محتاج مشورتكم قبل ما أشتري : جالكسي نوت

**الصيداح** · 23-03-2012 03:19 PM

سلام الله عليكم

كنت ناوي أشتري جالكسي نوت وكنت طالب من سيادتكم رأيكم في هذا الجهاز بصورة عامة

ولي بعض الإستفسارات يا ريت تفيدوني فيها الله يبارك فيكم

1- وأنا ببحث عنه في النت إكتشفت إن في حاجة إسمها
galaxy note at&t
وفيه
galaxy noteبس

إيه الفرق ما بينهم وهل هناك إختلاف في سعرهم؟

2- بالنسبة لألوان المحمول في الأبيض والأسمر فهل هناك إختلاف ما بينهم في المواصفات أم
فقط موضوع لون؟

3- كنا نسمع قبل ما نشتري نوكيا عن حوار المحمول ده فنلندي ولا لأ؟
هل يوجد مثل هذا الحوار في هذه الأجهزة ولا كله صناعة واحدة؟

4- لو فيه أي حاجة تنصحوني بها أو أخذ بالي منها قبل ما أشتريه ؟

وشكرا لكم جزيلا

**beshomilan** · 23-03-2012 07:06 PM

هرد على حضرتك بالتفصيل

هو كموبايل ممتاز جدا جدا

1 - الجالكسى نوت ال at&t ده بيكون مخصص للشبكة دى بمعنى ان ده اسم شبكة فى امريكا وبيكون نازل بعرض ليها مخصوص وده مش هتلاقيه فمصر
اللى هتلاقيه فكل مصر الجالكسى نوت العادى اللى هو n7000

2 - الموبايل ثابت فى المواصفات سواء ابيض او اسود مفيش اى اختلاف

3 - هتلاقى النوت كله made in vietnam by samsung وده عن اقتناء شخصى ومصر كلها كده ومفيهوش اى مشاكل لان ده مصنع سامسونج فى فيتنام وتحت اشرافهم

4 - اهم حاجة تشترى من مكان كويس ومضمون وليه اسمه وابعد عن عبد العزيز تماما

وارخص واضمن مكان بيبيعه التميمى فوسط البلد بعلبته مقفول من غير ضمان ب 4040 جنيه بس بضمان محل 14 يوم
بضمانه ب 4650 جنيه عنده

بس نصيحة اخويه انزل توكيل سامسونج وامسك الماكيت بتاعه فأيدك وحطه فجيبك وعلى ودانك وقرر هتجيبه ولا لا..لان حجمه هو المشكله

انا كنت بنام احلم بيه واشتريته وكنت متقبل حجمه لكن بعد ما اشتريته وجيت استعمله وامسكه فايدى وانه كبير عليا وخايف يقع على الارض لان الحواف بتاعته ملساء ودائريه فسهل الوقوع جدا

عايز اقول لحضرتك بعته بعدها بأسبوع من غير ما اعمل منه مكالمه واحده حتى بس جربت الاوبشن والماركت وكانوا جامدين وحتى مجربتش القلم..ومندمتش ابدا انى بعته بسبب حجمه
لانى هستنى الجالكسى s3 اللى نازل الشهر الجاى..ولو مش حابب تستنى فأنا شايف الجالكسى s2 ممتاز جدا اكتر منه

نصيحة تانى..اعمل اللى قولتلك عليه عشان متتصدمش من الحجم لو جبته ولقيته كبير بالنسبالك وتندم بعد ذلك

كل كلامى خاضع لتجربه شخصيه لكن فى ناس متقبله حجمه وشايفاه مناسب فالقرار ليك انت وبس

**الصيداح** · 23-03-2012 07:15 PM

الأخ beshomilan سلمت يمناك فعلا معلومات قيمة الله يبارك فيك
هي إن شاء الله حكاية كبر حجمه مش هتسببلي مشكله لأن ده أحد أهم الأسباب اللي أنا هجيبه علشانها
إنه يكون كبير الحجم بالمنظر ده

لكن فين توكيل سامسونج ده
وايه رأيك لو إشتريته من mobile shop غالي شوية حوالي 5000 بس مكان مضمون
معلش سؤال أخر أنا سمعت إن بطاريته بتخلص بسرعة هل هذا حقيقي أو حتى لو كانت كذلك هل بشكل يسترعى الإنتباه؟

وألف شكر لك يا غالي

**الصيداح** · 23-03-2012 07:29 PM

أنا دخلت شفت مواصفات الجالكسي s3
أنا أول مرة أسمع عنه منك بس مواصفاته جميلة جدا وفيه حاجات أفضل من النوت
إيه رأيك ؟
وهل هو موجود حاليا في مصر ؟
ويعمل حوالي كام؟

**beshomilan** · 23-03-2012 07:33 PM

المشاركة الأصلية كتبت بواسطة الصيداح

الأخ beshomilan سلمت يمناك فعلا معلومات قيمة الله يبارك فيك
هي إن شاء الله حكاية كبر حجمه مش هتسببلي مشكله لأن ده أحد أهم الأسباب اللي أنا هجيبه علشانها
إنه يكون كبير الحجم بالمنظر ده

