مشكله عاطفيه معقده : انسي البنت دي ازاي ؟ اقروا الموضوع كله من فضلكوا
طبعا معظم الناس هنا هيقولوا هو الواد ده بيهيس و لا ايه ؟ ده طول عمره معادي للجنس الناعم و احب اقول للفقهاء دول انا معادي ليهم لاسباب لا تخفي عن احد و لكن طبعا في حياه كل واحد فينا بنت سواء اتجوزها و لا متجوزهاش فهي موجوده
مبدئيا هنسمي البنت دي (س) و ده اول حرف من اسمها و (س) اكبر مني ب 5 سنين و طبعا الفقهاء هيقولوا اكبر منه ب 5 سنين و بيحبها ازاي ؟ فاحب اقولهم ان الحب ملوش علاقه بالسن و لا بالشكل و لا بالدين و لا بالجنسيه و لما بتحب بتحب و خلاص
(س) كانت جارتي قبل ما نعزل و ابتدت الحكايه مع (س) و هي في اولي كليه حروق و انا في 3 اعدادي و محدش يتريق من فضلكوا :I_angr1[1]: و كانت بتيجي عندنا البيت عشان تذاكر عندنا و طبعا الفقهاء هيقولوا و ايه اللي يخليها تيجي تذاكر في بيتكوا ؟ ما تذاكر في بيتهم و خلاص فاحب اقولهم ان عندها اختين اصغر منها و ساعتها الصغيره كانت في 3 اعدادي زيي و الوسطانيه كانت في ثانويه عامه و (س) هي الكبيره و هي بتحب الهدوء الزائد عن اللزوم زيي
طبعا لما كانت بتيجي عندنا كنت بسيب المذاكره عشان اعد اتكلم معاها و لكن امي كانت بتطردني شر طرده عشان اروح اكمل مذاكرتي علي اساس يعني الواد هيفلح اوي:I_angr1[1]:
كنت بجيبلها هدايا في عيد ميلادها و مره جيبتلها هديه في عيد الفلاتنين و الله كنت بحوش مخصوص عشان اشتريلها الهدايا دي و كنت حاسس نحيتها باحساس غريب معرفتش احسه تاني لحد دلوقتي و شكلي مش هحسه و محدش بياخد اكتر من نصيبه
المهم طبعا هي كانت حاسه و عارفه و كانت بتعاملني معامله تانيه خالص غير اي حد تاني و استمر الوضع ده لحد ما انا بقيت في 3 ثانوي و حدثت المصيبه المتوقعه
اتخطبت بس لراجل محترم و مهذب فكنت عايش في مأساه و كنت بدعيلها ربنا يسعدها حتي لو سعادتها مش معايا و الحمد لله جبت مجموع زي الزفت نتيجه عدم التركيز في المذاكره :I_angr1[1]:و في نفس السنه الهباب دي عزلنا و يومها كان اخر مره اشوفها فيها
طبعا الفقهاء هيقولوا و ايه الجديد في اللي انت حكيته ؟ فاحب اقولهم ان الجديد ان اخر مره شفتها كانت في 2003 و احنا في 2012 و مش عارف انساها خالص بتطلعلي في احلامي و لسه فاكر ملامحها لحد دلوقتي و لسه سامع صوتها في وداني و بفكر فيها علي طول و كل ما بتيجلنا زياره عشان تسأل علي امي و اختي كنت بتعمد انزل من البيت عشان مقابلهاش و لا اشوفها و لا اسمع صوتها حتي
انا حاسس بذنب رهيب يا جماعه :I_angr1[1]: عشان دلوقتي بقت متجوزه و عندها 3 بنات و طبعا الفقهاء هيقولوا ما انت فاضي و عندك فراغ عاطفي فاحب اقولهم اني مش فاضي و لا عندي فراغ عاطفي بس فعلا مش شايف بنت غيرها قدامي و والواحد بقه 25 سنه و العمر بيجري زي القطر فده اللي مخليني عازف عن الجواز و ياريت الفقهاء يقولولي اعمل ايه عشان انساها بدل كتر اسألتهم
