الموضوع: هو محلات شرايط الكاسيت أختفت فين ؟؟؟

مساء الخير جميعا ياشباب
انا عمال الف القاهرة على محل شرايط كاسيت مش لاقي
حتى المحل المشهور الي في ميدان لبنان عن جلاتي عزة قفل
رحت فيرجن في سيتي ستار لقيت كل الي عندو CD الله طيب والي عندو كاسيت الفبريكة بتاع عربيتو يعمل فيه ايه... ومحدش يقلي هات مشغل ام بي ثري بتاع الولاعة
لأن بيبقى فيه اغاني كتير وتقعد تتوه في 150 ولا 200 اغنية
يا أخي بقيت تفتقد متعة القيادة ومتعة الاستماع لشرايط الكاسيت ... حتى الراديو بقة فيه لوك لوك كتير ورغي ... وسوزي بتمسي على وائل ... وحماده بيسلم على نفين وبيقلها انا بحبك قوووووووي طيب وانا كمستمع وانا مال أهلي بوائل ونفين وأحمد وسوزي ... حاجة تحرق الدم بجد .
وتلاقي برامج بتاعت العيال الهايفة ... بتاعت أي كلام في أي كلام يتكلمو شوية عن الحب والمسخرة ... وهوبااااااا يخوشو يشتمو في المجلس العسكري والحكومة والاخوان والسلفين وفاصل ونعود ... وبعدين مروة ومنى بتمسي على رامي وانتا فين ياوحش بقالك كتير مابتكلمنيش ,,, وهبه يتكلمو عن حال البلد ويشتمو في الاخوان والسلفين والمجلس العسكري ... ويبثو السم في أذن المستمع من غير مايحس ويقومو الشباب ويسخنوهم أكتر وأكتر ... وتلاقي الشباب الصغيرة تنزل ... تولع وتحرق أم البلد .

وأذاعات تانية بتلاقي راجل كده من أيام سيد أبو حفيظة عمال يتكلم عن أهمية تشكيل وقواعد اللغة العربية عن كتاب البحصلي ... في معجم اعراب ابن تيمية .

بجد راديو يحرق الدم ... المهم انا اعمل ايه في الكاسيت اليباني بتاع العربية ايه أولع فيه وهو بتاع الفبريكة ...

طيب هما لغو الشرايط الكاسيت ليه ؟؟؟؟؟؟؟؟؟
هيا ثبت انو عليها ضرر على البيئة ولا بتسبب السلطان زي كل حاجة في دنيتنا ... وبعدين كانت الشرايط الكاسيت بتتباع ب 6 جنية واخر فل وحلاوة وبعدين غلوها وخلوها 8 جنيه وقلنا ماشي وبعدين وصلت 9 جنية بسبب عمر دياب الي بيغلي شرايطو وقلنا ماشي ... وهبا طلعت 10 و12 و15 وقلنا ماشي لا وتلاقي الشرايط بقت كلها عك في عك ويتجي تشتري الشريط لمغني ... وفي النهاية يطلع الشريط كلو فيه اغنية وحدة حلوة والباقي كلو هجص في هجص ... يحطلك اول اغنية جمدة واخر اغنية والباقي اي حاجة تملى كده الشريط ... وكنا راضيين ... بس معقولة دلوقتي شركات الانتاج تلزمني أشتري أسطوانة ب 25 جنية وب 30 جنية ليه إن شاء الله ... ده لو هيطلعولي عبدالحليم من قبرو ذات نفسو علشان يغنيلي مخصوص ماهشتريها ؟؟؟

وده حتى الاسطوانة بتتخربش ولالالالالا امسكها من هنا ومتمسكهاش من هنا ... وحط ايدك في نص ودخل صباعك مش عارف فين وامسح الاسطوانه ... الله انا هعقد اسمع وانبسط ولا هقعد أحسس على السيديهايا .

يا أخي برضو الشريط ليه متعتو ... وبترميه في اي حته في درج التابلوة ... او تحت التابلوة او فوق التابلوة او حتى على الارض ... وحتى لمن يسف خالص ويبوظ بتقدر تلحمو بشوية مونكير ويشتغل زي الفل .

وحتى في كارفور وهيبر كان زمان عندهم شرايط شرايط ... دلوقتي تلاقي شريط شريطين والباقي اسطونات الله ... يعني الناس الي عندها كاسيت في عربياتهم يعملووو ايه ؟؟؟؟؟؟؟
ليه محلات الشرايط انقرضت في مصرررررررررر .
هموت واشتري شريط وائل جسار الجديد .

http://www.nilemotors.net/Nile/264395-a.html
http://www.nilemotors.net/Nile/264452-a.html
http://www.nilemotors.net/Nile/275139-a.html
http://www.nilemotors.net/Nile/261575-a.html

تم نقلة لقسم الاجتماعى .

طيب انا بسئل نفسي سؤال تاني ؟
هو أحنا ليه معندناش راديو زي العالم والناس ...
يعني مثلاً بيقلك في لبنان في راديووو اسموو راديوو روتانا
في الخليج راديو أمو mbc fm .
حتى أذاعة الاخبار bbc بتيجي مشوشة .وعلى موجوة mw .
ده في اذاعة كمان اسمها أمارات أف أم .
فعلا تستمتع كده وانتا بتسمعهم
في ليبيا بيقلك الجزيرة بقت تبث موجات على الراديو الله ... هو في ليبيا بس واحنا ولاد الشغالة يعني مالناش نفس نسمع راديو محترم .
ده حتى أذاعة القران الكريم تحس واحد مشغل تسجيل قديم وعقيم ... وبقى كلو كلام ... يعني فيها ايه لمن يبثو أذاعة قناة المجد للقران الكريم على الراديوو ده حتى الصوت ديجتل وجميل .في الراديو في مصر ...
كان زمان بتقعد تسمع مسرحيات ومسلسلات وافلام على الراديو النهردة كلو رغي في رغي ولوك لوووك لوك لووووووك .
مع انك لو حسبت وقتك هتلاقي انك بسبب الزحمة بتقعد في عربيتك اكتر مابتقعد مع اصحابك على القهوة او اكتر ما بتقعد في بيتكم حتى بسبب الزحمة ... ده انا حاطط مخدة وبطنية صغيرة في العربية علشان لمن الطريق يوقف خالص وحبيت اغفل شووية ... ولمن الاشارة تفتح بتلاقي العربية الي ورايا بتصحيني بصوت كلكساتها هههههههههههه ... فأحنا محتاجين نسمع شيء محترم لأن الشعب المصري شعب ذواق وشعب سميع ... مش النهارده بقيت افتح نجوم اف أم ألاقيهم مشغلين شوية أغاني بيئة وشعبي وشوية مغنين حشاشين ولا يسوى تلاته ابيض ... وبقت نجوم أف أم بقت صيع أف أم ... وحبيبة أف أم ... يا أبيض يأسود ... مفيش حل وسط ... يعني يامطربين على القهاوي شعبي يامغنين لسه جداد عاملين فيها رومنسيين وحبيبتي ووحشتيني وشوية كلام عبيط لا لحن ولا كلمات .