أوبل استرا 2012 - وفرامل ايديها :)
اليوم - من حوالي ساعة كده - كنت سايق العربية مع الجماعة وكنت جنب صور نادي الزمالك
وطبعا عشان أنا اليومين دول بفكر أغير الياريس عشان خلاص بقى عملت مية ألف وبقالها خمس سنين (بس والله زي الفل مش مقصرة معايا خالص) فكل ماشوف معرض أو شو روم في عربيات - ادي الويتينج التمام والركن في أي حتة وأنزل أتفرج
أخدت المدام وروحنا نشوف الاسترا 2012 في معرض منصور - سور ناسي الزمالك
طبعا مش هاعيد وأزيد في جمال وشياكة وحلاوة العربية دي (مع إن ناقصها باركينج سنسرز - حاساسات مطر وضوء - فتحة سقف - usb [التربو فيها دي] - ولا حتى بلوتوث)
بس ساحرة - من جودة تقفيل - جونوت 17 - فرش جلد - كونصول غاية في الشياكة الخ الخ الخ
بس اللي لفت نظري هو إني لما كنت قاعد وحاطط ايدي اليمين على الأرم رست - لقيت كف ايدي بيقع عشان متعود أكون دايما ماسك فرامل اليد (اللي هي بالمنسبة مش موجوده)
بدل ده بقى - قال إيه في زرار (مجرد زرار) يطلع فوق وينزل تحت مكان فرامل اليد المعهود - وده بقى طلع فرامل اليد الالكترونية- اللي هي بالنسبة لينا كشعب مصر العظيم هتكون (الفنكوش)
طبعا الرجل اللي كان في المعرض مش فاهم أي حاجة عنه غير إزّي بتشغل الفرامل وإزّي تقفلها
لكن إيه بقى التكنولوجيا اللي وراها - مميزتها - عيوبها - كنتلوبها... طبعا برولوم !!
مقدمتش خبر - وجيت عملت أبحاثي واجراءاتي وتحليلي - لقيت بعد المكان اللي كان فيه النوع ده من الفرامل زي مرسيدس و bmw وطلع الكلام مش جديد خالص
طبعا أجمل ميزة فيها - إنك لما تشغل فرامل اليد الفنكوشية - وتلمس البنزين - اوتوماتيك كده تفصل وتطلع معاك
وده طبعا مفيد في المطالع بتاعتنا الجميلة
في نفس الوقت - اسئلة كتيرة مرت في خيالي - مثلا - هيحصل إيه لو البطارية فضيت لأي سبب ؟؟ لو أصلا فيها مشكلة ياترى يا هل ترى, اخونا في منصور طبعا هيكون ده اختراع وأسهل كلمة نغير كله - والبس يا صاحب العربية
واخرا - مكان الزرار فعلا معرض لأي خبطة أو طفل يدوس على الزرار بالغلط وبكل سلاسة - يعني حسيت إن الموضوع ده مناسب أكتر لعيلة كلها دكترة مثلا :) ياإما أحط فوق الزرار ناموسية أو كوباية في فاتحة
فقلت آجي اشكي همي وحرتي في موقعي المفضل ونشوف رجالة الاوبل عاجبهم اللي بيحصل ده :) واذا كان في حد يعرف أي حاجة عن الموضوع ده و إذا كان ده يكون سبب كافي ليَّ إني أصرف نظر عن الاسترا !!