الفلونس بحر بس ماتغرقش فيه :)
السلام عليكم
اكيد في ناس هنا عارفاني عشان سألت كذا مره واستفسرت عن كذا حاجه .. بس التوبيك ده هيبقي تقرير و إبداء رأيي في العربيه ب جانب كام سؤال كده اهو نستفيد ونفيد بعض :) معلش هو طويل سنه بس انا معتبركو اخواتي والله ف قولت اقول الموضوع من طقطق ل سلام عليكم :)
انا اخترت العنوان ده عشان فعلا بيعبر تعبير كامل عن الفلونس لأنها فعلا بحر بس سهل جدا تعوم فيه حتي لو مش متعلم .. يعني بالرغم من التكنولوجيا العاليه بس انا حاسس ب سهوله نوعا ما في التعامل
اولا انا اول مره اركب رينو او اوروبي عموما - طبعا ركبت بس مش سواقه وملكيه خاصه وكده - كان عندنا لانسر 2006 و كانت مريحاني بصراحه بس للأسف اتسرقت من 3 شور واستنينا شهرين ندي فرصه للإجراءات بس محصلش حاجه ف قررنا نسعي بقي في موضوع شراء سياره و الموال بتاعها ده .
العربيه اصلا ل والدي بس هو مبيركبهاش غير مره مرتين في الشهر - بس اهو اسمها بتاعته - وطبعا باقي الايام معايا .. ف واحنا بندور في المراحل الاولي طبعا كان لازم ندور علي حاجه برستيج وطبعا متكونش شبابي وتكون اسم كويس ... في الاول كان عامل حسابه علي 100 الف واخره كده جديد بقي او مستعمل بس كسر زيرو - لأن عندنا عقده من المستعمل - طبعا هو فكه من الحوار ده وسابني انا اشيل الليله وابلغه في الاخر خالص علي حاجه وهو يقول تمام ولا مش تمام
وبدأت انا بقي رحله البحث .. طبعا اسهل حاجه النت وانا قاعد في البيت ب مزاج و ادور براحتي مع مراعاه إن معلوماتي بسيطه عن العربيات يعني مش زي الوحوش اللي بيبقو عارفين كل حاجه عن العربيه وميكانيكا وكهربا وكل حاجه - بس بأمانه فتره البحث دي طلعت بيها ب كميه معلومات رهيبه مكنتش اطلع بيها في 3 سنين مثلا- المهم دخلت علي كونتكت كارز وقلبت في العربيات واشوف رنج السعر والدنيا دي ف الاختيار انحصر في ( اكسنت ار بي - نيسان صني - رينو سكالا - لانسر - ) ده في الجديد وقعدت بقي بالايام اعمل مقارنات واسأل صحابي واخش المنتديات اعمل توبيكات واستفسر عن حاجات وبردو مكنتش مستريح لأي عربيه فيهم لأنهم يفتقدو المعايير اللي الوالد حاططها .. يعني الاكسنت كوري و شبابي جدا - الصني زفت جدا بصراحه مش عاجباني من زمان - السكالا ولا حد يعرف عنها اي حاجه وشبه الصني - اللانسر ممله وكانت عندنا و لازم نغير ... ف قلت ل والدي قال شوف مستعمل بس يكون موديل السنه دي او 2011 المهم طبعا اغلب اللي لاقيته سيراتو و كروز وكل ما اسأل حد عليهم يشتمو فيهم و كروز ب ماتور اوبترا و سيراتو بقت مع طوب الارض وشبابيه وكلام من هذا القبيل يعني .. المهم ابويا كانت عاجباه الكروز وشوفنا واحده معروضه وكانت تمام ورحت شفتها بنفسي واتكلمنا علي السعر وكل حاجه بعدين والدي غير رأيه - حد صاحبه كرهه فيها :) - بعدها جالنا احباط لأن كده الموضوع بوخ وقعدنا كتير ومش عارفين نجيب حاجه . ف الوالد قال خلاص بقي نشوف مستعمل قديم الماني و امرنا لله .. رحت قعدت اعمل سيرش بردو وتوبيكات وافلام واشوف كونتكت كارز وكلمت بتاع 100 واحد اللي تطلع بره واللي تطلع عامله حادثه واللي يطلع بعيد جدا واللي واللي واللي .. المهم في واحد جارنا كان عنده اوكتافيا 2007 شاريها مستعمله وكان عايز يبيعها ف دي بصراحه كانت لقطه كان هياخد 90 الف بس كان فيها مشاكل يعني الطاره بالكامل كانت متغيره ومافيش ايرباج و استعماله خشن جدا - هو نائب في البرلمان :) - المهم ابويا قاله تمام هناخدها وخلاص ف قالنا تمام اول ما اجيب انا الاوكتافيا 2012 هروح بايع دي علي طول .. العمليه طوبت شويه وانا بردو شغال ادور وابحث تاني يعني ما سكتش :) المهم واحد زميلي كلمني وقالي تعالي في واحد عايز يبيع الفلونس 2011 وماشيه 30 الف كيلو ب 103 الف .. رحتله وشفت العربيه كانت اول فئه وملياااااانه خدوش وحكات والقايم معمول فيه شغل علي البارد وكده بس كنت اول مره ادخل الفلونس في المعادله وبصراحه شدتني جدا وقلت اكيد اكيد هتعجب الوالد و بردو عاجباني مش زي الاوكتافيا كنت مسترخمها جدا وكنت شايفها للي عندهم 40 سنه وانت طالع فقط .. المهم قلت للحاج علي اللي فيها قال لأ بلاش منها و دور تاني .... المهم شفت كام عربيه تاني فورد فوكس 2008 و اوبل فيكترا 2008 ومحصلش نصيب - والحمد لله ان محصلش نصيب - المهم الوالد جاله فرصه عمل افضل ب مراحل في اللي كان فيها ف قال مبدهاش بقي لازم نعلي رينج الاسعار لحد ما وصلنا ل 130 الف .. طبعا الاختيارات بقت اكتر .. بقت كروز زيرو و سيراتو زيرو و الانترا زيرو و نيسان تيدا زيرو فلونس اول فئه زيرو وكام عربيه مش فاكرهم .. المهم رسينا علي الفلونس زيرو بعد ما والدي شافها مع صاحبه عجبته جداااااااااااا .. ف قلنا خلاص بقي نفكنا من حوار المستعمل ده خالص ونسأل في التوكيل ونبدأ في الاجرائات .. سألنا في التوكيل قالو هتحجز وهتستني 3 او 4 شهور طبعا كان بعيد جدا بالنسبه لينا فقلنالهم طب والموزعين المعتمدين قالو مافيش مشاكل بتبقي العربيه عندهم تستلموها علي طول هم محمد زكي و الطارق .. ف الاقرب لينا الطارق اللي في مول العرب نزلنا الجمعه اللي فاتت 23 مارس نتفرج علي العربيه وكان الوالد معاه مبلغ كده عشان لو خلصنا .. رحنا المعرض وكان معروض 2 واحده فضي و واحده سمني كده والاتنين الفئه اللي ب 142 الف .. قعدنا نحسبها ونشوف فرق الاوبشن وهل يستحق دفع ال 10 الاف زياده ولاقيناه يستحق بجداره وفي فرق كبير في الاوبشن و الوالد شخصيا عجبه موضوع ال سمارت كي جدا و قررنا نحجز العربيه الفضي لأنه لون مناسب وهيستحمل البهدله بتاعه مصر و استلمنا العربيه يوم الاتنين بليل و رخصناها التلات ومن ساعتها معايا وبلف بيها وبجربها وبقلب في الكاتالوج وبعرف ايه الجديد وبسأل الناس هنا علي اي حاجه معرفهاش وبيردو علي طول
نيجي بقي للعربيه بعد الفيلم الهندي الطويل ده :) ... زي ما قولت و وصفت العربيه وده اول احساس لأي حد يخش العربيه ويسوق وهو بيتأمل العربيه .. انها بحر واسع بس متغرقش فيه
طبعا اول يوم سواقه كنت خايف جدا علي العربيه وماشي براحتي - عارفين انتو الاحساس ده - بس من تاني يوم قلت لأ مش هينفع بقي لازم اندمج في المجتمع واتعايش عادي
اول حاجه حسيت بيها للأمانه موضوع السحب وانه ضعيف شويه بس مش فارق معايا خالص لأني مش من نوعيه الجري والشد والكلام ده كله و اظن العربيه كمان مش معموله ل كده دي عربيه بيزنس مان من الاخر .. نيجي للقعده طبعا مريحه جدا جدا والعفشه ناعمه جدا وطبعا حسيت بالفرق بينها وبين اللانسر
العربيه ما شاء الله مرتفعه جامد عن الارص مع انك لو بصيتلها من بره تقول هتحك في اي مطب بس انا رحت مخصوص شارع كده كنت بحك فيه من تحت دايما في اللانسر والحمد لله محكتش وطبعا كنت مذبهل ساعتها
العزل بتاعها انا شايفه رائع لما بقفل الازاز ولا ليا دعوه ب بره غير اللانسر خالص .. حتي كنت ماشي علي الدائري كنت بكلم اللي قاعد جمبي وببص لل عداد لقيته 140 منين و ازاي وامتي معرفش :)
الخامات شايفها رهيبه التابلوه والفرش والابواب و الكونسول الاماكي كله علي بعض تحفه
