الموضوع: ***سلبيات معرض اوتوماك اخبار اليوم (زيارة من الدرجة التالتة..) ***

السلام عليكم..

أولا احب اني اشكر الكبار.. كريم منير.. و احمد سامي .. علي الموضوع الشيق جدا و المفيد جدا..
اللي عملوه عن زيارة المعرض.. و عن الحماس الرهيب اللي بسوه في نفسنا اننا نروح و نتفرج...
و اكيد هاشكر نادر الكبير برضه.. علي التقرير المصور الاكثر من الرائع الي عمله عن المعرض..
ما شاء الله.. ده لو مصور او مندوب مجلة متخصصة مكانش عمل المجهود ده.. (تسلم ايدك يا نادر..)

انما هاحكيلكم عن السلبيات اللي هزتني قوي.. و حسستني بالفارق الكبير قوي.. بين معاملة المواطن السوبر..
او زيارة الفي اي بي في سياق كلامنا.. اللي دخل المقصورة..
و زيارة المواطن العادي جدا واللي دفع فلوس تذكرة.. ووقف في الطابور.. و دخل المعرض عشان يشوف معاملة اقل ما يقال عنها انها ليست بالقدر الكافي من الاحترام لزائر معرض مش صغير زي معرض اخبار اليوم..

أولا.. و لأول مرة في مصر من فترة طويلة جدا.. اشوف طابور دخول مكان.. و دي نقطة باعتبرها ايجابية جدا و لأقصي درجة..
أخيرا و لله الحمد الشعب المصري اتعلم يعني ايه طابور.. و يعني ايه التزام بقواعد حاجة ..

اكيد انا برضه روحت في وقت زي ما بنسميه.. Rush Hour
بس برضه.. التعامل ليه اصول.. المفروض لا يتم التنازل عنها مهما كانت الزحمة.. و الاقبال.
عموما هاقولكم ايه السلبيات اللي شوفتها و اللي ضايقني

اول حاجة.. الاستيكر اللي عاملينه ده عشان يبين اني زائر للمعرض.. او اني قطعت تذكرة..
مش فاهم..!!! هو في د هيكون دخل ناطط من فوق السور مثلا؟؟ او داخل من باب تاني و متنكر.. او لابس طاقية الاخفا..؟؟
انا مش معترض علي الفكرة.. مش بطالة..
لكن معترض علي البقعة اللي خلفها الاستيكر ده علي التيشرت او القميش او البنطلون او الطرحة اللي اتلزق عليها..
و اللي يمكن ناس كتير منكم ماخدتش بالها منها..

تاني حاجة.. الموديلز اللي الشركات جايباهم عشان يقفوا يتصوروا جنب العربيات..
هما في الحقيقة المفروض انهم واقفين واجهة للشركة.. يعني عشان يجاوبوا الناس عن الاسئلة .. و ده الغرض الاساسي..
لكن تعالوا نشوف كده..
اولا.. نسبة 70 % من الشركات موقفين بنات.. و نسبة اكبر من البنات دول.. لبسهم بصراحة.. اقل ما يقال عنه انه مش واقعي..
اللبش ملفت للنظر بدرجة كبيرة..
و عندنا بقي النكتة.. شركة جيلي تقريبا.. اللي جايبين بنات مش مصريات اصلا.. و اللبس بقي لا تعليق..
و مش بيتكلموا عربي اصلا..
طيب جايبينهم معرض اخبار اليوم في مصر ليه..؟؟ عشان شكلهم حلو..؟؟ و لبسهم **** و هيشدوا الناس انهم يقفوا يتفرجوا عليهم مش علي العربيات و يتكلموا معاهم و خلاص..؟؟ (هل هو ده الغرض من وجودهم في المعرض..؟؟)

غير كده و برضه بخصوص البنات..
يعني ابسط اللي المفروض يتعمل.. ان البنت او الدمية اللي واقفة دي تكون خافظة شوية بيانات عن العربية..
مش مجرد السعر و الكام حاجة الموجودين و خلاص..؟؟!!!
ابسط حاجة تكون عارفة بلد الصنع.. التكنولوجي اللي في العربية.. حتي باقي المواصفات تكون عارفاها او حافظاها..
بلاش حافظاها.. تكون مكتوبة معاها في بروشور او ورقة و تقرا منها. و متقولش ماعرفش ولا متفتيش..

