سواقة ستات.. كفاية بأه.. ارحمونا

**OlaOsman** · 06-06-2008 10:50 PM

بسم الله الرحمن الرحيم و الحمد لله رب العالمين و الصلاة و السلام على أشرف المرسلين سيدنا محمد و على آله و صحبه و سلم.

بقالي في المنتدى هنا حوالي 6 أشهر و من ساعة ما سجلت و انا شايفة الموجة العدائية اللي حاصلة في المنتدى على سواقة الستات.. ممكن يكون لها ما يبررها، بس المشكلة هو ان ده ما هو إلا إنعكاس على اللي بيحصل في الشارع و انتشار نفس الموجة العدائية من قائدي السيارات من الرجال تجاه قائدات السيارات من النساء. و من وقت ما سجلت لحد دلوقتي و انا عايزة أعمل الموضوع ده، انما كنت بأجله لحد ما قلت أتوكل على الله و أنزل بيه لعل و عسى يعمل حاجة.

بتقولوا علينا ما بنعرفش نسوق..
بتقولوا علينا ماعندناش تقدير كويس للأبعاد..
بتقولوا علينا ردود فعلنا بطيئة..
بتقولوا علينا مش بنهتم بعربياتنا من صيانة و خلافه..
بتقولوا علينا ما اتعلمناش السواقة على أصولها..

ممكن يكون كل ده صح.. يبقى الحل دلوقتي ايه؟ بصراحة انا تعبت و زهقت و مليت من الانتقاد الكتير لسواقة الستات من غير ما حد يقدم حل.. بعد إذن الجميع اللي مش عاجبه سواقة الستات يتفضل و يقدم لهم اي حل.. انما انتقاد الأوضاع و التريقة على سواقة الستات باستمرار لمجرد التريقة و قضاء وقت ظريف بأت حاجة مملة و ماسخة

معلش يا جماعة أعذروني لو لهجتي حادة و عارفة انكوا ما اتعودتوش ده مني.. انما زي ما بيقولوا كده فاض الكيل

عايزة بس أقول حاجة لكل اللي مش عاجبه سواقة الستات و بيمشي في الشارع متأفف اوي لو قدامه ست او حصل خطأ من اي ست بيعمل أخطر منه كتير من الرجال.. باقول لهم و باتكلم عن نفسي و عن كتير زيي اننا لا غاويين سواقة و لا عاشقين شوارع المحروسة و لا واقعين في غرام الكلاكسات و بننتشي من صوت صرير العجل على الاسفلت.. كتير مننا نازلين يسوقوا في شوارع القاهرة العامرة مرغمين - و انا منهم طبعا - و السواقة بالنسبة لواحدة زيي ما هو إلا توتر للأعصاب بالتأكيد مش مستمتعة بيه.. انما البديل عن اني اسوق هو اني أتبهدل في المواصلات و الاتوبيسات و التاكسيات.. كله بهدلة في بهدلة و أكرم لي هو اني أروح مشاويري متصانة في عربيتي.. انما للأسف مش بلاقي من الرجال اللي سايقين معايا على نفس الطريق غير تصرفات عدائية في معظم الأحوال

الملفت للنظر بأه هو اننا لو بحثنا عن أصل المسألة هنلاقي ان المتسبب أصلا في ان عدد الستات اللي بيسوقوا بيزيد يوم بعد يوم همه الرجالة نفسهم.. يعني الواحدة لو بتركب وسيلة مواصلات فيها بني آدمين محترمين ما يتحرشوش بيها او لو ركبت مع سواقين تاكسي يخافوا الله أو ركاب ميكروباص ما يخترقوش جسدها بعينيهم و هي نازلة من الميكروباص.. لو لقت كل ده كان كتير جدا من الستات ما إضطروش انهم يسوقوا.. يعني فعلا حاجة تضحك و الله.. الرجالة همه المتسببين في نزول الست تسوق في الشارع و همه برضوا المتأففين من سواقتها

