باركولى استلمت البرسونا امبارح الساعة 6 فاكرنى كنت مواعدكم اقولكم تقرير عنها
ياجماعة انا اللى كنت كاتب موضعين قبل كدة انى حجزتها ب 93 ونص وبعدها زادت ياترى فاكرنى المهم استلمت امبارح برسونا لون برونزى 2012 مبدأيا محدش فهمنى اى حاجة فى التوكيل عن اى زراير فيها او اوبشن كأنى المفروض انى انزل من بطن امى معايا برسونا هههههههه المهم انا اصلا غاوى عربيات وركبت 100 عربية قبل كدة فمش مشكلة قولت حعرف بنفسى استلمت العربية وشيكت عليها فى السريع كلة تماما بسم الله دورت وجاى اطلع لقيت الفتيس مش بينقل خالص قولت وبعدت ربنا يستر من اولها كدة المهم ندهت الراجل قالى انتا دايس فرامل قولتلة اكيد طبعا لانها اتوماتيك المهم جرب هو راحت نقلة لقيتة بيقولى لازم تدوس فرامل جامد شوية المهم فعلا طلع منظرى وحش ماعلينا فعلا لازم تدوس فرامل جامد يعنى بمعنى تدوس لمسافة ابعد شوية ودة شايفة طبيعى مافيهوش اى مشاكل المهم اقولكم بقى على المميزات والعيوب مع العلم انى مسقتهاش غير من المعرض فى العجوزة لحد البيت فى المعادى عند كارفور كدة ودة ياجماعة اول انطباع ليا لسة مجربتهاش اوى يعنى .
نبدأ بالمميزات :
العربية ثابتة اوى اوى اوى على الطريق حاسس وانا مثلا على 80 انى على 20 يعنى عارف عربية راسية كدة الموتور ادائة هايل وبيستجيب تحت رجلك كدة بسرعة وبرضوا انا لسة مقرصتش على الموتور علشان التليين طبعا زى منتو عارفين نيجى للعفشة تحس انها ناشفة شوية بس المطبات مش بتحس بيها برضوا من وجهة نظرى يعنى عفشة جيدة مفيش منها مشكلة التقفيل من جوة جميل والعدادات شكلها بقى وهمى وهمى وهمى فوق ماتتصوروا وتحسسك انها عربية رياضية كدة التكيف ممتاز قوى جدا والمروحة بتاعتة قوية جدا جدا جدا بقى فعلا ممتازة الكاسيت رائع طبعا مفيهوش كلام صوتة جميل والاربع سماعات صوتهم جميل وقوى الكراسى مريحة مفيهاش مشكلة الشنطة بقى واسعة التنين ممكن تحت فيها عجل صغير ههههههههه لاء بجد واسعة اوى الحمد للة نيجى للفرامل بصو بقى حاسس انها ضعيفة شوية مع قوة العربية بس متهيألى برضو لسة التيل والطنابير متطبعتش يعنى قدام شوية حقدر احكم اكتر عليها اة الكروز كنترول جميل جدا ومريح جربتة على الدائرى كدة خمس دقايق وعليت منة السرعة ووطتها كلة تمام وشغال زى ال x بس مش فاكر حاجة تانى .
نيجى بقى للعيوب :
لحد الان فى صوت فى العفشة زى تزييق كدة خفيف من العجلة الخلفية زى ماتكون عايزة تتشحم مثلا متهيألى من الركنة والمية والشحن فأكيد حبقى اقولهم عليها فى اول صيانة .
وفى عيب تانى ظهر وانا بركن امبارح بس دة متهيألى من العين مش عيب فى العربية هههههههههه والحمد للة انها جت على قد كدة السنتر بتاع الباب اللى ورايا بتاع السواق علق ومش بيطع ولا بينزل مع فتح وقفل العربية ودة وانا بركن امبارح تحت البيت لقيت الحارس بتاع العمارة عندى بيقولى اية الجمال دة اية اللون الجامد دة ياباشا جاى بقفل حصل اللى حصل دة مع انى مجرب السنتر فى التوكيل والفتح والقفل فاديتة الحلاوة علشان يهدى عليا شوية والحمد للة علشان جت على قد كدة مش مشكلة ربنا بس يباركى فيها ويكفينى شرها يارب .
بصو بقى اللى عايز يسألنى على اى حاجة انا تحت امرة لانى بجد ملقتش حد اتأخر عليا فى المنتدى الجميل دة اللى بجد ساعدنى كتير فى اختيار العربية لانى كنت محتار بينها وبين البريليانس ال frv cross ولكن الحمد للة ربنا وفقنى وعرفت اختار المهم انكم اجمل منتدى ويارب دايما نكون مع بعض بخير وانا تحت امركم يا اجمل منتدى فى الدنيا وشكرا .
