الموضوع: تغيير سيور نيو اكسنت وزوايا

السلام عليكم ورحمة الله وبركاته

اخباركوا ايه نجوم هيونداى اتمنى الجميع يكون بخير بامر الله.

مش عارف حد كان متابع موضوع الزيارة السريعة لفرع غبور الجديد وعرف ان عندى مشكلة فى السيور.المهم :

العربية : نيو اكسنت 2010

الكيلومتر: 45000

بما اننى من النوع القلوق روحت فرع قليوب امبارح وكان عندى مشكلة فى حدفة يمين وروحت ظبطت زوايا فى بريدجستون وقاللى الفنى اننى عندى مشكلة فى المساعد اليمين واحتمال زرجينة.قلتلوا لا متعملش عشان العربية فى الضمان.

كشفت عليها فى قليوب واتعملت على جهاز الزوايا هناك والحمد لله مفيش مشكلة.

السيور : كان عندى صوت رفة او تكتكة من سير الباور وكان واحد ميكانيكى قاللى السير مشقق ويستحسن يتغير.

رحت الفرع والمهندس قاللى طالما هتغير يبقى تغير الكاتينة بالمرة.طيب ليه مع ان الكاتينة على 60000 والعربية 45000 قاللى يستحسن يبقى فتحة واحدة ومصنعية واحدة.

طيب ليه ما هو انا فى صيانة ال60000 هغير كدة كدة وهعمل صيانة وادفع مصنعية شاملة ولا هتشيلوا مصنعية الكاتينة.قاللى لا بس هتقل التكلفة.ازاى معرفش.المهم اصريت اغير سيور (الباور-الدينامو-التكييف) بس والتلكفة المبدئية 800 جنيه.

السيور تقريبا كلها مشققة ما عدا الدينامو كان معقول.وتم التركيب فى حوالى 45 دقيقة وصوت الرفة راح والحمد لله بس مجربتش التكييف لسة.

وانا خارج اشغل الكاسيت.ابدا مش هشتغل رحت راجع وقلتلهم بصوا عليه وبما اننى مفوتش صيانة والحمد لله تم تغيير الكاسيت ومكنتش اعرف ان الكاسيت صينى اللى كان فيها واللى ركب فيها ما عدا الكاسيت اللى له بكرتين وفى نفس الحجم تقريبا ولكنه كورى ومش موجود.

التلكفة 375 جنيه منهم حوالى 180 جنيه مصنعية.الحمد لله على كدة.

خطورة عدم تغيير السيور :

سير الباور : لو فصل يبقى مفيش باور والدريكسيون هيتقل.

سير التكييف : مفيش تكييف.

سير الدينامو : مفيش كهربا.

نصيحة : لما تسمع صوت من الموتور او زوايا وتقلق اكشف على العربية وروح التوكيل وبلاش فتى الصنايعية وتوفير لان كله على حسابك فى الاخر.وعلى الاقل التوكيل فيه مهندسين وفنيين فاهمين ومدربين على مواتير العربيات وياما قابلتهم مشاكل.

اى استفسار انا فى الخدمة وربنا يسترها على الجميع.