ده لا يمنع ان في منهم في مستوي بصراحة جيد جدا. و اضرب مثال علي كده اللي واقفين في جناح دايهاتسو.. كانوا في منتهي الكفاءة..
تحس من كلامها.. انها مذاكرة العربية كويس.. عارفة هي بتقول ايه.. و بتفرجك بنفسها..مش بتسيبك تقعد و تقوم و تمشي و خلاص..
لأ تركب انت و هي تقولك فيها كذا و كذا و كذا.. بصراحة احييهم..

تاني نقطة سلبية..
سوء معاملة بعض المندوبين او مش عارف اسمهم ايه يعني اللي واقفين جنب العربيات..
و انا باقول تاني بعض.. مش كل بصراحة..
و هاخص بالمثال.. مندوبي شركة بريليانس.. اللي بصراحة كان هاين عليا ازعق و اشتم كمان وانا باتكلم معاه..
أولا.. سابني و مشي مرتين..و ثانيا.. في عربيتين لسة جداد موجودين.. باسأل العربيات مقفولة.. يقولي العربيات دي ديمو..
يعني مش للبيع لسة.. الشركة منزلاهم كده و راجعين تاني.. يعني ايه..؟؟!!! يعني الفرجة من برة فقط..؟؟
بلاش دي.. باسأل واحدة تانية موجودة برضه زميلة الاخ السابق ذكره.. تقول اصل الدنيا زحمة.. اسنتني 10 دقايق كده و هتتفتح تاني..
يعني ايه..؟؟ يعني منين مفتوحجة او بتتفتح. و منيم ديمو و مش هتتفتح..؟؟
و اديني امارة حتي علي الاقل.. انت مين يعني..؟؟ بي ام دبليو مثلا..؟؟
انت شركة عربيات صيني و تعبانة كمان.. هتتعامل معايا انا اللي دافع فلوس بالطريقة دي..؟؟

تستغرب للوضع.. هل انا اللي باشتغل عنده..؟؟
هل انا داخل المعرض ده تسول مثلا.. او رايح اطلب منه حسنه انه يفرجني علي عربيته..؟؟
طيب فيراري لما عملوا كده مش هنقول حاجة.. عربيات خايفين عليها.. و عربيات بملايين..
ولو اني مش بادافع عنهم.. عشان معرض يعني عربيات للعرض.. و العرض مش برة بس..
بس ما علينا..الناس كانت حوالين الفيراري.. اعداد غفيرة.. لكن اسف يعني.. بريليانس ايه اللي تقولي زحنه..؟؟!!!!

