الموضوع: عايز اسافر المنصورة

حسب خبرتي ف المنصوره ( روحتها مرتين بس لفيتها كلها تقريبا :d ) انت عايز تروح فين بالظبط ؟
المنصوره عباره عن شارع واحد رئيسي و حواليه شوارع صغيره متفرعه

انا كنت بسافر من موقف العبور و كان بياخد حوالي ساعه علي الاقل
يمكن احسن وقت انك تسافر الصبح بدري الساعه 7 كدا و لو قدرت تروح قبل كدا كمان يبقى احسن
يوم الخميس بيبقى الموقف بالضرب بعد الضهر لان ناس كتير جدا بيرجعو بلادهم ف الاقاليم

طبعا فيه محطات كتير هاتسمعها ف السكه و اخرها المكروباص هاينزلك الموقف الجديد و دا برا المنصوره
ف اعرف انت هاتنزل فين قبل ما تمشي و فهم السواق

انزل هناك و خد اجدعها تاكسي يلف بيك البلد ب 2 جنيه :d

فى سوبر جيت فى رمسيس كمان "اسمه موقف القللى تقريبا " جنب القسم

السلام عليكم و رحمة الله و بركاته

أنا هقولك نصيحتى و أنت حر تماما جدا خاااااااااااااااالص:

أفضل حاجة تروح و تيجى بيها من و الى المنصورة فى الوقت الراهن و بالمقارنة بالأوضاع السيئة اللى فى البلد و حالة الطريق الزبالة من أول بنها و حتى المنصورة و عربيتك الخاصة و لا الميكروباص و لا حتى الأتوبيس اللى أكيييييييييييييييد هيقف بيك فى المؤسسة بتاع ساعتين على الأقل على مايطلع من الحتة الزنقة دى, هو القطااااااااااااااار ب 14 جنيه رايح و زيهم جاى و اركب الدرجة التانية مكيف زى الباشا و أنت رايح و جاى.

أنا من المنصورة و ياااااااااااااااااما سافرت من المنصورة الى القاهرة بالقطار و فى رمضان اللى فات ده, سافرت يوم و يوم من المنصورة الى القاهرة و العودة عشان كان عندى كورسات فى الأميديست, كنت بسافر بالقطار من المنصورة الى القاهرة , كنت بحس أنى مش مسافر, بيكون معايا كتاب و لا جرنان و لا مخزن كام فيلم على الموبايل و بدلع نفسى و كنت بنزل فى المؤسسة و بنط فى المترو من أوله لحااااااااااد الدقى و العيشة دلع الدلع و كنت برجع بأه فى الزفت الميكروباص, كنت بوصل بيتنا فى المنصورة ماببقاش طايق نفسى و بيبقى هاين عليا لو حد قاللى سلاموا عليكم, أتف فى خلقته و العياذ بالله, كنت بتفق مع أمى, أنى فى اليوم ده بالذات تخاصمنى و ماتكلمنيش خااااااااااااالص, بدل ماخرج عن شعودى و أغلط فيها و دى أمى مش أى حد, شفت بأه لدرجة ايه !!!!!!!!!.

القطار أكيد مش أعظم و لا أفخم حاجة, بس أكيد أحسن من الmercedes s500 مو 2012 لو بتجرى عالطريق.

أنت عاوز أحسن الوحشين, مش كده, أنا أحلفلك بالله العظيم, أنه القطااااااااااااار, أدام لا معاك شيل و لا أسرة و لا بتاع, يبقى القطااااااااااااار.

احجز الذهاب و العودة من عندك من القاهرة قبل السفر ب24 ساعة عشان تلاقى أماكن.

القطار نادرا مابيتعطل, لكن أسهل حاجة فى الدنيا دلوقتى أن الطريق يتقفل بال4-5 ساعات و من غير مايتقفل, هو زحمة أصلا, تبقى عاوز تلف و ترجع بيتكم و مش عارف لا ترجع بيتكم و لا تكمل لحد الحتة اللى أنت رايحها.

بالسلامة ان شاء الله.

السوبر جت احسن مواصله للمنصورة

سوبرجيت من موقف القللى موجود من الساعه 6 مساء كل نص ساعه اتوبيس

السلام عليكم و رحمة الله و بركاته

مع احترامى لآراء كل الأخوة الأفاضل.

كراسى القطار أريح بكتير أوى من السوبرجيت و المسافة بين الكرسى و الكرسى اللى أودامه كبيرة و كمان السوبر جيت بيمشى على الأسفلت, يعنى لو الطريق زحمة و لا واقف هيقف زيه زى أى عربية و هيبقى التوكتوك أحسن منه لأنه هيقدر يسلك طريقه.

أنا عن نفسى, قفلة الطريق و أنت مزنوق جوه الأتوبيس و لا العربية, تخليك تكره نفسك, القطار بياخد المسافة فى ساعتين و نص على مافتكر, مستحيييييييييييييييل أى مواصلة بتمشى على الأسفلت تاخدها فى أقل من كده, الا بأه لو مسافر الساعة 4 الفجر.

أنا بتكلم عن المواصلة اللى توصل, مش المواصلة اللى شكلها حلو و فيها فيديو.

و الرأى الأول و الأخير ليك طبعا.

لو هتروح بالعربية او السوبر جيت او الميكروباص ، ابعد عن الطريق الزراعى بتاع ميت غمر لان الطريق زفت و بيسفلتوا الطريق فى عز الظهر