الموضوع: كيفيه تنظيف الرشاشات في السياره التي تعمل بنظام mpi

السلام عليكم ورحمه الله وبركاته..
-السيارات التي تعمل بنظام mpiهي اللي بيبقي فيها 4 رشاشات راكبين علي مسطره ودي اللي هنشتغل عليها وننظفها بادوات بسيطه والنتيجه هايله ,اما نظام spi وهو رشاش واحد راكب اعلي المانفولد فماينفعش معاه الا المنظفات اللي بتتحط مع البنزين..
-الفكره ...
-ببساطه احنا بنحاكي الوضع الطبيعي اللي بيحصل في الموتور (اثناء عمل الرشاشات) بس بره الموتور طبعا وبنستخدم منظف كربراتير علشان يتحقن داخل الرشاش بدل البنزين وهو ده اللي هينظفه..
-الادوات المطلوبه...
-الرشاشات طبعا وهنفكها من علي المسطره بتاعتها واحد واحد ونخرجه وده شكله طبعا بس ده بتاع الهيونداي استلفته من الميكانيكي بتاعي علشان اشتغل بيه وده شكله ...





-هنحتاج سرنجه (حقنه) من الصيدليه بس مش الرفيعه .اتخن شويه وهنحتاج مصدر كهرباء 12 فولت يكون امبيره عالي شويه بطاريه موتوسيكل ,ادابتور,محول... وهنحتاج كمان فيشه الرشاش
او ممكن نستبدلها بحتتين سلك وفي اخرهم مشبكين (تمساح) رفيعين من عند اي كهربائي وهنشتري علبه منظف كربراتير ,اي نوع بس يكون امريكي واحسنهم عن تجربه هو (ابرو) ب25ج ودي صور الحاجه اللي جبتها...









-خطوات الشغل...
-هنبدا باسم الله نشيل كباس السرنجه ونخرم اعلي السرنجه من المكان الموضح بالصوره بدبوس رفيع وهقولكم ليه بعد كده..





-نلمس ظهر السرنجه لنار ولاعه او ماشابه لثواني وبسرعه نحط ظهر الرشاش (مكان دخول البنزين) في السرنجه علشان نوسع لمكانه فيها وتدخل شحط,خلي بالك انه كمان في جوان كاوتش زي جلده الانبوبه علي الرشاش علشان احكام الوضع بالشكل ده ..





-وصل البطاريه (البطاريه اللي في الصوره 6 فولت ماتشغلش الرشاش بس حبيت اوريكم الوضع هيبقي ازاي)او المصدر الكهربي بالرشاش عن طريق فيشه الرشاش لو عندك او المشابك اللي استخدمتها بس خلي بالك مايلمسوش بعض علشان القفله ,ممكن بقي تعمل في نص الدايره مفتاح وصل وفصل كده حاجه دلع زي زرار جرس الباب بتاع زمان...
-منظف الكلبلاتير (بلغه الصنايعيه) بييجي معاه شاليموه رفيعه كده دي مهمه جدا ..هنركبها علي المنظف والطرف التاني ليها هنحشره في بوز السرنجه بالشكل ده..





-كده كله تمام وكله متوصل بالشكل ده...





-هنضغط علي السبراي المنظف علشان نملي السرنجه لنصفها تقريبا ونميل الرشاش لتحت ونحط تحتيه طبق بلاستيك علشان يرش فيه , فاكرين الخرم اللي عملناه في السرنجه من فوق؟؟ دلوقتي ظهرت فايدته علشان يخرج الضغط الزياده اللي خارج من علبه السبراي ويعمل ازاحه للهوا اللي داخل الحقنه (شغل فيزياء)
-دلوقتي وصل الكهربا ولاحظ ان الرشاش لو كان بيسيل هيظبط معاك بعد شويه ولاحظ لون السائل اللي نازل بالبلاوي اللي جوه الرشاش !!
-بعد شويه اعكس اقطاب البطاريه او اقلب المشابك (لو انت مركب فيشه الرشاش مش هتعرف علشان ليها غفير ) وطبعا ركب السرنجه من الناحيه التانيه علشان بدل مالرشاش يرش هيشفط وينزل اللي فيه من ناحيه الرش ,وبكده مبروك عليك الرشاشات الجديده
-الموضوع ده اتفرجت عليه فيديو وحبيت انقلهولكم بايدي علشان الناس اللي بتعاني مع الرشاشات ,اتمني الموضوع يعجبكم واكون ضيف خفيف عليكم واي استفسار انا جاهز.تحياتي..

بجد تسلم ايدك يا استاذ فادي
اكثر من رائع

وعلي فكرة الرشاش دة اخو الرشاش الي راكب في عربيتي

انا عندي 4 زيادة (spare) هنظفهم واركبهم علي نظافة انشاء الله

وكمان عندي الأسبراي

فاضل الكهرباء
ينفع شاحن اللاب توب ؟؟؟

تسلم ايدك مرة تانية
وارجو من منسق القسم تثبيت الموضوع للأهمية

جزاك الله كل خير

والله المستعان
،
،