تجربة سبيرانزا a516 و مقارنتها بفئتها من السيارات ..

**Dawns_Mist** · 31-03-2012 02:38 AM

السلام عليكم و رحمة الله و بركاتها

عربيتي في صيانة و كان ورايا مشوار مهم في القاهرة فخدت عربية صاحبي سبيرانزا a516 موديل 2011 بقالها 4 شهور ماشيه 5000 كيلو بس .. يعني لسه زيرو و أعلى فئة ..
أنا سوقتها قبل كده طبعا لكن دي أول مرة أسوقها من أول اليوم لآخره في سفر رايح جاي .. و للتأكيد أنا من طنطا .. و مشواري كان داخل القاهرة طلعت 8 الصبح و رجعت المغرب ..

بالنسبة لجودة التقفيل بتاعت العربية الداخلية و الخامات .. فأنا شايفها سيئة و أقل من الكوري في فئتها من اللانوس أو الفيرنا و أكيد أقل من اللوجان .... و أنا بقارنها بالعربيات اللي أنا سوقتها و عارفها كويس و سافرت بيها ..

الكراسي كانت كنزه شوية لكن مريحة بصراحه .. و أنا كنت متوقع إنها تكون أنشف من كده لكن بصراحه كنت مستريح و أنا سايق فكانت نعامة شوية .. و نقدر نقول إنها تفوقت على الفيرنا في النقطة دي و بقت في مستوى اللانوس من ناحية راحت السواق .. و برضه مازالت اللوجان تتفوق في رأيي ..

الأداء :
أنا كنت عارف إني هشوف أداء سيء .. خصوصا إني متعود على البومة .. لكن الأداء طلع أسوأ مما توقعت يا جماعة ...
على التالت .. 5000 rpm .. و السرعة كانت 100 كم / س !!!!
أنا بالبومة الـ 1300 المانيوال بتاعت صاحبي بجيب 100 كم على الثاني على 5000 rpm ..
التسارع و أداء الموتور هي الأسوأ على الإطلاق مقارنة باللانوس أو الفيرنا أو اللوجان ..

الثبات :
العربية خفيفة يا جماعة مايغركوش المنظر الضخم ده .. و مع إن التعليق الخلفي أقرب ما يكون من البومة لكني حسيت بفرق كبير جدا و خوفت أفتح سرعة و أول ما لمست الـ 140 بطلوع الروح طبعا هديت السرعة تانية ... لكن مستوى ثباتها أحسن من الفيرنا برضه في رأيي .. فنقدر نقول الترتيب هيكون لوجان ثم لانوس ثم سبيرنزا ثم فيرنا ... و ده برضه من وجهة نظري علشان ماحدش يزعل مني يا جماعة

الارتفاع عن الأرض و المساحة الداخلية :
العربية هي الأعلى عن الأرض .. هي و اللوجان عالين عن الأرض مقارنة بالفيرنا و اللانوس .. و برضه السبيرنزا واسعه من جوه لكن مش بنفس الشكل اللي انت تتوقعه من منظرها الخارجي .. لكنها أوسع من اللانوس و أوسع من الفيرنا من ناحية الكنبة الخلفية ، لكن اللوجان أوسع منها من ناحية رجلين الركاب في الكنبة الخلفية.

على فكره سحبها في البنزين كويس جدا و مش عارف الناس اللي بتقول عليها بتسحب بنزين بتقول كده ليه !!!

* بصراحه أنا أول ما وصلت عند بيت صاحبي سيبتله العربية تحت البيت و حدفتله المفاتيح من البلكونة و قعدت أحمد ربنا إني رجعت و قررت إني مش هسافر بيها تاني ... والله هي ممكن تكون مش بالسوء ده بالنسبة لناس تانية كتير .. لكن أنا بهتم جدا بالأداء و الموتور عندي رقم واحد .. و مستعد أضحي بالراحة الداخلية شوية مقابل موتور قوي و ثبات محترم ... بالتالي العربية دي آخرها معايا أمشي بيها جوه البلد أو أسافر بيها بس من غير مافتح سرعات عالية .. و في انتظار إني أجرب الساجا كمان علشان أقارن بينها و بين باقية اخواتها في الفئة السعرية دي .

**Dr'AhmZZong** · 31-03-2012 03:39 AM

احيي حضرتك على المقارنة الجميلة ديه ..

بس غريبة قوي العربية ماشية تاكسي زي الفل ؟؟

**kar!m** · 31-03-2012 11:47 AM

حضرتك ده طبيعى جدا .. العربية دى من أكتر العربيات اللى عليها اختلاف فى الاراء لسبب بسيط.

