-
هل نحن ظالمون؟
السلام عليكم ورحمة الله وبركاته
بقالي زمن مكتبتش في المنتدى وبصراحه مفيش أحسن منكم الواحد بياخد رأيهم لما يكون في حيره
الموضوع طويل شويه بس مضطر احكيه بالتفصيل علشان منظلمش حد
من سنه جارنا اللي في الدور الأول جاب بوابه للعماره ... البوابه ديه عندهه 3 عيال وقالولنا ان جوزهه مات الله يرحمه وديه بتجري على أيتام فنشغلهه ينوبنا ثواب
قولنا وماله ده احنا نطول المهم عملنالهه شهريه 20 جنيه بتاخدهه أول كل شهر مضروبه في 25 شقه يعني 500 جنيه ده غير طلبات الشقق اللي بتسترزق منهه برضه وطبعا انا شايف ان ده دخل كويس بالنسبه لواحده لا بتدفع ايجار ولا كهربا ولا أي التزامات ده غير ان الزكاه كنا بنديهالهه
طبعا الهانم من أول ما جت وهيه مبتعملش حاجه خالص لا كنس ولا مسح ولا حتي بتخلي بالهه من العماره تقوم من النوم الصبح الساعه 10 تسيب عيالهه في العماره اللي أكبر واحده فيهم عندهه 8 سنين ومتشوفش وشهه الا بعد الساعه عشره بالليل
كذا واحد من العماره قالهه يا بنتي اعملي بالمرتب اللي بتاخديه مفيش فايده نشتكي للراجل اللي جايبهه في الدور الأول يقول ده ثواب نقوله يا عم طب تحلل اللي بتاخده وتقعد حتى في العماره يقول بتجري على ايتام وبتقلب عيشهه طبعا ناس معجبهاش الكلام وامتنعوا عن الدفع
بعد شهر الراجل اللي في الدور الأول خد شقه لابنه في الدور الأخير وبيشطبهه وطبعا البوابه زي ما قولت مبنشوفش وشهه الا على النوم فناس استغلت الموقف ده وطلعم لشقة ابن الراجل اللي بيشطبهه وسرقم منها مونه بـ 3000 جنيه
العجيب في الموضوع الراجل هلل شويه ومخدش موقف منهه وطبعا استغربت جدا من موقفه
وطبعا الوقت بيمر والهانم بتلاحظ ان كام ساكن مش راضي يدفع الشهريه بس هيه حطت جارنا اللي في الدور التاني في دماغهه لإنه اول واحد رفض يدفع بقت تخلي ولادهه يتغوطوا في الدور بتاعهم وبنتهه تكنس العماره ده مره في الشهر مثلا وترمي تراب الادوار اللي فوق كلهه في الدور بتاعهم ده غير اي حد يسأل عليهم تقولهم مفيش حد في الدور ده لحد الموقف اللي حصل يوم الخميس اللي فات
راجل مبيض محاره بيشطب شقه بيقولهه خلي السكان اللي في الدور التاني يلمو الغسيل علشان ميتبهدلش فطبعا قالتله مفيش حد هنا
جارتنا طالعه تلم الغسيل لقيته مبهدل فالراجل شافهه من فوق قالهه والله قلت للغفيره تخليكم تلمو الغسيل فقالتلي مفيش حد هنا فالست اتنرفزت ونزلت تقولهه انتي بتقولي اننا مش موجودين ليه فتخيلو الرد ....... قالتلهه مدام مبتدنيش فلوس بعتبركم مش موجودين المهم كلمه من هنا كلمه من هنا شتمت الجاره وقالتلهه انا احسن منك وشدتلهه النقاب وزقتهه