نيجي لتالت نقطة سلبية جدا..
اجنحة الشركات اللي قافلة العربيات بتاعتها؟.؟.!!!
يعني الشركة مكلفة نفسها و جايبة عربيات من المعارض للمعرض ده.. عشان الناس تتفرج علي شكلها من برة و تمشي..؟؟
ما اكتر المواقع و صور العربيات علي النت..!!!
ايه الفايدة من كده..؟؟ و المصيبة انهم لما تسأل واحد يقولك البوليسي بتاعت الشركة.. (سياسة الشركة..)
و التانية تقولك اصل العربية فيها حاجات باظت..
الموضوع ده خلاني بالعند بقي.. عندت مع اكتر من واحد,, و اتكلمت بطريقة بايخة..
و رخمت علي ناس لحد ما فتحولي العربيات..و هاقولكم امثلة..
- أولا.. اودي.. باسأل الشاب اللي واقف جنب العربيات لابس بدلة.. العربيات مقفولة..؟؟
قاللي ايوة .. ليه.. عشان دي سياسة الشركة.. يغعني ايه..؟؟ قاللي هو كده..
طيب في اول يوم الفي اي بي.. قالي ايوة اول يوم بس.. قولت طيب و مشيت.. قولت هي الاوامر جت ليه كده.. مالوش ذنب..
لكن بعد دقايق وانا واقف في نفس الجناح.. ييجي واحد تاني معاه مقتاح و فتح العربية و فرجها لواحد,, قفولتله استني بقي..
ده بقي مين..؟؟ مش واحد زائر زينا..؟؟ يبقي انا كمان عايز اتفرج.. وانا مش هاشتري.. بس عايز اشوف العربية من جوة..
و بالفعل فتح العربية و اتفرجت عليها و مشيت..و اول ما نزلت سمعت صوت علي كده من واحد زميله و مش فاكر قاله ايه..
انا ماهتمتش و مشيت..
- مثال كمان.. جاجوار..
اكيد هتقولولي انت مين يعني عشان تتفرج عليها من جوة و تركبهعا.. ماشي.. مع اني دافع فلوس عشان اتفرج علي كل عربية.. بس مش مشكلة دي.. بس لما تلاقي ان في استثناءات..؟؟
يعني مقلا.. حازم امام كان هناك.. راجل انا باعشقه.. و باحب ادبه و احترامه و تواضعه الجم.. لكن اسف يعني..
ليه هو تتفتح ليه العربية يركبها و يتفرج عليها.. و احجنا يتقال لينا لأ ممنوع و مينفعش..؟؟
مثال تاني هناك برضه في نفس الجناح.. العربيات المقفولة.. لقينا و الاستغراب مالي دماغنا..
الراجل بتاع المعرض اصلا.. راكب العربية.. عادي.. مفيش مشكلة لد هنا..
لكن لفت نظرنا حركة في الكنبة اللي ورا.. واذا بينا نلاقي اطفال.. والله اطفال.. و بياكلوا فشار.. و بيشربوا مشوربات.. بدون ذكر اسامي..
جوة العربية.. طيب بالله عليك قوللي.. مين هيحافظ علي عربية زي دي اكتر..؟؟ واحد بيركب علي الكرسي قدام.. يتفرج نص دقيقة و يقوم..؟؟ ولا طفل صغير بياكل و يشرب في العغربية..؟؟ لا تعليق..

مقال كمان..ميني..
روحنا نتفرج,لقينا كل العربيات مقفولة.. سألت بنت من اللي كانوا قاعدين علي الكونتر.. ..
قالت المفتاح معايا.. انهي عربية كذا.. طيب ودي .. لآ مش معايا.. طيب دي مش معايا..
قولت مش مهم.. اللي مفتاحها كان معاها كانت الكابروليه.,. اجملهم يعني.. و بعد غتاتة عشان تيجي تفتح العربية.. جت و فتحت..
وهي متضررة.. طيب ليه..؟؟ ده شغلك.. وواجبك.. و العربية دي جاية المعرض عشانا لناس تتفرج و تشوفها..و تركبها و تدورها كمان..
مش تفرج عليها من برة و تمشي..

