدى و سبت اصحابى و عديت المزلقان و الطريق كان زحمة شويه و انا ماشى في اليمين و عربية نقل في الشمال و طبعا عشان الطريق زحمة فكله ماشى براحه و اللى حارته بتمشى بيعدى فالمهم الحارة بتاعتى مشيت شويه و عديت النقل و بعد كده الحارة بتاعة النقل مشيت و بقى قدامى انى ادخل قدامه و فعلا اديته اشارة عشان ادخل بس حسيت انه غبى و ممكن يخبطنى فمش دخلت و استنيت انا في مكانى .. الحارة اللى هو كان ماشى فيها الطريق مايل شويه فالمنطقة اللى كانت مكفياه في الاول مكنتش تعديه و هو طبعا قاعد فوق ولا شايف اى حاجة و انا ببص في المرايه و شايفه جاى عليا و خلاص اتأكدت انه هيخبطنى ... و مفيش قدامى اى حاجة اعملها لان العربية اللى قدامى وقفت .....
العربية النقل دى عربية من النقل القديمة اللى ليها كبوت كبير و اكصام غبى كمان فهو قاعد في فوق و لا حاسس انى موجود خالص تحت و فعلا بدأ صوت الخبط و ده ماشى و مكمل و بدأ يزق عربيتى و خلاص بخبط في اللى قدامى فاللى قدامى حس بيها راح طالع بسرعة و اخيرا الباشا بتاع النقل اكتشف انه ماشى على عربيتى من الجنب ..
المهم رحت انا نازل و بابى مش عارف افتحه لان وش النقل بقى جنبى يعنى تخيلوا هوا خبطنى و بيزقنى لغاية ما عربيته كلها عدت و من ستر ربن ان اللى قدامى مشى فبقى بيزق عربيتى بالجنب فمضيعش ليا الجنب كله ...
بعد كده رحت نازل من العربية و لقيته نازل يزعق و يقولى انت اللى خابطنى طبعا هو حسسنى انى انا في كوكب تانى بالكلمة و دى و يقولى انت مخبوط من ورا يعنى انت اللى غلطان شفتوا الجمال بزمتكم فيه حاجة احلى من كدا
المهم انا طبعا قلت ده بيسهبل يبقى يستاهل قلة الادب و اللى كان سايق واحد سنه 21 سنة يعنى نفس سنى تقريبا ( انا لسه مكمل 21 يوم الجمعة اللى فات اخيرا )
بعد كده لقيت الباشا عمال يتنطط في الشارع و بيوقف بتاع المشروع ( الميكروباص ) اللى كان ورايا و بيعدينى من يمينى بعد الحادثة و بيقوله اللى مخبوط من ورا يبقى مين اللى غلطان ... طبعا بتاع المشروع راح ضاحك و مردش عليه و مشى لانه كان ورايا و شايف اللى حصل كله ..
و لقيت النس بدأت تتلم و الطريق اتزحم ورا و كله يقول مشى الطريق و لقيت بتاع النقل رايح يركب عربيته و هيطلع بيها يعنى ناوى يكمل على العربية كمان رحت انا بسرعة راكب عربيتى و طالع يبيها بسرعة ووقفتها بعرض الطريق و قفلت الطريق و قلت هو يوم اسود على دماغه و يستحمل بأه اللى يحصله
المهم قفلت العربية و نزلتله و لقيت الناس تقولى مشى الطريق قلتلهم مفيش حاجة ماشية ده بيستهبل و بيقولى انا اللى خبطه طب انا هعرفه دلوقتى مين اللى خبط مين طالما هو اشتغل في قلة الادب و فعلا مسكت الولد و ظبطه و خدت بطاقته و الباشا مفيش معاه رخص ولا الهوا ...
و من هنا ابتدى فصل المسكنة بأه و انا غلطان و هعملك العربية . طب ما كان من الاول لو كنت قلتلى انا اسف و حقك عليا مكنتش هقدر اتكلم معاك كلمة لكن هما صنف بيحب قلة الادب و كان فاكر انه هياكلنى بكلمتين
و بعد كده لقيت عربيات تانية تبعه جايه و معلش و كلام من ده و هما كمان شافوا العربية كلها اسود في اسود فخافوا و ابتدا الشغل الناعم و الولد السواق قعد يقولى تعالى نركن في جنب و هعملهالك قلتله مكانك فالناس قالتلى الطريق وقف و مشى الطريق و كده فقلت ماشى مش مشكلة انا معايا بطاقته و هنفخه لو حب يعمل حاجة كده ولا كده ... و مشينا قدام شويا و رحت واقف قدامه و نزل و يقولى انا هعملها و بالنص و كده رحت قايله مش انت كنت نازل في الاول تستهبل يبقى هتستهبل بأه للاخر و هتعمل العريية كلها و الا يومك هيبقى فل ....
بعد كده جه ناس اللى مشغلينه و بصراحة كانوا محترمين جدا و قالوا خلاص هنعمل العربية و هتتخصم منه قلتلهم اوك يالا بينا بقى و رحنا عملنا السمكرة و كانوا هيعملوا العربية كلها و يرشوا الحتة المخبوطة في الاكصدام و الجنب بس انا قلت خلاص طالما هما محترمين
بس كان لازم السواق الغبى ده يتأدب بكده عشان يتعلم انه يعترف بغلطه وان كلمة حلوة كانت ممكن تخلص الموضوع ...

بعد كده خدت العربية و قلتهلم خلاص انا هكملها و رحت بيها العجمى لواحد صاحبى عنده فرن و بدأ الشغل و عمل المعجون و الفيلر و الحاجات دى امبارح و هنزل دلوقتى عشان اروح ارشها ...
الخبطة كسرت جزء من الاكصدام و عملته عند بتاع الفبر و سمكرت الرفرف لغاية السوكة و ان شاء الله تخلص النهارده و تترش

بجد مش هقول غير ربنا يرحمنا من سواقين النقل اللى بيفكروا اننا مطبات و الفمروض يعدوا من عليها و الحمد لله انها جات على قد كده لان انا من صوت الخبطة و الزق اللى في العربية انا كنت فاكر هنزل الاقى الشنطة جنبى بس الفبر فعلا بيمتص كتير من الصدمة