الموضوع: حاسس ان انا هعمل حادثة ! !

السلام عليكم ورحمة الله وبركاته

شاري العربية في 2007 يعني بقالي زيادة عن خمس سنين

لحد وقت قريب اوي ! كانت العربية فبريكة وزي الفل والحمد لله ماكنش فيها الهوا

وبمجرد اني بدات اعدل في شكل العربية بالاخص ركبتلها جنوط ! وشوية استيكرات

وبدات المصايب تنزل على العربية واحدة ورا التانية

بعد ماجنطت العربية بحوالي عشر ايام ترلا دخلت فيا بوظلتي الجمب الشمال

صلحتها ويدوب راجع بيها من عند السمكري اتوبيس خبطلي الجمب التاني

قلت معلش قضاء الله وقدر وعين والحمد لله على كل شئ

ومن ساعتها وانا حاسس ان العربية جت فيها عين ومش عايزة تسبها وفعلا بدات الخبطات تتالى خبطة ورا التانية !

جبت GPS ماكملش في العربية يومين وراح حرقلي الفيوزات كلها ! قلت معلش وهبقى اشحنه من الكومبيوتر بلاش اشحنه من الولاعة !

بعدها بمدة وقع اتكسر لحمت ال Holder بتاعه وظبطته ولسه من قريب لابس حفرة كسرته خالص !

قلت حصل خير مافيش مشكلة ومن ساعتها اسطوانة القران مش بتطلع من الكاسيت

بقرى كل الاذكار قبل ماتحرك بالعربية وبسمي الله واتوكل عليه وانا حاسس برضوا من جوايا اني فجاءة هلاقي حاجة خبطتني وانا ماشي او اي حاجة هتحصل !

ومافيش فايدة برضوا الخبطات مش عايزة تسبني ! كل شوية اما خبطة هنا او حكة هنا وبقول الحمد لله كلها امور بسيطة !

لحد من اسبوع تقريبا كنت راجع من مقابلة قسم تويوتا ومرة واحدة واحد بماروتي يرمي عليا الفرامل ماتجبنيش لبست فيه ! الخسائر كانت الاكصدام اتقطع واطبق والكساحة اللى حامية الماتور من تحت اتكسرت

طبعا ده كله زود احساس جوايا اني طول مانا ماشي هيحصل حاجة وان العين دي هتفضل ملازمة العربية لحد ماخبط خبطة تجيب اجلها ! بطلت اجري زي الاول وهديت عن الاول كتير

وبرضوا مازلت من جوايا حاسس اني فجاءة حتى وانا ماشي براحة هلاقي حاجة خبطتني !

النهارده البنزين خلص قلت انزل قبل الصلاة الصبح اروح احط بنزين وارجع

وانا راجع على المحور بدي Kick down اسمع صوت اكن حاجة اتشفطت او فيه تنفيث ! ومرة واحدة العربية تبطل !

طبعا انا كنت ماشي في وسط المحور وعلى سرعة 120-130 تقريبا

ومرة واحدة العربية تبطل والفرامل تبدا تحجر / الدركسيون مش عارف تتحكم فيه كويس الباور فصل ؟

مورت العربية في حال ومش عارف انا مورتها ليه بس انا ماكنتش عارف ايه اللى بيحصل

اديت انتظار والحمد لله ماكنش ورايا او جمبي عربيات وقدرت اركن العربية على جمب

حاولت كتير وكتير اني ادور العربية تاني مافيش فايدة ! طبعا كلها محاولات وسط حالة فظيعة من الرعب ! راكن على اليمين اه بس كل اللى جاي من ورا صواريخ ! !

خايف واحد غشيم ياخد غرزة يمين يلبس فيا !

فصلت البطارية / فصلت فلتر الهوا وركبتهم تاني العربية مافيش مش عايزة تدور

طبعا بهدلة مابعدها بهدلة ! فضلت مستني لحد ماكلمت الوالد جالي بالفيرنا وقطرناها

اثناء القطر طبعا العربية عندي الفرامل حجرت مش عارف ادوس فرامل ! فرامل الايد مش بتوقف العربية كل مايهدي بالفيرنا اقوم خابط فيه

الحمد لله عدت على خير لحد ماوصلنا البيت واكتشفت ان فيوز ال

EFI ضرب ! Electronic fuel injection !

ايه اللى خلاه يضرب الله واعلم ! ليه ومن ايه وليه السبب مش عارف

العربية حاليا مركونة في الجراش ومابقاش ليا نفس اركبها او بمعنى اخر حاسس ان المصيبة عمالة تقرب !

انا مش عارف ايه الحل ومش عارف اللى بيحصل ده ليه ؟ ؟ وهل ده طبيعي وبيحصل مع كل الناس ؟

صحيح الواحد معدل في شكل عربيته شوية بس مش للدرجة ! انا بشوف ناس بسم الله ماشاء الله عربياتهم شكلها احلى كتيير ومعمول فيها شغل اكتر بكتير << طبعا ربنا يباركلهم فيها مش القصد الحسد ابدا بس القصد اني مش عامل التعديلات اللى تستاهل كل العين دي ؟ ؟

مابقتش اركب العربية الا لما اشغل قران واقرى الاذكار ! مابقتش اجري زي الاول

بدوس لما الطريق يفتح ! وبقيت بقلق من الغرز ودايما حاسس اني هلبس وهخبط غرز على خفيف في المضمون لدرجة اني نسيت الغرز القطم بتتاخد ازاي ؟ ؟

حاسس اني بدات اتعقد او جالي حالة نفسية مش عارف

كتييير ابص للعربية واحس اكنها اخر مرة هشوفها فيها او اني بعد المشوار اللى انا فيه العربية هتدمر

حد عنده حلول او مقترحات ؟ لان فعلا كدة الوضع بالنسبة ليا بقى صعب اوي