مثال كمان.. بس ام دبليو..
كل العربيات مقفولة.. تقول نفتح يقولك لأ.,, ممنوع..
و الاوحش كمان.. البي ام الاكس 6 كان في واحد معاه طفلين بيتفرجوا عليها من برة..
وواحد م الاطفال طلع برجله علي العتبة اللي تحت الباب.. واذا بينا نسمع صوت زعيق شديد قوي..
للولد ولولالده.... طيب الولد عمل ايه يعني..؟؟ ده لو داس برجله علي سجادةصلاة.. مش هتقول كده..
و بعدين العتبة دي يعني ححديد.. و مصممة انها تشيل وزن واحد وزنه 150 كم يقف عليها و مش هتكسر ولا تقع..
حصل ايه لما ولد كلع عليها..
و ازاي واحد مندوب في بي ام دبليو يزعق بالصوت ده و الطريقة دي في حد..
حتي لو كان في احد المندوبين زملاؤه..؟؟ هو احنا واقفين فين..؟؟ سوق خضار ولا سويقة ؟؟
عيب لما منظر زي ده يحصل في جناح زي ده..
مثال كمان..؟؟ مرسيدس..
طل العربيات مقفولة كالعادة..
لما حد بيكطلب اوقات بيتفتح و اوقات لأ.. ولما اتفتحت.. الراجل دخل قعد جوة و اللي بيِسأله معاه..
وفضول جوة ييجي 10 دقايق بدون مبالغة.. و بعد كده نزلوا و قفلها و مشي.. تنده ولا متندهش مش بيرد و مشي ..
لكن اي حد كده..؟؟ انت اتجننت ولا ايه..؟؟ انت مش عارف انت بتكلم مين..؟؟ انا مندوب مرسيدس يا ***..
اكيد مش كده..!!!!
كمان مثال خلاني انفجرت في البنات اللي واقفين..
تويوتا..
عايز اتفرج علي الاف جي كروزر من جوة..اسأل المفتاح مع مين.. يلقفوني لبعض .. لحد ما جت اللي ردت عليا تقولي معلش مش هينفع تتفتح..
ليه .. عشان كانت مفتوحه امبارح.. و من كتر الناس ما ركبت.. قي حاجات باظت.. و اتكسرت..
ايه ده..؟ ايه الكلام ده..؟؟ قولتلها انتي عارفة بتتكلمي علي انهي عربية..؟؟ مش ياريس ولا كورولا..
دي عربية نازلة زي الهامر كده.. يعني تتنطط في الجبل و ترقع و تتروع و ميجرالهاش حاجة..
تقوليلي في يوم ايه باظ و ايه اتكسر..؟؟ طيب قولي اتخلع هاقولك ممكن.. لكن اتكسر دي.. صعبة شويتين 3 يمكن 4 كمان..!!!
المهم ماتكلمتش كتير و مشيت روحت لي اللي بعدها.. الاقي اللاند كروزر حبيبتي.. اوقها تفتح,, واحدة تانية يعني.. تقولي معلش اصل
الباب اوتوماتيك.. و من كتر الفتح و القفل.. البطارية نامت..
انفجار تاني بقي..
قولتلها ايه اللي انتي بتقوليه ده..؟؟ انتي بتكلمي عيل عنده 3 سنين..؟؟ ايه اللي واحدة فيكم تقولي ايه اتخلع و اتكسر.. و التانية بطارية نامت.. انتو فاكرين اللي بتقولوه ده لكلام صح..؟؟ انتو كده بتعملوا دعاية سيئة جدا للعربية.. ايه التخريف ده..؟؟؟
جملة من الاسف و معلش و مش معلش.. عندك حق بس هو الزحام و الاقبال .....
قولتلها يبقي تقولي كده.. مش تتحججي بكلام فارغ ميلعش من واحدة في الابتدائية..

مقال كمان..؟؟ الفيراري..
قافلين المكان حوالين العربيات..و ممنوع الدخول..
طيب حتي يتنمنع الطلوع علي الدرجة اللي عليها العربية..
بس ادخل الف حواليها.. اتفرج.. انا مشوفتش حتي ضهر العربيات..
بمنتهي اللباقة.. معلش احنا اسفين.. 10 دقايقة كده عشان الزحمة و ممكن تيجي..
ممكن تيجي الصبح بين الساعة 11 و 12 مش بنكون لسة جينا.. اتفرج براحتك..
(بالذمة ده مكلام تقوله واحدة بتشتغل دعاية لوكيل فيراري..؟؟)

علي النقيد بقي.. احترمت قوي شركة زي هوندا.. اللي سايبة عربياتها كلها مفتوحة.. اللي عايز يتفرج يتفرج..
حتي الاكورد اللي تمنها 415 الف جنيه مفتوحه.. واي حد يركب و يشوف.. مش حتي يطلب مفتاح عشان يتفرج..
و اغلي الشركات كانت عاملة كده.. و كانت كويسة جدا.. الا الكام شركة اللي عملوا المواقف البايخة دي اللي قولت عليهم..

الخلاصة..ّّّّ!!!!!!!!!!!!!!
-----------------------
لو كان ليا عمر.. و روحت معرض عربيات تاني..
اروح في يوم الفي اي بي باي طريقة.. ولو حتي دفعت فلوس كتير في الدعوة دي من اي مكان..
يا اما اروح تاني يوم بعد الفي اي بي علي طول.. و تروح بالنهار.. الصبح يعني قبل الزحمة..
و متخافش من اي حد يقولك عربيات مقفولة و مفتوحةى....
لو مرضيش.. قوله فين مديرك,, و اتكلم معاه.. و اتكلم باسلوب يخوف..عشان يقلق منك..
حاول في الكلام مع المندوبين دول.. انك توقعه في الغلط.. عشان لو حصل.. هيفضل يعتذر ليك..
و هيعمل ليك اللي انت عايزه..

