تجربة قيادة رينو فلوينس2012 من واحد راكب كورى !
السلام عليكم ورحمة الله
النهاردة كانت تجربة قيادة الفلوينس بتاعت صديقى اللى كنا محتارين بينها وبين المازدا والشارك
العربية اول فئة ب 132 الف abs ebd airbags
القيادة حوالى 20 كيلو الى سرعات 120 العربية عاملة 300 كيلو جاية من القاهرة الى اسكندرية بسواق ظبتنا النيتروجين وبسم الله
الشكل الخارجى:
مقدرش انكر ان شكلها مبهر يشدك اوى اوى وكلها فخامة بس الفئة دى ينقصها النواكل وبعض حاجات الفئة الاعلى مباشرة
الشكل الداخلى :
ممم بعد الابهار الخارجى داخل اقعد ومتوقع شئ على نفس المستوى ... بس ... اية دة ! العربية التصميم من جوة لم يكتمل تقريبا .... مش عارف لية الفرنساوى كلة من جوة يقفلك كدة
قفلت الباب ... الباب من جوة رفيع يعنى متقدرش تسند كوعك على الحتة اللى كلنا بنسند عليها وانت قافل الازاز
المخدع اللى فى النص ورا شوية مش طايل غير طرف كوعى ... مش مشكلة ... الصندوق الداخلى للمخدع مستوى واحد وصغير
ابص على العدادات ... مرمية لورة بس شكلها حلو وجميل
الفرق بين الازاز والتابلوة صغير (يمكن انا متعود ان عربيتى المسافة كبيرة اكتر) الازاز تحسة واقف شوية مش بزوية ميل ...
المرايات الجانبية صغيرة حبتين بس كاشفة الطريق
عامة التصميم الداخلى معجبنيش اوى الصراحة
قفلت السنتر ... صوت مكن السنتر عالى كدة لية :( تك جامدة ... معجبتناش
الخامات الداخلية:
بصراحة تفوق ملحوظ ... الجلد كاسى الباب ودة فى رأيى عووض فقر التصميم الداخلى ... التابلوة من مادة فينل تقريبا طرية وحلوة وفخمة
الدركسيون مكسى جلد طبيعى (ناعم) شكلة رائع
كل الخامات الداخلية حلوة فعلا
نبدأ بقى:
دورت الماتور .... ماشاء الله صوتة هادى لوحة العدادت جميلة ومنورة كلها وبتبينلك كل حاجة بالوان متعددة
انقل بقى الفتيس ونطلع:
وضعية الفتيس نفسها صعبة عن ايد السواق ... تحت و بعيدة مش عارف لية ... بس انعم شوية بسيطة من عندى مثلا وحلوة نقلاتة وانت واقف.... اضايقت من موضوع الزرار اللى لازم ادوس علية عشان انقل (عندى لازم ادوس الفرامل ومفيش زرار)
جبت على ال D ويالا بينا بسم الله
ممممم العربية تقيلة فحححححححححححححت ولما اقولك تقيلة يبقى تقيلة خدها من واحد سايق كارينز
لية كدة ... طلعة ميتة فعلا كبست شوية هة طلعت ... اتنفخت الصراحة كبست الفتيس عمل كيك ونطت الحمد لله
يمكن عشان 6 نقلات فبتاخد النقلات بدرى ... مممم اعتقد دى المشكلة
لكن طلعة بطيئة وعايزة كبسة مبنزين عشان تكيك وتطلع شوية ... الاحساس بين النقلات ناعم وغير ملموس الصراحة وحلو
الدركسيون بقى ... رعب الصراحة نااااعم جدا ومرعب ... لحد 80 كان ذى الملبن تقريبا ههههه وبعدين تقل شوية ... لاحظنا انا وهوة صحبى يعنى ... انة اى حركة فجائية قبل ال 70 حتكون عواقبها وخيمة لأن الدركسيون حساس اوى
بس بتبان حلوتة فى الركنة ذى الملبن ماشاء الله
نيجى بقى للمهم العفشة
ممممم مش عايز ضرب ... بس العربية خفيفة ... فعلا خفيفة 120 ومع مسكة الدركسيون الناعم دة والرعبية مقلقة ... وبعدين من ورا بتلعب فوق و تحت جامد مع مطبات الهوا .. مفرحناش خالص بالعفشة
بالاضافة ان مع المطبات النقرة بتسمع ... يعنى النقرة يمين بتسمع شمال والعكس يمكن بردوا عشان التعليق تورشن بيم دنجل
بس لا انا ولا هو انبسطنا بالعافشة ... من ورا فوق و تحت ومع المطبات بتسمع فى كل العربية
يعنى متحسش ان النقرة كانت تحت الفردة اليمين بس ... لأ فى كلة
الفرامل :
امتياز الصراحة .... وجميلة
فى حاجة بسيطة ان الفرامل مش ذى الميجان مثلا ... من اول لمسة تقف لأ ..ز البدال فية مشوار صغير وبعدين تقفش ... ال abs تمام
قلنا نجرب ال ebd وفعلا على سرعة 60 دخلت نص العربية فى رملة ناعمة والنص التانى على الاسفلت الخشن ... وهوب اكبس ...!!! العربية لفت ربع لفة وعدلتها بالدركسيون
مش عارف اذاى مع ان ال ebd المفروض يظبط الحتة دى .... يمكن انتوا تفهمونا لية كدة
المساحات:
كعربية سيدان مش mpv واسعة الكنبة اللى ورا تاخد 2 مستريحين جدا بس السقف واطى من ورا حاجة بسيطة... من قدام الوسع حلو ولما ترجع الكرسى للاخر مبيقفلش الكنبة ورا
اعتقد اللوجان اوسع ..من ورا بس
الشنطة ماشاء الله واسعة وسع مش طبيعى !! ههههههه
الخلاصة:
الحلو:
العربية جودة خامات ممتازة دركسيون ناعم للسواقة داخل البلد واسعة سعر ممتاز مقابل مواصفات امان جميلة شكل فخم مميز
الوحش:
العفشة من ورا بتسمع فى كل العربية ... مع مطبات الهوا من ورا بتطلع فوق و تحت
الموتور طلعتة بطيئة جدا :(
التصميم الداخلى قد لا يعجب الكل.
كلمة على جمب :
لم اشعر بفرق exclusive او انى راكب حاجة premium او لم اشعر بالفرق اللى بيتقال بتاع الاوروبى والكورى والكلام دة
العفشة التورشن بتسمع و الموتور تقيل ... طب فين تميز الاوروبى .. مش عارف
ارجو انى مكنش ضايقت حد بس والله لم اكن متحيز ونقلت لكم احساسى بالكامل وشكرا :)