الموضوع: سواقة ستات.. كفاية بأه.. ارحمونا

المشاركة الأصلية كتبت بواسطة MoToRiZeR

انا معاكي يا علا بس هقولك حاجة

الرجل المصري بيعتقد ان السواقة فيها جزء من العضلات لا بأس به يعني رجولية نوعا ما .. و ده تشوفيه من التزنيق و العفيجة و التشويح بالإيدين و يزنق بوز عربيته بالعافية و انا اللي اعدي الأول إلي أخر الاخلاق الواطية .. و عشان كدة هوا بيري ان المرأة ككأئن رقيق غير مهيأة انها تقعد ادام الدركسيون و بيتعامل معاهم علي انه "كتر خيره" انه سايبها في الشارع فا مبيستحملش منها اي غلطة

و عموما فيه بعض ال stereotypes في مصر زي :
- لو ست .. يبقي أكيد مبتعرفش تسوق
- لو سنك صغير .. يبقي ابوك جايبلك عربية تلعب بيها و الله يحرقك .. و لو حصل اي حاجة من غير ما اشوف اكيد انت الغلطان
- لو راجل كبير يبقي هتنقطني عشان اعدي
- لو سواق ميكروباص يبقي انت نص بني ادم
- لو سواق لوري تبقي افيونجي و بتنام و انت سايق
- لو سواق تاكسي تبقي حرامي .. شايفك و انت بتمون 80 يا واطي

و انا شايف انك تستوعبي الصورة كاملة بتفاصيلها .. ثم تشيليها من دماغك خالص و كأنها لم تكن و متسيبيش حد يحطك في تصنيف معين علي مزاجه .. يعني نفضي .. و اما تنزلي الشارع تعاملي معاه علي أنه فيلم هزلي تشاهديه و لكن لا تتأثري بيه .. و لو سمعتي كلمة بايخة من حد ولا نظرة مش اد كدة سيبك منه اكنه متخلف عقلياَ .. لأن كل واحد في الشارع بيعتقد ان الشارع شارعه و المفروض الناس تمشي علي مزاجه و ان هو الوحيد اللي بيعرف يسوق و معلم فيهم

يعني من الأخر .. كبري دماغك و اللي يتكلم يتكلم و اللي يشتم يشتم .. المهم انتي عارفة نفسك كويس

و بجد متحسسيس نفسك انك مرغمة عالسواقة لأنها متعة كبيرة و في بعض الأحيان مهدأة للأعصاب للغاية .. يا سلام عالسواقة عالمحور الساعة 2 بالليل مثلا .. شوفي كدة حاجات بتهدي اعصابك اعمليها كل شوية whatever works for you يعني .. عشان تعرفي تتعاملي مع الغابة بتاعة الصبح :)

و متعصبيش نفسك مفيش حاجة تستاهل يعني

كلامك مظبوط يا محمود.. و موضوع ال stereotypes ده شائع جدا في المجتمع المصري عموما. انا على فكرة بحاول أنفض تماما لكل من يحاول إشعاري بالنقص و انا سايقة.. انما على فكرة انا ضيقي مش من الناس اللي في الشارع على أد ماهو من الاتجاه العام الحاصل هنا في المنتدى من هجوم مستمر على سواقة الستات و ده بيخلق أجواء توتر مالهاش داعي.