الموضوع: احذروا سامي فخري بتاع شارع دمشق

باختصار، كان عايز يبيعلي بيك السلانسيه بتاع الاسكورت ال1300 ب400 جنيه علي إنه جديد... و في الأخر اكتشفت إن اللي كان هيبيعهولي مش بس مستعمل، لأ كمان بايظ!!!!!!!!!!!!!!

التفاصيل:
المشكلة هي ان أنا كنت عايز أغير بيك السلانسيه و أجيب الاصلي عشان اللي راكب عندي بتاع الشاهين لسة مركبه و حسيت إن العربية بتبرجل و هي لسة بتسخن قلت جايز الخلوص مش مظبوط أو هو مش مظبوط و لما فكيته ابص عليه لقيته راس البيك قافشة و لقيته مش بيتكتك لما أوصله كهرباء... أنا كنت كلمت سامي فخري بتاع دمشق و كان قال لي الاصلي عنده ب400 جنيه.

بس، فعديت عليه النهاردة و بدأت المغامرة... أنا ركنت قدام سينما هليوبلس عشان دمشق كان زحمة و رحت له فقال لي هاتلي العربية عشان أركبهولك... المهم قلت له ليه مهو أنا بعرف اركبه ده سهل قوي، ولا إنت عايز تتأكد إن اللي عندك يمشي علي عربيتي... قال لي لأ طبعا، أنا دكتور فورد! أنا كمان أعرف اركبه و أنا بس عايز اركبهولك و اجربه عشان أنا مش بعمل أي حاجة أنا بعمل شغل 10/10 بما يرضي الله و رسوله... خدوا بالكم من "بما يرضي الله و رسوله" ديه... قلت له تمام تمام، يعني عندك ولا لسة هتدور و تجرب... قال لي لأ عندي أكيد.

المهم جبت العربية و قعد معطلني نص ساعة بيدور عليه و بعد كدة جابه و بدأت المهزلة... أنا شفته جايبه من غير علبة قلت له ايه ده هو مش جديد؟... قال لي أيوة طبعا جديد... بصيت لقيت راس البيك إلي بيشبك فيها الكهربه مبططة مش مدورة، قلت احتمال فيه كذا نوع عشان كدة عايز يأيفهولي بدل ما احتاس... المهم بعت جاب كهربائي و ابتدي يشتغل، فبيعمل اختبار للبيك كدة بيشوفه بيفتح ولا لأ، سامي كان بيكلم الكهربائي بس أنا ماكنتش سامعهم عشان كنت كل شوية بروح افتح الكونتاكت و اقفله عشان الكهربائي يجرب، بس كنت بروح أشوف كذا مرة شفت الشرارة و هو بيلمس البيك عشان يشوفه بيفتح ولا لأ.

شوية لقيت الكهربائي عمال يشد في السلك اللي بيركب في البيك خفت يقطعه فبقول لهم فيه ايه، فسامي قال لأ مفيش بيكشف علي الكهربة عشان مش واصل له كهرباء... قلت له إزاي ده أنا شايف الشرز طلع كذا مرة دلوقتي، و بعدين أنا قايس الكهربا بنفسي من كام يوم و مظبوطة... قال لي لأ الكهربة عندك بتضعف لأنها كانت شغالة في الأول و بطلت، الكهربة عندك ضعيفة، أنا هكشفلك عليها عشان جايز تكون المشكلة منها... قلت له لو فصلت يبقي أكيد فيوز ضرب... المهم رحت اجرب قدور العربية ما دارتش خالص طبعا و الكهربائي قعد محتاس في علبة الفيوزات بقي و مش عارف أنهي فيوز اللي ضرب. (و طبعا الدكتور بتاع الفورد عمل العملة و مشي قعد في المحل)

بعد محاولات الكهربائي لقينا الفيوز و شعره و كمل شغل... ساعتها بقي ركزت معاه و اكتشفت إن البيه جايبلي بيك مش بس مستعمل لأ كمان محروق و عامل قفلة و هو اللي طير لي الفيوز... المهم مش عارف ايه اللي حصل لقيت سامي فخري جايب واحد تاني بيقول للكهربائي جرب ده، و ده كان شكله أقدم من التاني لكن الراس بتاعته مدورة... بصيت مع الكهربائي لقيت الملف شغال و بيحرك البيك لكن كان خشن شوية، يعني بيحتاج زقة عشان يشتغل... قلت لهم ده بايظ... و الكهربائي كان عمال يوشوش سامي واضح إنه بيقول له إنه مش نافع... و سامي يقول لأ شغال... قلت لهم إزاي يا جماعة شغال و الكهربائي لازم يزقه بصباعه عشان يتحرك... سامي قال لي لأ هيشتغل لازم نجربه و هو في العربية... أنا قلت في نفسي مش هقعد كل ده و أمشي، اجرب مش خسران حاجة... بعدين سألت سامي تاني، هي الحاجات ديه مستعملة؟ و مسكت البيك دققت فيه و قلت له ده مستعمل هو كان شغال أصلا ولا مستعمل و بايظ؟ ههه... فبعد ما فقسته قال لي الحقيقة أنا مش عارف تاريخهم بالظبط!!! فأنا قلت في نفسي حسابي بعدين (يعني و إنا بحاسب أظبطه و لو مش عاجبه هرمهوله و امشي ههه) المهم جربت ادور دارت الكهربائي قال لي شغال زي الفل اهه و سامي قال لي كدة تمام شفت الشغل بقي، مش أي حاجة، بس و سابنا و دخل جوة تاني... بطلت العربية فالكهربائي قال لي بطلت ليه... قلت له لأ مهه العادي إنه ميعملش مشاكل في التدوير، المشكلة بتبقي و أنا ببطل... (أنا مش عارف هو كان بيحاول يكلفتني ولا فعلا مش فاهم)... المهم جربت كذا مرة لحد ما العربية كركرت في مرة و أنا بطفي قلت له مش نافع، فكه... و زي ما يكون كان مستني مني الكلمة ديه و كان مستحرم يلزقلي الحاجه البايظه بس سامي كان زنقه.

المهم الكهربائي زي مكون صعبت عليه أو حب يعمل معايا واجب ففكلي راس البيك بتاع الشاهين اللي لسة جايبه عشان كانت قافشة و عشان كدة ماكنتش بتتحرك... و ضيق المشقبيه و ركبه... و بعدين ظبتلي مسمار السلانسيه عشان و أنا بزبطه و إحنا واقفين الظاهر بوظت الدنيا و خليته يفك و يلف علي الفاضي و الموتور بقي عالي... المهم ظبط الدنيا و قفل الشغل و اديته عشرة جنيه و قلت له دول عشان الخمس دقايق الشغل اللي في الاخر ده... إنما اللي في الأول ده حسابه مع سامي بيه... بعدين رحت اشتريت فيوز بدل اللي حرقهولي ب2 جنيه و مشيت.

و قبل ما أمشي سامي كان عايز يدبسني في منظف كاربراتاير لكوي مولي و يقول لي ده مفعوله سحر... انما بعد اللي شفته ده مش ممكن اشتري منه حاجة تاني أبدااااااا... كنت عايز أقول له يا رب بس ميكونش هو كمان مستعمل قبل كدة هههههه.

اسف للاطالة عليكم و لكن فعلا أنا مندهش من انعدام الضمير و قلت اهه درس مستفاد لكل الناس، متسيبش حد يحط أيده في عربيتك من غير متخلي عينك في وسط راسك وراه.