(وهارجع للكلمة اللي كانت حاططها في الاعلان.. الدرجة التالتة.. زظي جمهور الدرجة التالتة.. في المتشات..انسان عادي..
مش من نوعيه مش عارف انت بتكلم مين.. المندوب اللي واقف هيقولك اي كلام و خلاص.. مش هيحترم عقليتك حتي..
بيزحلقك باي كلام و اي حجج.. الزحام برضه ليه عامل .. بس المفروض انهم يكونوا مدربين علي كده.. انا فعلا من كتر ما كنت مخنوق قوي من المعاملة دي.. فكرت اني اتكلم مع توكيلات العربيت اللي كانوا عارضين في المعرض و كانوا عاملين الحركات البايخة دي..
و اشتكي. واقول دي مش ريقة .. دي واجهه للشركة.. دي سمعه شركة.. دي دعاية شركة.. عشان الناس دي مش بتهتم غير لما الموضوع يكبر و يمس الدعاية.. هنا و تلالاقي المعاملة اتغيرت.. و كأنك بقيت واحد تاني و تتعامل كإنسان مش واحد رايح يتسول منهم انهم يفرجوك علي عربياتهم..)

انا اسف جدا علي الموضوع الطويل جدا ده.. بس فعلا من كتر ما انا مخنوق.. قفولت لازم احكيلكم علي الكلام ده..
عشان الليي رايح يعمل حسابه علي الكلام ده.. و اللي مش رايح.. والله احين انه مراش.. اي نعم فاته شوية حاجات جامدة جدا.. بس برضه.. علي الاق الصور اهو شافها.. و تعليق جامد كم الناس.. و مشافش المعاملة البايخة.. من بعد المندوبين..

عموما.. اسف جدا مرة تانية علي الاطالة.. بس حبيت اكون امين في عرض المساوء اللس شوفتها..
عشان لو اتكررت.. لازم يكون في وقفة من نايل موتورز.. عشان كده مش صح..

مشكور أحمد على الموضوع الجامد دة بس ممكن أقول
1- معرض الأهرام حت فى يوم الفى إى بى كانت عربيات كتيرة مقفولة
2- أحنا كمصرين معندش إى شىء من أحترام ملكيات الأخرين فأنا لو صاحب توكيل وعندى عربية غالية الصفوة بس هما إللى ممكن يشتروها - حطها منظر بس فى المعرض لأنى مش منتظر إى حد من زوار المعرض أنة يشتريها ويبقى كتر خير الدنيا أنهم يشفوها من برة
3- ولو حصل وجالى شخصية مهمة وممكن تشتريها - زى موضوع حازم أمام - هفتحها طبعا لية وهغرية بجميع المقياس - لكن يجيلىحد وشكلة ميجيبشى ويقولى أتفرج عليها طبعا مش هوافق لأن كل الطابور هيبقى عايز زية
4- أنا زورت معارض كتير فى أيطاليا وألمانيا وبيلاروسيا وتايوان والصين وعربيات كتيرة بتبقى مقفولة ومحدش بيقرب والناس هناك فهمة كدة وكلة بيصور وخلاص
5- وأخيرا أحب أضيف أحنا بنروح المعرض مش علشان نقعد جوة العربية ونمسك الدريكسيون والقتيس ونقعد نعيش اللحظة لكن لأخد فكرة سريعة عن الموديلات المتوفرة فى السوق للمساعدة فى أتخاذ القرار وبعد كدة بحط عينى على كذا موديل وبروح اتلوكيل بتاعهم وساعتها هيعيش وهنام جوة العربية ومحدش يقدر يقولك حاجة - يعنى انت لو روحت توكيل فيرارى أضمن ليك 100% أنك هتقعد جوة العربية مش هتتفرج عليها من برة
*** موضوع الراجل إللى زعق فى العيل دة أنا لو مكان أبو الواد كنت خربت الدنيا على التوكيل دة - وفعلا قلة زوق - بس انا بلوم الراجل إللى جايب عيالة أولا مش هيعرف يتفرج والواد ممكن يتوة منة فى الزحمة وملوشى لازمة خالص العيل يروح أحنا مش رايحين جنانية الأسماك أو الحيوان أو حتى معرض الكتاب دة معرض سيارات يعنى ملوشى لازمة حتى مراتى تيجى :)