بلطجه ... و سفاله ... و انحطاط ...... فى مشوار نص ساعه ...

**hosamsief** · 21-03-2012 05:46 PM

بصراحه مش عارف ايه حكاية البلطجية معايا اليومين دول ........

دفعتى ظروفى التى قلما تأتى بما اشتهية .... الى ركوب احدى الباصات الــ 26 راكب من موقف العاشر الى عملى بعمارات العبور
بسبب واحد ( بصراحه انا مش لاقى وصف لية ) ركن و عشق عربيته امام عربيتى و ذهب يهيم على وجهه الى غير رجعه ......
و ركبت البتاع ده و شفت عجب العجاب ... السائق لا يتعدى عمرة الــ 18 سنه ...و يبدو انه من فئه البلطجه تحت التمرين ... بش شكله واخدها جد
و معاه واحد صاحبة نفس القطعية و اسمه ايه بقى ؟؟؟؟ .... اسمه ( حرز ) !!!!! يعنى اسمه لواحدة يودى فداهية ... و معاهم كائن طفيلى بيلم الاجرة ... اه و النعمه الشريفه .... يعنى لو واحد من حضراتكم شافه ممكن يحط الفلوس فى مناديل ورق و يرميها فى ايدة ... بس اعمل ايه مضطر بقى ...
طلعت واحدة ست و معاها طفل و عاوزة تركب قدام .... قام قالها بكل بجاحه ... لا انا واخد الكرسيين دول يا ست ...
قامت رده علية و قالتله ... و النبى يا عم متتكلمش بتناكه .....
قام قايم من الكرسى و رايح عليها و عاوز يشبط فيها و بيقولها ايه يعنى ... مش هقعدك انا حرررر.....
شكله مش طبيعى ... المهم اهل الخير هدوا الموضوع ......و انا لا زلت انظر له بأشمئزاز و نفور ....
المهم .... اتحرك الميكروباص ده .. واتفرج يا سلام ... كانك راكب مرجيحه .. غرز و تزنيق على خلق الله و كان هيدعك عربيتن ملاكى زيرو لسه
و يرمى على ده و يزنق على ده و حاجه اخر قله ادب ... لدرجه انى قفشت فى الكرسى ليقينى انه هلبسنا فى حاجه ...من حسن الحظ ان شارع صلاح سالم كان زحمه ... و فى احدى صولاته و جولاته السيد الشوفير ... رمى على عربية بيجو 504 لشاب و للاسف كان معه اقاربة و كلهم ستات ..
فما كان ما صاحب البيجو الا ان شوح له .....مع بعض الكلمات التى توحى على الانفعال ...
و فجاء توقف سائق الميكروباص فى عرض الطريق ... و اخرج راسه من الشباك و كيل له مجموعه منقاه من الالفاظ التى يعف اللسان عن ذكرها طالت كل العائلة و كان فاضل الجيران كمان ... و الاغرب ان ليهم طقوس و مراسم غريبة تسبق عملية الاشتباك ... فجه بقى عم ( حرز ) و نزل من الميكروباص و معاه الكائن الطفيليى اللى بيلم الاجرة و كمان السواق و الراجل بتاع البيجو منزلش اصلا من العربية و فاكر ان الموضوع هيعدى كده شفوى ... و اداله زغروفين ... انا بقى الدم فار فى عروقى ....و نزلت مع بعض الركاب و حاولت اخلص الراجل ده منهم علشان الحريم اللى معاه و بالفعل ربنا قدرنا و الرجل دخل عربيته بعد ما اتشكل علية شويه ... و البهوات قاعدين فى الميكروباص بيتفرجوا على المهزله اللى بتحصل ده...
بصراحه مش عارف اعمل ايه مع الاشكال ده ....انا عارف ان الفئه ده تصرفاتها كلها مش محسوبة و عشوائية و ممكن يرتكب جريمه فى لحظه
و لكن اذا استشعر الضعف و الاستكانه و ان كان بغرض البعد عن المشاكل فسوف تكون فريسه سهلة له......
مش عارف اقفل الموضوع ازاى بس خلوا بالكم من نفسكم .....

**Donzi** · 21-03-2012 05:51 PM

بصراحة الانواع دي البعد عنها غنيمة يعني الشاب دا ولا كان شوح ولا عمل اي حاجة و خاصة انه معاه سيدات و عمره ما هايعرف يتخانق و هما معاه

و لا ينزل من نفسوا و يدخل في حوار مع الاشكال دي اصلا لان الناس دي مهما قلتلها مابتفهمش اصلا يبقى الواحد يصون نفسوا و كرامته و مايتكلمش معاهم من اساسوا

**mahmoud_afifi** · 21-03-2012 06:01 PM

انا عارف الاشكال دي و الاول كنت بعديها بس في الاخر بقيت اقفلهم.
زي النهارده وانا بهدي عشان المطب, واحد ماشي على رجليه مش عاجبه اني بهدي عشان المطب وتقريبا عاوزني اطير من المطب عشان سعادته يعدي. المهم شفته بيشوح قمت واقفله و بعدين وشه قلب الوان !!
ربنا يرحمنا من العالم غريبة الاطوار دي
نصيحتي, ان لم تكن ذئباً .. اكلتك الذئاب.

**zangry** · 21-03-2012 06:27 PM

انا بمشى بخلى صوت الكاسيت عالى ولا بسمع اى حاجة

**ahmed_mido1889** · 21-03-2012 06:39 PM

الفئه دي طول ما انت راكب معاه ادعي عليه يقع في شر اعماله
واحد مره بيستعبط منهم وخبط في عربيه وعمل عبيط

كان في شرطه واقفه ساعتها الواد بتاع الاوتوبيس عمل عبيط قمتت

نازل من الاوتوبيس اركب اي حاجه تانيه وقولت للظابط سواق

الاوتوبيس غلطان وماشي يخبط في العربيات وتقريبا معهوش رخص

وخدت بعضي ويا فكيك بس الي شوفته قبل ما امشي انه اتنفخ من الظابط