تجربة سبيرانزا a516 و مقارنتها بفئتها من السيارات ..
السلام عليكم و رحمة الله و بركاتها
عربيتي في صيانة و كان ورايا مشوار مهم في القاهرة فخدت عربية صاحبي سبيرانزا a516 موديل 2011 بقالها 4 شهور ماشيه 5000 كيلو بس .. يعني لسه زيرو و أعلى فئة ..
أنا سوقتها قبل كده طبعا لكن دي أول مرة أسوقها من أول اليوم لآخره في سفر رايح جاي .. و للتأكيد أنا من طنطا .. و مشواري كان داخل القاهرة طلعت 8 الصبح و رجعت المغرب ..
بالنسبة لجودة التقفيل بتاعت العربية الداخلية و الخامات .. فأنا شايفها سيئة و أقل من الكوري في فئتها من اللانوس أو الفيرنا و أكيد أقل من اللوجان .... و أنا بقارنها بالعربيات اللي أنا سوقتها و عارفها كويس و سافرت بيها ..
الكراسي كانت كنزه شوية لكن مريحة بصراحه .. و أنا كنت متوقع إنها تكون أنشف من كده لكن بصراحه كنت مستريح و أنا سايق فكانت نعامة شوية .. و نقدر نقول إنها تفوقت على الفيرنا في النقطة دي و بقت في مستوى اللانوس من ناحية راحت السواق .. و برضه مازالت اللوجان تتفوق في رأيي ..
الأداء :
أنا كنت عارف إني هشوف أداء سيء .. خصوصا إني متعود على البومة .. لكن الأداء طلع أسوأ مما توقعت يا جماعة ...
على التالت .. 5000 rpm .. و السرعة كانت 100 كم / س !!!!
أنا بالبومة الـ 1300 المانيوال بتاعت صاحبي بجيب 100 كم على الثاني على 5000 rpm ..
التسارع و أداء الموتور هي الأسوأ على الإطلاق مقارنة باللانوس أو الفيرنا أو اللوجان ..
الثبات :
العربية خفيفة يا جماعة مايغركوش المنظر الضخم ده .. و مع إن التعليق الخلفي أقرب ما يكون من البومة لكني حسيت بفرق كبير جدا و خوفت أفتح سرعة و أول ما لمست الـ 140 بطلوع الروح طبعا هديت السرعة تانية ... لكن مستوى ثباتها أحسن من الفيرنا برضه في رأيي .. فنقدر نقول الترتيب هيكون لوجان ثم لانوس ثم سبيرنزا ثم فيرنا ... و ده برضه من وجهة نظري علشان ماحدش يزعل مني يا جماعة
الارتفاع عن الأرض و المساحة الداخلية :
العربية هي الأعلى عن الأرض .. هي و اللوجان عالين عن الأرض مقارنة بالفيرنا و اللانوس .. و برضه السبيرنزا واسعه من جوه لكن مش بنفس الشكل اللي انت تتوقعه من منظرها الخارجي .. لكنها أوسع من اللانوس و أوسع من الفيرنا من ناحية الكنبة الخلفية ، لكن اللوجان أوسع منها من ناحية رجلين الركاب في الكنبة الخلفية.
على فكره سحبها في البنزين كويس جدا و مش عارف الناس اللي بتقول عليها بتسحب بنزين بتقول كده ليه !!!
* بصراحه أنا أول ما وصلت عند بيت صاحبي سيبتله العربية تحت البيت و حدفتله المفاتيح من البلكونة و قعدت أحمد ربنا إني رجعت و قررت إني مش هسافر بيها تاني ... والله هي ممكن تكون مش بالسوء ده بالنسبة لناس تانية كتير .. لكن أنا بهتم جدا بالأداء و الموتور عندي رقم واحد .. و مستعد أضحي بالراحة الداخلية شوية مقابل موتور قوي و ثبات محترم ... بالتالي العربية دي آخرها معايا أمشي بيها جوه البلد أو أسافر بيها بس من غير مافتح سرعات عالية .. و في انتظار إني أجرب الساجا كمان علشان أقارن بينها و بين باقية اخواتها في الفئة السعرية دي .