أستلمت ال i10

**a_tantawy7** · 06-06-2008 09:30 PM

الحمد لله أستلمت ال i10 النهاردة من غبور(عمارات العبور.) وبجد نصايحكم كانت مفيدة جدا ليا و أنا بأستلم والصراحة الناس ذوق ومحترمين (يا رب دايما.). العربية ما شاء الله زي الفل. تعليقي الوحيد عليها أن التكييف شوية بيأثر علي السحب.
هأبدأ مشوار الترخيص بكرة بأذن الله.
سؤالي هو حد يعرف مرور بين السرايات ده فين باظبط؟(المفروض أختم جواب المبايعة من هناك.)
و أيه الاجراءات اللي بأعملها بعد كده عشان أرخص؟ (مرور مدينة نصر.)
وهل صحيح أنه مافيش نمر في مرور مدينة نصر؟ ولو مافيش طب أعمل ايه؟
أفيدونا ولكم الأجر و الثواب عند الله:)

**eng_nagwa** · 06-06-2008 10:36 PM

الف الف مبروك ... و ربنا يباركلك فيها :) ... لونها ايه بقى؟

**eng_mkhalaf** · 06-06-2008 10:37 PM

مبروك يا باشا وربنا يديك خيرها ويكفيك شرها
مرور بين السرايات من أحسن وحدات المرور فى مصر وهو موجود عند جامعة القاهرة ورا مقار إللى فى الدقى عند الكوبرى الخشب أو او تعرف محى الدين أبو العز أدى ضهرك لية والشارع إللى فى وشة عالطول - أوصل هناك وإلف من يدلك

**eng_nagwa** · 06-06-2008 10:39 PM

و يا ترى جبتها جميع الكماليات ولا هاف ؟ ... اصلى ان شاء الله هاجيبها فيا ريت اعرف منك تفاصيل اكتر عن الامكانيات :)

**YoussefMostafa** · 06-06-2008 10:42 PM

الف الف مبروووووووووووك

وربنا يباركلك فيها

**bassam nagy** · 06-06-2008 10:58 PM

الف الف مبروك وربنا يباركللك فيها ويديك خيرها ويكفيك شرها
اخر شارع التحرير الية فى الدقى من ناحية المترو

**a_tantawy7** · 06-06-2008 11:05 PM

المشاركة الأصلية كتبت بواسطة eng_nagwa

و يا ترى جبتها جميع الكماليات ولا هاف ؟ ... اصلى ان شاء الله هاجيبها فيا ريت اعرف منك تفاصيل اكتر عن الامكانيات :)

جبتها هاف أوبشنز(تكييف,باور,راديو سي دي) ولونها أسود لأن الهاف أبشنز بتنزل بأكصدامات سودا مش لون السيارة فقولت أجيبه سودا لون الاكصدامات:),ودي عاملة 59.900 في التوكيل.
اللون الفيراني بتاعها حلو برضه و الأحمر كمان.لو هاتجيبيها ألحقي لأن في حد في التوكيا قالي أنها هاتغلى على أول الشهر.

**a_tantawy7** · 06-06-2008 11:10 PM

المشاركة الأصلية كتبت بواسطة bassam nagy

الف الف مبروك وربنا يباركللك فيها ويديك خيرها ويكفيك شرها
اخر شارع التحرير الية فى الدقى من ناحية المترو

حضرتك قصدك ناحية البحوث كده ولا الناحية التانية؟
معلش أصل مش بأروح الناحية دي كتيرفمش حافظها أوي..

**eng_nagwa** · 06-06-2008 11:17 PM

متشكرة جداااااا على الاهتمام و الرد:) وان شاء الله هاروح فى اقرب فرصة ... بجد معلومة ان السعر هايغلى مهمه جدااا ... والف مبرووووووووووك مرة تانية و الله يباركللك فيها