الموضوع: أسطورة يوسف عسلية !

" البنات انواع .. ولا كده وبتاع .. بنت طلقة وبنت صاروخ .. بنت لما تشوفها تدوخ .. بنت زي الكهربا .. بنت عاملة مؤدبة .. انا أصلى كوماندوز .. والبت دي نار .. انا كنت باحب .. ليل ويا نهار " .. نسوانجى ؟ .. ربنا يسامحك .. لا يا سيدي انا لا نسوانجى ولا يحزنون .. دي كلمات اغنية الاخ يوسف عسلية .. والاخ عسلية ( لمن يهمه الأمر ) هو عيل عنده عشر سنين ملبسينه بدلة و بيغنى الاغنية الراقية سالفة الذكر .. جدير بالذكر ان الأخ يوسف عسلية (أطال الله شعره) مشغل وراه 7 شنبات منهم مدير اعماله وفرقته من المزيكاتية و بالطبع متعهدين الأفراح والليالي الملاح .. طيب بيقول ايه الاخ عسلية ؟ .. يستعرض الاخ يوسف خبرته في دنيا البنات ( لا تنسى ان البنات انواع) .. و البنت من وجهة نظره تدخل تحت احد البنود التالية : بنت طلقة - بنت صاروخ (لا تسألنى عن الفارق فأنا لا اعلم ) - بنت زي الكهربا - بنت مؤدبة .. عذرا اقصد عاملة مؤدبة .. و يؤكد اخينا انه كوماندوز (يعنى واد مخلص وفرود ) .. و كان بيحب ليل ويا نهار .. كان دي فعل ماضى ! (ماينفعش نسيبه ف حاله) .. طب بأمارة ايه .. يعنى كان بيحب من و هو عنده 5 سنين؟ .. طيب بغض النظر عن مفهوم الحب ف نظر اخونا عسلية .. تعالوا نشوف البت دي نار .. البنت المقصودة (اللي عليها العين واللية علي رأي مكى) هى بنت ف نفس سنه ( ان ماكانتش أصغر) و بترقص جنبه رقص عجيب يصعب علي أنثى بالغة أن تجود بمثله .. خلو بالكم احنا بنتكلم عن اطفال 8 10 سنوات .. الكليب موجود علي قنوات الاغانى الشعبى و تقدروا تشوفوه .. المشكله مش ف الاخ يوسف .. هو وماله لأبيه .. ابوه حر فيه علي كيفه يفرده و يتنيه .. بس هل ده مستقبل اطفالنا ؟ .. يعنى ابنى يطلع كوماندوز وبنتى تطلع طلقة؟ .. من 15 سنة كان منتهى طموحى أقرا فلاش و سمير والعب سوبر ماريو .. إذن ماهى طموحات أبناءنا ؟ .. ربنا يستر