الموضوع: حرب البوجيهات!!!

بعد السلام ومن غير كتر كلام

دخلت في تحدي مع البوجيهات والبنزين وكل الهم اللي ميتلم ده


البداية كانت باني غيرت طقم البوجيهات اول اما جيت من السفر عشان العربية كانت مركونه وحالتهم معجبتنيش

كانت اول الاعراض زنة في الكاسيت مع البنزين ودي بتبقى لان عزل البوجيهات وحش


ومن ثم الزنه بقت مقرفه

بالصدفه لقيت حد كاتب ان بوجيهات ان جي كي اللي في السوق بقا في مضروب كتير جدا

واثناء عملية التمحيص والتفحيص وكل ما هو هيص وبيص
لقيت على موقع ان جي كيه ازاي تفرق المضروب من الاصلي
شوفو الصور والفيديو

PLUG STUDIO / NGK

ومن ثم انا قلت ليكون البوجيهات اللي عندي مضروبه

مصدقتش خبر ونزلت للعربية
افك اول بوجيه .... شكله مضروب
اللي بعده مضروب
اللي بعده مضروب
اتضايقت

ألف وأسأل ياجدعان معقول ومش عارف ايه وازاي وليه

قلت ماشي خليهم دلوقتي واشوف هعمل ايه

طلعت البيت اقلب في الاكياس

لقيت 3 اطقم (9بوجيهات) قدام
واحد كنت ركبته 3 آلاف كيلو ومعجبنيش مع انه اقرب واحد للفبريكا (حيث ان الفبريكا بوجيهات كودها BPR5ES اما دول فكانو BPR6ES والفرق بينهم المفروض مش كبير

الاطقم التانيه اطقم قديمة من اللي كل الماروتيه مركبينهم اللي هوا BP6EY واحد منهم كنت مخليه لتنظيف الكربيراتير

المهم بقا انا رحت جبت الطقم الاولاني ونضفته بسرعه هوا كان نضيف اصلا وركبته

النتيجه الزنه راحت تماما الحمد لله

بس حاسس نفس الاحساس القديم انه مش مظبط العربية

توكلت على الله ونضفت طقم من بتوع الكربيراتير اللي بنظف بيهم وكانو فحمة سوده طبعا وهبقى احطلكم الصور

وظبطته وركبته والزنه فضلت مختفيه وصوت العربية احسن كل ده وانا مركبتش اللي اشتريتهم من كام يوم
خايف منهم الحقيقه

الشاهد ان فعلا في حرب في البوجيهات والواحد مش عارف يعمل ايه

هو مفيش في البلد دي حاجه مش بتضرب؟؟؟


انا قلت اجرب البوجيهات القديمه لاني متأكد انها اصلية ومعنديش شك لثانية فيهم
الجداد اللي جبتهم انا ان شاء الله واثق انهم ممتازين بس عايز اغيرهم في معاد معين مع الزيت عشان انا بحب الارقام الصحيحه فمواعيد الصيانه


هرفقلكم صور كمان شويه


تابعونا


تحيتي