الجاره اتصلت بجوزهه واخواتهه علشان ييجوا ... جوزهه شغله بعيد جدا بياخد ساعتين بالعربيه فأخوهه واخواتهه البنات وصلم الأول وقعد يشتم ويجعجع بس الناس اللي في الدور الاول دافعم عن البوابه وطلعوا ان الجاره هيه اللي حطاهه في دماغهه المهم اخواتهه هديم وخلوهه تعتذر للجاره وروحوا
جوز الجاره وهوه في الطريق اتصل بصاحب العماره وقاله البوابه شتمت مراتي وهزقتهه وانا بحترمك وبعملك قيمه وبقولك وان متصرفتش متلومنيش وبعد ساعتين رجع للبيت حط شنطته ونزل للناس اللي في الأول قاموا عاملين عليه رباطيه علشان يحايلوه المهم الراجل مبقاش عارفين نسكته وصوته بأه يرج العماره وسابنا وطلع شقته فطلعت انا وجار تاني ومراته نهديه فصاحب البيت كلمه وقاله متتكلمش مع حد تاني وهتمشي بكره
امبارح الجمعه صاحب العماره جه ولسه بيحط رجله على السلم استلمته وقعدت تقوله دول شتموني وضربوني وجابولي اهلهم فالراجل مردش غير بكلمتين لمي هدومك وامشي
فقعدت تولول وتشتكي لطوب الارض وكل ما تشوف حد من السكان تشتكيله فجارنا اللي في التاني سمعهه وهيه بتشتكي للجيران نزل قعد يهلل تاني واقسم انهه تمشي وبصراحه انا انضميت معاه انهه لازم تمشي
انتم شايفين اننا كده غلطانين
-
لأ طبعا
وأكسروا وراها زير
هي اللي قطعت عيشها بعدم التزامها بواجبات شغلها
بالبلدي ما رعتش أكل عيشها
-
طبعا حضراتكم صحّ
واللي مايتمرش فيه الجميل ويعتبره حق طبيعي حله الوحيد إنك تمنع عنه (الحق) ده
وانتو صبرتم عليها
دي دخلت في مرحلة الأذية يا راجل
تراب يترمي ومش عارف إيه من بنتها وتضليل للي يسأل وكمان مد ايد؟! ده لو جار عمل فيك الكلام ده شوف هتعمل فيه إيه
سيبك من وجع الضمير اللي في غير محله ده
الناس اتسعرت خلاص
-
لا حول ولا قوة الا بالله
ده انتم كده خدمتوها خدمة العمر انكم مشيتوها بالطريقه دى
-
تغور فى 60 داهيه واللى هايتعاطف معاها يبقى ماجربش يتعامل مع الاشكال دى
ده صنف نمرود
-
الحمد لله اصل الساكن اللي في الاول قاعد يقولهه حسبني عليهم ويارب تعود في صحتهم وعيالهم
-
هو إيه حكاية الناس اللي في الدور الأول دول؟!
-
بصراحه ... انا شايف انها تأخد فرصة اخيرة ... مش عشانها .. هى كده مصانتش لقمه عيشها و لكن عشان اولادها اللى هما هيشيلوا الطين بعد كده .... بص يعنى لو حكمت الظروف انها تمشى ... يبقى متقطعوش عنها الزكاة علشان ولادها ... دول يتامى ..... و ربنا يكرمكم .....