ان اللى راكب لانسر زى حضرتك و بيركبها .. أكيد اللانسر بالنسبه له أحسن .. انما اللى كان عنده حاجه فيات قديم مثلا و بعد كده جاب اسبرانزا .. فبالنسبه له العربية وهميه.

بس تقرير حضرتك حيادى فعلا و العربية فعلا خفيفه .. الا انها صفقه كويسه بالنسبه لتمنها حتى الان .. خلى بالك ان عيوب العربيه مبتبانش الا بعد 100 ألف كيلو من الاستعمال .. زى السيفيا و الاكسنت و السويفت و اللانوس و الحاجات اللى موجوده دلوقتى.

**Dawns_Mist** · 31-03-2012 01:44 PM

المشاركة الأصلية كتبت بواسطة ahmazong

احيي حضرتك على المقارنة الجميلة ديه ..

بس غريبة قوي العربية ماشية تاكسي زي الفل ؟؟

شكرا يا أبو حميد .. و كفاية إنك منورنا في كل المواضيع يا باشا و انت من الناس المحترمين اللي بحب كلامهم ..
هي العربية دي فعلا ممتازة كتاكسي .. يعني هي تمشي جوه البلد زي الفل .. واسعه و أبعادها مناسبة و استهلاك بنزين مناسب و من جوه هتبقى حلوه و مريحة للشغل كتاكسي .. لكن كعربية عائلية للسفر طبعا هيكون تقييما مختلف ..

المشاركة الأصلية كتبت بواسطة momo_rama

مشكلتك انك متعود تركب يابنى
فنزلت على طول للصينى ف طبعا لازم تحس الاحساس ده لدرجه انك قعدت تبص على خامات العربيه

نفسي شعورى لما خدت عربية صحبي اللانوس كنت قرفان اخر قرف و حسيت بتعب وانا نازل رغم انى كنت جاى من طنطا للمنصورة يعنى كلها 50 كيلو و شوية زحمه

حضرتك معاك حق هو فيه فرق أكيد بين الياباني و الصيني أكيد في الأداء و التقفيل ..
بس أنا راكب بومة ، و البومة ماتعتبرش عربية فخمة يعني .. دي مجرد عربية اعتمادية مناسبة لمصاريفي مش أكتر .. فلما يكون فيه فرق أداء بينهم ده شيء متوقع لكن مش بالفارق الكبير أوي ده .. و فرق التقفيل و الخامات برضه كبير ..
و عموما أنا برضه قارنتها باخواتها من الفئة السعرية بتاعتها المنتشرين في الشارع علشان ماظلمهاش .. فهي بالنسبة للبومة ماتتقارنش طبعا بيها .. لكن بالنسبة للشعبي من الفئة دي عاديةو متوسطه ..

المشاركة الأصلية كتبت بواسطة kar!m

حضرتك ده طبيعى جدا .. العربية دى من أكتر العربيات اللى عليها اختلاف فى الاراء لسبب بسيط.

ان اللى راكب لانسر زى حضرتك و بيركبها .. أكيد اللانسر بالنسبه له أحسن .. انما اللى كان عنده حاجه فيات قديم مثلا و بعد كده جاب اسبرانزا .. فبالنسبه له العربية وهميه.

بس تقرير حضرتك حيادى فعلا و العربية فعلا خفيفه .. الا انها صفقه كويسه بالنسبه لتمنها حتى الان .. خلى بالك ان عيوب العربيه مبتبانش الا بعد 100 ألف كيلو من الاستعمال .. زى السيفيا و الاكسنت و السويفت و اللانوس و الحاجات اللى موجوده دلوقتى.

هي العربية فعلا صفقة كويسه بالنسبة لأسعار مصر دلوقتي .. يعني لو هنقارنها بالفيرنا مثلا فممكن واحد يحب دي أكتر و واحد يحب الفيرنا أكتر فهتكون الميزانية معقولة .. و أنا شوفت من السبيرنزا دي عربية فعلا عاملة 75 ألف كيلو و لما سوقتها لاقيت حالتها كويسه جدا برضة ماتفرقش كتير عن حالة العربية الزيرو اللي كنت بجربها دي .. فيظهر إن فعلا العيوب اللي فيها زي ماحضرتك بتقول بتظهر بعد استعمال كتير شوية ... و في الأول و الآخر أنا مش هقارنها بالانسر أكيد لإني كده هظلمها .. لكن هي بالنسبة لسعر السوق معقولة و منطقية ..