لكن فين توكيل سامسونج ده
وايه رأيك لو إشتريته من mobile shop غالي شوية حوالي 5000 بس مكان مضمون
معلش سؤال أخر أنا سمعت إن بطاريته بتخلص بسرعة هل هذا حقيقي أو حتى لو كانت كذلك هل بشكل يسترعى الإنتباه؟

وألف شكر لك يا غالي

انا تحت امر حضرتك فى اى استفسار

توكيل سامسونج موجود فى كل مكان اعتقد بس بصراحة انا بتكلم على توكيل سامسونج فى شارع شبرا عند اول شبرا قدام بى تك ورايه..ده حاطط ماكيتات كتير لموبايلات

ونصيحتى ابعد عن موبايل شوب لانه غالى جدا بلا مبرر وهو الضمان اللى عنده هو هو نفس الضمان اللى عند التميمى اللى هو يونيون جروب..فأنت اول بالفرق ال 350 جنيه دول والاتنين واحد

البطاريه فحدود يوم او اقل حاجة بسيطة مع استخدم فوق المتوسط بقليل..اما الاستخدام المتوسط يادوبك تصمد للصبح وتموت وده حال كل الاندرويد لان خللى بالك الشاشه عشان حجمها كبير فبتاخد كتير جدا من البطاريه..ودى مشكله سامسونج للاسف..البطاريه
ومعروف النوكيا هو اقوى موبايل فى البطاريه

صحيح..موقع سوق عامل عرض على النوت ب 4000 بضمان سوق لمده سنه
بيع شراء الكترونيات ، هواتف، كمبيوتر، ملابس ، أحذية و المزيدصفقة اليوم

وعلى فكره بضمان زى من غير مش هتفرق وانا جبته من غير ضمان وكان زى الفل
فأنت وفر فلوسك اولى وهاته من موقع سوق ده وكمان بضمان وب 4000 وتبقى وفرت 1000 جنيه عن موبايل شوب و 650 جنيه عن التميمى

قرر وشوف حضرتك حابب ايه

**Karim_Monir** · 23-03-2012 07:36 PM

معيا من شهر تقريبا
تقبلت حجمة قدام امكانياتةوشاشتة الكبيرة
مابيقعش من ايدي عشان حطيتة في جراب رابر ضد الانزلاق والعرق
بطاريتة بتكفيني انا يوم بمكالماتي انا وتصفحي للنت
وايام تانية بروح البيت فيه فوق تلت البطارية
انا مابعملش اقل من 5 ساعات تليفونات في اليوم غير النت غير اني ساعات اشغله هوت سبوت للنوت بوك
الابيض فيه مكبرة قوي صعب جدا
فيتنامي افضل شوية من باي سامسونج اللي بيكون صيني والريفيوز بتقول في شوية مشاكل في السماعة
غير كدة مستمتع بيه والحمد لله

**الصيداح** · 23-03-2012 07:51 PM

أنا مشكور جدا للمتابعة الوافية من الإخوة الأكارم

بصراحة أنا شفت المواصفات اللي محتمل ينزل بيها الs3 ولقيتها حاجة تانية بصراحة
فإيه رأيكم أنتظر وأجيب الs3

**ahmedmohamed7** · 23-03-2012 08:03 PM

المشاركة الأصلية كتبت بواسطة الصيداح

أنا مشكور جدا للمتابعة الوافية من الإخوة الأكارم

بصراحة أنا شفت المواصفات اللي محتمل ينزل بيها الs3 ولقيتها حاجة تانية بصراحة
فإيه رأيكم أنتظر وأجيب الs3

السلام عليكم انا الصراحة ماكونتش اعرف ان سامسونج اعلنت عن ال اس 3 غير من كلام حضراتكم ....دخلت على جى اس مارينا و تنحت =) بروسيسور 1.5 كور تو كواد و رامات 1 جيجا و كاميرا 12 ميجا بيكسلز و الريسوليوشن اعلى من اس 2 و ال internal storage capacity تقريبا 32 جيجا بايت و طبعا معاه الايس كريم ساندوتش =) كاتبين انه هينزل فى الربع التالت من 2012 ان شاء الله...من راى حضرتك تستناه طبعا =) والف مبروك مقدما

**الصيداح** · 23-03-2012 08:06 PM

المشاركة الأصلية كتبت بواسطة ahmedmohamed7

السلام عليكم انا الصراحة ماكونتش اعرف ان سامسونج اعلنت عن ال اس 3 غير من كلام حضراتكم ....دخلت على جى اس مارينا و تنحت =) بروسيسور 1.5 كور تو كواد و رامات 1 جيجا و كاميرا 12 ميجا بيكسلز و الريسوليوشن اعلى من اس 2 و ال internal storage capacity تقريبا 32 جيجا بايت و طبعا معاه الايس كريم ساندوتش =) كاتبين انه هينزل فى الربع التالت من 2012 ان شاء الله...من راى حضرتك تستناه طبعا =) والف مبروك مقدما

ما هو بصراحة انا تنحت أنا كمان
إمكانيات ممتازة جدا غير اللي في النوت خالص
ربنا ييسر الحال شكلي كدة هستنى الs3