علاج التهتهه عند الأطفال

**michohat** · 23-05-2012 02:12 AM

حضرتك كانت الجلسه الواحده ب 80 جنيه وده كان فى سنه 2010 علي ما اظن وافتكر
حضرتك بس روح للدكتور ناصر قطبي خليه يكشف ويشخص الحاله وكان فيه معاه دكتور و دكتورة بيشتغلوا مع حالات الاطفال والدكتور ده بيشتغل فى مركز خارجي لوحده وبسعر اقل ( مش عارف كام ) فلو حضرتك بس ابدء مع ناصر قطبي و بعد كده لاغي الدكتور اللى معاه

**askanas** · 23-05-2012 07:47 AM

فيه دكتور كان عالج قريبي هبعتلك بياناته علي الخاص

**Screenplays** · 23-05-2012 08:44 AM

انا كنت معوق و خفيت ... حالته بسيطه علي فكره متقلقش وديه بس دكتور تخاطب و هو هيبقي زي الفل

**michohat** · 23-05-2012 11:38 AM

مش تقلق الموضوع كله تدريبات تنفس وازاى تطلع النفس وانت بتتكلم طبعا لان الكلام بيعتمد على الهوا

**shaddadfalcon1** · 24-05-2012 07:20 PM

انا الحمد لله كلمت الدكتور اللي صاحبي كلمهولي واتفقت معاه يوم الأحد والراجل محترم جدا وحتي بيقولي قولي عايز تقابلني فين وانا اجيلك وممكن كمان يجيلي البيت ولا هيقي اغلي ؟

**Screenplays** · 24-05-2012 08:51 PM

اكيد هيبقي اغلي

**A7MED_PHARMA** · 25-05-2012 03:41 AM

اوبااااااااااااا
وليه السيرة دي بقا
شباب كتير من المنتدى هنا يعرفوني شخصيا.. أنا بتكلم معقول تمام زي أي حد
أوقات بتقفل معايا .. والكلام بيخرج متقطع .. لما أكون قرفان أو عصبي أو قلقان أو .................

وأنا في إبتدائي لحد ثانوي
كنت متلعثم بشكل غبي ..

المهم

تجربتي مع دكتور التخاطب أيام ثانوي

هقولك على طريقة تجربها معاه لما ييجي يتلعثم ..

خليه ينطق في سره تشكيل الحرف الأول

يعني
لما ييجي يقول
(( كمبيوتر )) مثلا
طبعا الكاف بتتنطق مضمومة .. يبقا خليه يقول ( أووو - كمبيوتر ) طبعا أووو تكون غير منطوقة .. فاهمني
يعني يقول أووو في سره .. ويكمل الكلمة عادي
دي مش هتخليه يتلعثم في الكلمة لما يمسك أولهااا صح
مثلا
كلمة (( نايل موتورز))
يقول (( أ نايل موتورز )) علشان النون الأولانية بتتنطق مفتوحة

مثلا
كلمة (( إستراحة))
يقول (( إي إستراحة )) علشان الالف مكسورة في الاول
وطبعا الحروف الاولى زي ماقولتلك تكون بينه وبين نفسه ماتكونش مسموعة

.

حاجة مهمة
التلعثم مش مرض عضوي
وماتقدرش تصنفه مرض نفسي

ومحتاج كمان تدريبات في التنفس ..
ومحتاج كمان يبدأ يستغنى عن الكلمات المساعدة الي بيقولها لما لسانه يتعقد
انا كنت بستخدم كلمة (( يعني )) لما لساني يقف تماما

بس مع الوقت .. العملية قلت عندي بنسبة كبيرة ممكن نقول 70 %
يعني بتكلم كويس أوي وعادي..أوقات وأوقات لساني بيقفل

مش عاوز أقولك

الموضوع ده هيسبب له مشاكل نفسية كتيرررررررررررررررة أووووووووووووي لما يدخل المدرسة
فحاول تقف جمبه فيها
وتفهم المدرسين بتوعه وضعه

في ثانوية عامة .. أنا كنت أوشكت إني أقتل ولد معايا في الفصل فعليا بسبب إنه إتريق عليا بشكل مستفز
شلت التختة ورزعته بيها .. ومسكت فيه والفصل كله ماخلصوش من إيدي
وربنا معاك

ومش عاوز أقولك كمان

كنت ألدغ في الــــــ ر كمان
الحمد لله راحت اللدغة خااااالص
أمي كانت تقولي إنزل هات ( مكرونة) أقولها لااااااا يعني أروح أقول للراجل إيه( مكوووونة)
ههههههههههههههههههههههههه ه

**shaddadfalcon1** · 25-05-2012 12:45 PM

هو فعلا بيعاني من دلوقتي في الحضانه والعيال واخدين بالهم ومراتي بتعيط منهم اصلا ومن تعليقات الناس اولياء الأمور في الحضانه

طيب كده الجلسه هتخشلها في 100 جنيه وياتري كام جلسه عشان الموضوع كده هيبقي شكله خراب بيوت

**michohat** · 27-05-2012 07:43 PM

نحمد ربنا ان التخصص ده بقى له دكاترة كتير في مصر
والدي الله يرحمه كان بادئ معايا الموضوع ده ومكنش فيه الا دكتور واحد وكنا بنسافر له علشان الجلسات ( محمد ناصر قطبي ) والدكتور ده هو اللى ادخل التخصص ده فى مصر ولحد دلوقتي لسه كل فتره بكلمه اطمن عليه
المهم زي ما فارما قال ده مش نقدر نسميه مرض لانه مش عضوي و كمان منقدرش نقول عليه نفسي
معظم التدريبات اللى بتحصل اولها انك مش تحاول تخفي او تتجاهل الموضوع لانك لو حاولت هيظهر اكتر
زي مافي اختلاف فى طبائع الناس انت برضه مختلف عن الناس ( معظم اللي بيعانوا من التعلثم بيبقي تفكيرهم سابق لكلامهم بيفكر بشكل اسرع يعني ) وبعد كده فى مراحل التدريب على تخريج الاصوات ( الهواء ) بايقاعات موسيقية
و حبه ف حبه التدريب بيتطور لحد ما تقدر تستغني عن العكاكيز الكلامية ( يعني , مثلا )

نسيت اقول لك ان فيه قسم لامراض التخاطب موجود فى مستشفي كوبري القبه ( القوات المسلحه ) و التكلفة اقل شوية على ما اتذكر
واي سؤال تحت امرك