معلش انا طولت عليكوا بس هارجع تاني لأصل الموضوع.. بالله عليكوا يا رجال المنتدى و خارجه اللي متضايق اوي من سواقة الستات يشوفوا لهم حل.. غير كده هاكون سعيدة جدا لو ما شفتش في المنتدى هنا تاني موضوع مفتوح من حد بيشتم في سواقة الستات و باقي الإخوة يدخلوا يصدقوا على كلامه و يحكوا الأهوال اللي بتحصل لهم من سواقة الستات. طبعا ماحدش فوق النقد.. انما اللي يطرح مشكلة زي دي يا ريت يتكرم و يطرح حلول قابلة للتنفيذ او مع احترامي للجميع فليصمت

**hussein** · 06-06-2008 11:00 PM

انا عن نفسى مش بتضايق من سواقة الستات بالعكس هى ضروره و اغلب اللى هنا بيقولو كده من باب المزاح بس
اما اللى فى الشوارع دول فبيرخموا على الكل حتى اسألى عمنا توت عنخ امون :)
عموما متحوطيش فى دماغك علشان متتعبيش:)

**OlaOsman** · 06-06-2008 11:03 PM

المشاركة الأصلية كتبت بواسطة hussein

انا عن نفسى مش بتضايق من سواقة الستات بالعكس هى ضروره و اغلب اللى هنا بيقولو كده من باب المزاح بس
اما اللى فى الشوارع دول فبيرخموا على الكل حتى اسألى عمنا توت عنخ امون :)
عموما متحوطيش فى دماغك علشان متتعبيش:)

ماهو زي ما انت شايف يا أستاذ حسين انا فضلت كتير مش عايزة أكتب موضوع مخصوص عن الحكاية دي و باصبر نفسي انه من قبيل المزاح.. انما برضه كل شئ له حدود و الواحد بيتضايق من كتر الانتقاد حتى و لو على سبيل المزاح.

**aif** · 06-06-2008 11:07 PM

الحل بسيط يا علا
ان ارجال لازم يتأقلموا علي سواقة الستات ...
يعني انا مثلا لما الاقي واحدة ست سايقة قدامي ... لازم اتوقع منها اي شيئ ... ولازم قبل ما اعدي منها اتأكد كويس انها مش ناوية تحدف شمال او يمين فجأة .... ولازم انبهها اني ح اعدي جنبها ... مش آجي فجأة جنبها تروح هي مرتبكة وسايبه الدركسيون و دايسة علي كل حاجة في السيارة .... وهوووووب تروح لابسة في عربيتي ....
يعني اتعامل معهن بحرص شوية ....ولو لقيتها بتبصلي بقرف واشمئناط ... اطنش وامشي وكأنها بتبتسملي
ما هو الواحد برضه مش ح يغير الكون ... لزم يتأقلم معاه

**MoToRiZeR** · 06-06-2008 11:15 PM

انا عن نفسي اكره سواقة الستات كجزء متأصل في نفسيتي من كرهي لسواقة المصريين عموما .. الشخصية المصرية عموما بعيدا عن الرجالة و الستات تنقط .. لا عارفين يمشوا علي رجليهم ولا يقفوا في طابور صح .. عايزانهم يسوقوا بأخلاق كمان! صعب اوي ..

ممكن كمان 700 .. 800 الف سنة كدة قبل نهاية العالم بيومين الذوق ينزل اوبشن في شوارعنا

**OlaOsman** · 06-06-2008 11:19 PM

المشاركة الأصلية كتبت بواسطة MoToRiZeR

انا عن نفسي اكره سواقة الستات كجزء متأصل في نفسيتي من كرهي لسواقة المصريين عموما .. الشخصية المصرية عموما بعيدا عن الرجالة و الستات تنقط .. لا عارفين يمشوا علي رجليهم ولا يقفوا في طابور صح .. عايزانهم يسوقوا بأخلاق كمان! صعب اوي ..

ممكن كمان 700 .. 800 الف سنة كدة قبل نهاية العالم بيومين الذوق ينزل اوبشن في شوارعنا

حقك يا محمود تكره و تحب ما تشاء.. انما بالتأكيد مش هاتكون مبسوط لو كل شوية تسمع شتيمتك بودانك و انك بتعمل حاجة الكل شايف انك لا تصلح لها.. مع انك في نفس الوقت مرغم عليها.. و لا ايه؟