**Bently** · 31-03-2012 02:04 PM

ان اللى راكب لانسر زى حضرتك و بيركبها .. أكيد اللانسر بالنسبه له أحسن .. انما اللى كان عنده حاجه فيات قديم مثلا و بعد كده جاب اسبرانزا .. فبالنسبه له العربية وهميه.

ههههههههههههههههههههههه تشبيهك جميل و مظبوط
بس عاوز اعرف حاجة ...هو موتور الاسبرانزا فيه تكنولوجيا زى vvt الى موجودة فى معظم العربيات دلوقتى و لالآ؟

**Dawns_Mist** · 31-03-2012 02:26 PM

أنا بصراحة مش مهتم خالص بموديلات السبيرنزا .. لكن أنا أصلا مش بصدق الكلام التقني بتاع الصينيين و الكوريين بسهولة .. و ده مش علشان أنا شكاك ، لكن هما اللي كلامهم كتير بيطلع كلام في الهوا و خلاص ..

فأنا جربت أداء السبيرنزا .. و بقول لحضرتك أدائها قليل جدا على موتور 1600 .. أيا كان بقى هما بيقولوا فيه تكنولجيا إيه .. لكن أنا مش شايف للكلام ده واقع ...
يعني لو حضرتك جربت الانوس هتكون أداء أحسن .. فأنا مش عارف السبيرنزا دي فيها تكنولوجي الـ vvt ولا لأ .. بس حتى لو كان فيها .. مش هتاخد منها أداء عالي ..

**Bently** · 31-03-2012 03:50 PM

المشاركة الأصلية كتبت بواسطة dawns_mist

أنا بصراحة مش مهتم خالص بموديلات السبيرنزا .. لكن أنا أصلا مش بصدق الكلام التقني بتاع الصينيين و الكوريين بسهولة .. و ده مش علشان أنا شكاك ، لكن هما اللي كلامهم كتير بيطلع كلام في الهوا و خلاص ..

فأنا جربت أداء السبيرنزا .. و بقول لحضرتك أدائها قليل جدا على موتور 1600 .. أيا كان بقى هما بيقولوا فيه تكنولجيا إيه .. لكن أنا مش شايف للكلام ده واقع ...
يعني لو حضرتك جربت الانوس هتكون أداء أحسن .. فأنا مش عارف السبيرنزا دي فيها تكنولوجي الـ vvt ولا لأ .. بس حتى لو كان فيها .. مش هتاخد منها أداء عالي ..

و انا زى حضرتك تماماا مش مهتم برضو بالموديلات دى..بس الى خلانى اركز هو تقرير حضرتك الجميل

**aws_aljnaby** · 29-04-2012 10:13 PM

انت جربت العربية بمحرك (موتور 1600) واكيد بيكون اداءها سيئ..
العربية بتكون بالاساس بموتور 2000 ... وشوف التسارع على عينه ...

بس في مصر بتكون العربية بموتور 1600 على شان التوفير

اخوك من العراق وبسيارة a520

**Dawns_Mist** · 29-04-2012 10:48 PM

المشاركة الأصلية كتبت بواسطة aws_aljnaby

انت جربت العربية بمحرك (موتور 1600) واكيد بيكون اداءها سيئ..
العربية بتكون بالاساس بموتور 2000 ... وشوف التسارع على عينه ...

بس في مصر بتكون العربية بموتور 1600 على شان التوفير

اخوك من العراق وبسيارة a520

حضرتك منورنا هنا يا باشا ، و أهلا بكل أهل العراق ، و حتى لو كنت مصري و عايش بالعراق برضه أهلا بيك ..
أنا مش عامل الموضوع ده والله علشان أقلل من السبيرانزا .. أنا بحاول أكون حيادي على قد ماقدر ، و بقول اللي أنا شوفتها منها بحكم تجاربي التانية .. هي لو موتورها 2000 أكيد الوضع هيختلف تماما ، لكن أنا بقارنها بالعربيات اللي فئة 1600 أو أقل مش بقارنها أبدا بفئة الـ 2000 لإني على نفس الوتيرة لو هنقارنها بفئة الـ 2000 لو هي كان موتورها 2000 برضه هي في المنافسة هيكون أدائها نسبيا أقل حتى لو كان السحب كويس جدا فماعتقدش الثبات هيكون الفرق كبير فيه ..
وبعدين حضرتك معاك الـ 520 و دي فئة مختلفة عن الـ 516 و أنا ماجربتهاش بصراحه .. و في الأول و في الآخر دي آراء بعيدة تماما عن التحيز و بعيدة عن أي أمور شخصية .. و ياريت تقولنا تجاربك مع سبيرانزا العراق ...