الموضوع: تقاطع محور الشهيد مع طريق المقطم المشكلة والحل

نتيجه مروري يوميا من المقطم الي التجمع الخامس والعكس بشوف مشاكل حلها سهل جدا وياريت حد يوصل كلامنا للادارة الهندسية للقوات المسلحة لو هي المسئوله عن محور الشهيد..او للجهة المسئوله لحل ازمات المرور بالقاهرة.....
ونبداء:-
1- اللي نازل من نهايه شارع 9 بعد دار رسالة علي شمالك في نهايه الشارع نصه متسفلت والنص التاني مكسر مش عارف ليه ماتسفلتش بعد ازاله الاسفلت القديم وتجهيزة لوضع طبقة جديدة تم تركه مكسر من حوالي 8 شهور الي الان, مش ديه المشكله لكن المشكله في التقاطع مابين اللي جاي من م نصر محور الشهيد مع اللي خارج من اخر ش 9 مافيش مرور ومافيش مطب يخليه يهدي قبل التقاطع فيحدث ما لا يحمد عقباه وده بيعطل الخروج من نهايه الشارع لسرعة القادم من م نصر .
الحل انه يعمل مطب للقادم من م نصر قبل تقاطع طريق المقطم مباشرة

2- جيشنا العظيم قام بحل ممتاز بمحورالشهيد بس صعب شويه علي المصريين وهو انه لغي التقاطع للي جاي من ش 9 وداخل علي محور الشهيد شمال اتجاه م نصر وعمل الاتجاه اجباري يمين لمسافة 900 متر مش مشكله مع انه كاتب يوترن بعد 300 متر وعمل اليوترن علي منتصف المطلع وهو عالي جدا فامعظم سيارات السرفيس وبلطجيه السواقه بيكسل انه يطلع المطلع ويمشي 900 متر رايح وزيهم راجع علشان يدخل في الاتجاه اللي هو عاوزه فابيمشي عكس وش في الوش مع اللي جاي سريع من م نصر ويحدث مالا يحمد عقباه وكثيرا اشوف عربيات عامله حادثة وش في الوش او يطير جنب لواحد مالوش ذنب نتيجة ان في ناس مابتحترمش القانون(طب ماهو لازم يكون في تسهيل شويه مش علشان اعكس اتجاهي اطلع مطلع عالي جداا واعمل عليه يوترن وانزل تاني ) الملتزمين مافيش مشكله لكن البلطجية الموضوع صعب عليهم
الحل: انه يعمل اليوترن قبل المطلع بمسافة حوالي 300الي 500 متر من بعد التقاطع بحيث يكون اليوترن قبل المطلع علشان ماحدش يكون عنده حجة انه يطلع مطلع عالي علشان يغير اتجاه
ثانيا علشان ماحدش بعد كده يمشي عكس . المطب اللي قولنا عليه للقادم من م نصر قبل تقاطع المقطم يكون مطب معدنى ذو اتجاه واحد (بيكون بمفصله محوريه من المنتصف ويكون مدبب بسنون للأتجاه العكسي وبيكون مطب عادي لتهديه السرعة للقادم في الاتجاه الصحيح ) بحيث اي بلطجي بعد كده يحب يمش عكس يضحي بفردتين كاوتش او اربعه هو وناصيبه مع وضح التحذيرات طبعا للماشي عكس وقد اعذر من انذر وياريت الموضوع ده يتعمم في المناطق اللي العربيات غاويه تمشي عكس والمطب ده بيتصنع من زمان وبجيب نتيجة ممتازة في الكومبوند والقري السياحية مستحيل حد يمشي عكس
3- اللي جاي من نفق القطامية محور الشهيد ومتجه الي المقطم مافيش يوترن عكس للدخول شمال لطريق المقطم ماهو الا قطع في الرصيف (عرض الرصيف 50 سم تقريبا ) بناء عليه لما الواحد يعمل يوترن للاتجاه العكسي بيقطع الطريق تماما في الاتجاه التاني وممكن تقف فتره علشان تعرف تلف العكس لان كل اللي جاي طاير
الحل: عمل يوترن بتصميم هندسي وبعرض جزيرة مناسب بيحث لا يعوق القادم من م نصر مع توسيع الشارع في الناحية اليمين للقادم من م نصر باالاخذ من رصيف الوحده العسكرية (الرصيف عرضه حوالي 15متر) هناخد 5 متر بس لتعويض زياده جزيرة الطريق لعمل اليوترن حتي لا يتأثر عرض الشارع الرئيسي.

وشكرا
............

فعلا دى مشكله بقابلها كل يوووم ولازم يبقى ليها حل فورى
دليل المقطم