-
اللي في الدور الاول فاكرين نفسهم اصحاب العماره لحد ما الراجل مرمط بكرامتهم الارض اول امبارح
-
يا باشا ولا ربع فرصه فى ستين داهيه ولازم تفهموا صاحب العماره تصرفاتها عشان ما ياخدش موقف من الراجل المتضرر
دى عينه من الشعب الى مش بترضى باى حاجه ويرجعوا يقولوا مش لاقيين ومفيش شغل و و و
-
كلهم كده متقلقش
ييجوا غلابه ومش لاقيين ياكلوا
ويقعدوا لحد ما يتنمردوا ويتمرعوا
صنف ميجيش غير كده
ومتقلقش
حتلاقي غيرك تقعد عنده سنه ولا اتنين
وهيا طبعا بره بتلف علي شغل وبتنضف في البيوت
يعني فلوس
وبيات ببلاش
عاوز ايه تاني
-
الراجل لسه مكلمني وبيقولي مراته نازله تشتري حاجات لقيتهه بتشتكي لبوابه تانيه في الشارع شكل الموضوع مش هيخلص
-
ايه يا عم الحاج ده انا مشوفتش كدا الصراحه فكرتني ببواب عندي في العماره بردك من نفس العينه دي حتي انا كنت بستحمله واجي علي نفسي علشان ميتقلش عليا اني بفتري عليه وانا الحمد لله متواضع لابعد الحدود وعمري ما حسست بواب عمره جه العماره اللي عندنا انه بواب اللي بيجي يشتغل بواب في العمارة بقوله انتا ساكن زيك زي اي حد هنا والعمارة دي بتاعتك ونتا مسئول عنها وعن كل اللي فيها وبراضيه الا البني ادم ده اللي فعلا خد الكلام ده بثقه وحسسني فعلا انه صاحب العمارة واحنا شغاليين بوابين عنده المهم احنا عندنا في العمارة 2 اسانسير فعلشان نخف الضغط عليه بنشغل واحد نص يوم والتاني نص يوم وجيت انا من بره بقوله شغل الاسانسير التاني علشان نريح اللي شغال طول النهار ده وافوجئ بانه يقولي لا مش هشغله وانتا علي رجلك نقش الحنه ما تروح تركب الاسانسير التاني انتا هتكون احسن من الست الكبيرة اللي خلتها تمشي لحد عنده علشان تركبه وهيه مش قادره تمشي وحسيت ساعتها باني بقيت واحد تاني وكان في الوقت ده واقف علي كرسي في المدخل بيركب يافطه ملقتش نفسي غير اني بشيله من علي الكرسي واحدفه في ازاز المدخل وكسرته كله علي دماغه وكل الناس في العمارة مكنوش مصدقين نفسهم اني انا اللي عملت كدا بس فعلا لو حد كان في الموقف ده مكاني كان عمل اكتر من كدا وحلفت ما يعدي النهارده الا لما يكون ماشي من العمارة كنا نشوفه يوم ما يجي يقبض بس غير كدا طول النهار قاعد بيشتغل في المستشفي اللي جنبنا ومنفض للعمارة واتسرق قبل كدا القلب النحاس بتاع طفايات الحريق بتاعت العمارة والبيه مش هنا ولا نظافه ولا اي نيله ده حتي الجنينه اللي كانت قدمنا مزروع فيها ورد قلعه كله وبقا يزرع فيها جرجير وفجل وبصل لما حسيت اني قاعد في الغيط عندنا في البلد وبردك عندي كام واحد في العماره جم وقفوا في صفه انه ميمشيش وده طبعا لان البيه بيجبلهم طلبات من بره وبيبعت مراته تنضفلهم الشقه والعمارة تضرب تقلب وفعلا مخلتهوش عرف يقعد فيها دقيقة واحده للاسف في ناس لما تعاملها بطيبة قلب واحترام وادب بتتنمرد وتخليك تندم علي اليوم اللي فكرت فيه انك تعمل معاهم خير انا قعدت مضايق من نفسي بسبب الموقف ده بس فعلا انا كل ده حصل لا ارادي مني من هول الموقف نفسه
بعكس العمارة اللي فيها الشركة عندي يجي بوابين محترامين وعايزين يعيشوا لاكن اجارك الله علي اصحاب العمارة واستغللهم ليهم ومطلعين عليهم العفاريت الزرق
-
باشا انتو طيبين قوى .... اللى بياخد فلوس شغل يشتغل بيها .. اللى بياخد صدقه ميشتغلش بس ميستناش فى العماره لأنه واخد مكان حد ممكن يشتغل
انتو صح و مش ظالمين ... هاتو بواب و فهموه على الموضوع عشان ياخد باله و يشتغل بذمه
Content Relevant URLs by
vBSEO 3.6.0 PL2