**SEATLOVER** · 06-06-2008 11:20 PM

طيب انا هاضحى بنفسى ..واشارك فى الموضوع دة و انتى منفعلة كدة وربنا يُستر

انا هارد على موضوعك بشوية اسئلة اتمنى انى اللاقى اجابة ليها منك و من السائقين السيدات
1-لية مصممين تتعاملوا مع العربية انها حتة حديد او صفيحة مركب بتنقل اغراض فقط
2-لية مش عايزين تتعلموا و تلقطوا السواقة وتقلدوا اللى بيعرف يسوق صح قدامكوا
3- لية عدم الاهتمام بعربيات الاخرين و اى حكة او خبطة ..معلش مفيش حاجة يعنى !!
4-لية مفيش اهتمام بعربياتكوا ..واى عربية استخدام سيدة ...بتبقى من ادوات المطبخ القديمة !!!
5-لية مش عايزين تعرفوا اى حاجة فى السواقة غير الفتيس و بالكتير اوى دراع الاشارة !!
6-لية كل اصول المشى فى الشارع بتقتصر عندكوا فى الانتقال من نقطة لاخرى عن طريق خط مستقيم !!!
7-لية بتحبوا عربيات كبيرة و انتوا مالكوش فيها !!!
8-لية بتعتبروا المشى بالعربية مايفرقش كتير عن المشى على الرجلين !!!!
9-لية بتعتبروا الكل مفروض يقدم فروض الولاء و الطاعة و يحمد ربنا انكوا نزلتوا تسوقوا فى الشارع !!
10-حجم الخساير و الهالك فى العربيات فى السوق بسببكوا بيزيد عن 40% من المستعمل ... دون اى تأثير عليكوا ..ومصرين على نفس الطريقة

فى ذيكوا رجالة صحيح بس
الفرق بينكوا و بين سواقة الرجالة ...انهم بيجوا عليهم زمن بيتصلحوا شوية انما
انتوا مُصرييييين على الطريقة دى

الحل :
فيكوا انتوا لا تصلحوا من نفسكوا و تطورا اسلوبكوا .... لا هايفضل الوضع كما هو علية ..وممكن يبقى اسواء

احنا بنقول كدة من باب الخوف عليكوا ... احنا الحمد الله بنعرف نخلص نفسنا منكوا لكن فى النهاية انتوا اللى مسئولين عن ارواحكوا و ارواح اللى معاكوا و خصوصاً الاطفال ...اللى بتجبوهم على التابلوة من فرملة من بتعكوا

الكلام مش موجة ليكى يا عُلا و لكن موجة لكل واحدة مُصرة على الطريقة دى فى ما يطلق علية مجازاً (سواقة )

والف شكر انك فتحتى الموضوع دة

**Ghamrawy** · 06-06-2008 11:27 PM

الموضوع بأه وباء ستات على رجالة
فعلا ما جتش عليكم ما الشعب كله بيسوق زى الزفت

**Mido80** · 06-06-2008 11:27 PM

المشاركة الأصلية كتبت بواسطة MoToRiZeR

انا عن نفسي اكره سواقة الستات كجزء متأصل في نفسيتي من كرهي لسواقة المصريين عموما .. الشخصية المصرية عموما بعيدا عن الرجالة و الستات تنقط .. لا عارفين يمشوا علي رجليهم ولا يقفوا في طابور صح .. عايزانهم يسوقوا بأخلاق كمان! صعب اوي ..

ممكن كمان 700 .. 800 الف سنة كدة قبل نهاية العالم بيومين الذوق ينزل اوبشن في شوارعنا

انا معاك في كل كلمة قلتها. فعلا سواقة الستات تنقط يعني تبص تلاقيها ماشية قدامك بسرعة 60 كم علي طريق السرعة فية 100 كم وتديها نور عشان تعديك ولا حياة لمن تنادي بل ممكن تشتمك وتديك كلمتين في اجنابك وعشان انت محترم لازم تسكت وتفوت.وخد عندك بقي من النوعية دي كتير
دة بالنسبة للستات عموما وليس المصريات فقط (شهادة احاسب عليها)
تعالي بقي لسواقة الرجالة المصريين، اقسم بالله انا كنت هاموت انا وأسرتي بسبب واحد مصري قطع عليا الطريق بغباوة ومس بس كدة، دانا لما بكلمة واقولة مش تحاسب قام يقل ادبة عليا. مش عارف نعمل اية بالظبط