الموضوع: انـــــها حقا سياره محترمه ( تقييم مبسط لرينو لوجان )

السلام عليكم يمكن دى اول مشاركه ليا فى المنتدى وحبيت اتكلم شويه عن السياره الجديده رينو لوجان وخاصه وانى عديت الف كيلو من فتره

- العربيه واسعه بشكل غير عادى بعكس ما يوحى بيها شكلها الخارجى تقدر تقعد براحتك ورا وقدام وحتى لو رجعت الكرسى للاخر اللى بيقعد ورا قمه فى الراحه وللعلم انا كان معايا لادا وفولفو وعارف يعنى ايه واسعه

- الشنطه ملهاش حل بتاخد كل حاجه وبتفضل فاضيه حقيقى ميزه رهيبه

- نتكلم بقا عن الاوبشن انا شايف انه عملى جدا التابلوه مفيش فيه شغل كتير بس مريح جدا وسهل الاستخدام وشكله جيد مش حاقول ممتاز بس هوا عاجبنى شخصيا وممكن ميعجبش ناس تانيه المهم الشكل دا بيبقا ازواق ومتنسوش انى كنت راكب لادا يعنى بالنسبه ليا التابلوه دا روعه هههههههه

- الباور بتاعها ممتاز وتحس انه ناعم اثناء الحركه وناشف وهوا واقف مزيج مدهش الحقيقه

- الاضواء ممتازه ووضعها مريح وسهل الاستخدام والكاسيت جيد جدا وسهل الاستخدام ايضا

- الزجاج الكهربائى وخاصه الخلفى وضع الازرار غير مريح هوا ورا فرامل اليد هى ميزه وعيب ميزه ان اللى قاعد ورا ممكن هو اللى يتحكم فيه وعيب انه مش مريح للسائق انه يتحكم فيه

- مرايات الجنب مفهاش مشكله وسهله التحكم

- التكييف رائع انا مجربتوش كتير بس لما تعليه على الاخر ممكن تتلج جوا العربيه

- كده الكماليات خلصت اه بالمناسبه المفتاح شكله معجبنيش والمفترض يكون اشيك من كده ( تلاكيك بقا هههههههه )

- نتكلم بقا عن الميكانيكا انا مش حاخوض فى تفاصيل ( على فكره انا مهندس ميكانيكا ) الماتور ناعم جدا وهادى ويكاد يكون ملوش صوت بس لما بتعدى 100 الصوت بيصحبه بعض العصبيه وكان الماتور بيقولك دوس بنزين مغرى جدا للانطلاق

- بالظبط وبعد حسابات دقيقه منى ( طبعا بمساعده كومبيوتر السياره ) استهلاك البنزين 5.5 لتر لكل 100 كيلو جوا البلد و 7.5 على الطرق السريعه وانت معدى 100 كيلو فى الساعه


- ميكانيكا العربيه نفسها سهله او يمكن اما بيتهيالى انها سهله بحكم شغلى بس فعلا العربيه مش معقده وممكن اوى اى حد يصلحها

- استهلاك الزيت ممتاز بس نصيحه منى تغيير الزيت يكون كل 5000 كيلو حتى لو الزيت بيطول

- حاجه كمان انا بحطلها ميه مقطره بدون املاح !!!! على فكره بالطريقه دى اللادا قعدت معايا ومع والدى 25 سنه ولسه تقعد كمان 50 ولسه بحالتها فابريقه !!!!

لو حد عايز يسال عن اى حاجه انا موجود وفعلا العربيه دى احسن عربيه فى مصر بالسعر دا ناهيك طبعا عن التوكيل الجبار رينو والذى يشهد له الجميع