طبعا العربيه واسعه جدا جدا بس بصراحه مش اوسع من الاوكتافيا .. الشنطه بردو واسعه جدا وتشيل 5 شنط كبار مسترح جدا ويااه بقي لو قفلت الكنبه اللي ورا يبقي ابات فيها علي طول :)
التكييف جربته كده علي السريع ونظام fast لقيته سريع جدا .. بس ربنا يستر في الحر الشديد سمعت كلام مقلقني من التكييف
نيجي بقي للتكنولوجيا اللي في العربيه .. اول حاجه بتشوفها هي كومبيتر العربيه وبيوضح كذا حاجه بس مكانه كان هيبقي اشيك لو في النص .. و طبعا وانا بقلب فيه اكتشفت موضوع قفل السنتر وانت ماشي
تاني حاجه التكييف شكله جامد جدا وفيه كذا اوبشن وكله واضح و حتي هما مكبرين الزراير بتاعه اوتو و فاست و سوفت لأنهم عارفين إن كله بيريح دماغه وبيستخدمهم
تالت حاجه الراديو و نظام الصوت والبلوتوث كله .. وده فيلم لوحده طبعا اول ماجبنا العربيه كان عايز كود وكلمت التوكيل واخدت الكود وبصراحه اتطمنت جدا وفرحت جدا بالموضوع ده حاسس انهم مهتمين اوي ب الزبون بتاعهم
ومن هنا وهنا عرفت اغلب استخدامات الراديو وازاي اربط الموبايل وازاي اتحكم من المالتي فانكشن اللي ورا الطاره - والدي طبعا عنده لسه مشاكل في الموضوع ده-
نيجي بقي لل كروز كنترول .. ده بصراحه شايفه اجمل و اجمد حاجه في العربيه يعني فعلا اختراع .. يمكن انا معجب بيه بزياده اوي كده اني اول مره استخدمه وعارف انه في عربيات كتير بس اهو قدري بقي اني استخدمه في الرينو :) انا قلت الاول هعاني وحتي سألت هنا ازاي استخدمه بعدين شفت فيديو لقيته سهل جدااااا وجربته ومن ساعتها مش ماشي غير بيه بجد اختراع هايل وقمه الراحه يعني
نيجي بقي لأخر حاجه السمارت كي .. ده بقي وهم و بردو عشان احنا اول مره نجرب الموضوع ده ف بالنسبه لنا اختراع ولا تحط مفتاح وتدور ولا تفتح باب ولا تقفل ولا الليله دي - مع اني عارف ان مشاكله بتبقي رخمه بس ربنا يستر -
اجمالا العربيه جميله جدا وشيك جدا بس من رأيي مش شبابيه او مش هي الاختيار الامثل للشباب
معلش انا عارف اني طولت عليكم بس اهو احب افضفض معاكو و اعتبروني اخوكو الجديد بقي هتلاقوني ناططلكو هنا كل شويه انا علي النت علي طول ف هتزهقو مني :)
عندي بقي شويه اسئله و استفسارات كده اللي حابب يقراهم يكمل اللي زهق من التوبيك كفايه عليه كده بس هيدفع 5 جنيه بدلات :)
1- عايز اعرف الفئه بتاعتنا دي كام سماعه ؟ وهل كلهم شغالين ؟ لأن نظام الصوت مش عاجبني يعني اللانسر كانت غول بصراحه ومن غير اي تعديل والبيز فيها كان رهيب .. في الفلونس مش حاسس ب البيز خالص
2- موضوع البلوتوث حاسس انه مش ثلث كده وساعات بيعبط يعني انا رابط عليه 2 موبايل بتاعي وبتاع الوالد المفروض إن اول ما اخش بالموبايل في العربيه يتصلو ببعض علي طول من غير ما اتدخل انا ... ساعات بقي لازم اعمل فيلم واخش ابحث واعمل ديسكونكت و كونكت تاني .. ف في حل للموضوع ده
3- بردو موضوع الاسماء ليه مش بتظهر علي شاشه العربيه وقائمه الموبايل نفسه اللي علي شاشه العربيه مبتفتح حاجه غير اني لو عايز اتصل وتجبلي الارقام وانا اقعد الف بالبكره
4- موضوع استخدامي للكروز كنترول ده في ضرر علي العربيه ؟ وهل بيسحب بنزين اقل من الاستخدام العادي ؟ وازاي بيسحب بنزين والبدال بتاع البنزين مبينزلش .. في وحده تانيه بتسحب مثلا ؟
5 - حد جرب يركب اي اكسسوارات او انظمه صوت او انزار او كاميرا او اي حاجه ينقل لنا تجربته وهل بتخرج من الضمان فعلا ولا كلام وممكن احطهم قدام الامر الواقع ؟
6- يعني ايه مصفحه من تحت ؟ وهل الازاز بتاعها مصنوع من حاجه مميزه يعني مثلا مبيتكسرش كله لو اتخبط زي العادي ؟
نكتفي بهذا القدر من الاسئله عشان دماغ الناس متسيحش :)