الحل السحرى .....للقضاء على كل المشاكل التى تؤرق الشباب من الجنسين ..
امبارح ... و انا مروح ... عملت حركه صياعه ... انما ايه ... متخطرش على بال اعتى عتاة الاجرام ... بكل بساطه ... قفلت الموبايل ....
و اخدت اليمين .. وجيت عند المطب ... و هديت ... وروحت عادى ...
طلعت على البيت ... شامم ريحه اكل بيتقلى ..... يا سلام ... هو ده ... و بما ان المهندس اللى صمم العمارة اللى انا فيها .. راجل عبقري بجد .. عامل شفاط المطبخ بيرمى على السلم ... يعنى عشر شقق كل شقه بصنف مختلف ... اول دور تشم لحمه بتتشوى على الطريقه الشامية ... و تانى دور سمك بورى و بلطى صينيه .....بس الساكن اللى فى الدور التالت بقى طلع اصيع من المهندس اللى صمم العمارة و ركب شفاط الحمام على السلم و تقريبا كان ضارب كرنب و بيض و فول حراتى و عندة اسهال ... و اخدتها جرى على السادس ... المهم شميت من الشقه بتاعتنا ريحه بانية دجاج .... ريقى جرى ... ودخلت و فعلا طلع بانية .....
مفيش ثوانى و الاكل اتحط ... مكرونه بالصلصه من اللى قلبك يحبها ..... وفضله خيرك كده .. كم حته بانية ... و شويه سلطه خضرة و شوكه ...
ببص على التليفزيون .. لاقيت فيلم بتاع زمان لشاديه و عماد حمدى ... و كمال الشناوى ..و مريم فخر الدين .. المهم الست شادية ده اكتشفت انها مش بتحب عماد حمدى اللى هو جوزها ... بعد ما خلفت منه " بنت " و هربت و سابت البيت و سابت الطفله الرضيعه للمربية اللى عندها سبعين سنه علشان ترضعها ... ما علينا .. قولت ...بجمله الهطل ... اعد اكمل فرجه .. اتسلى كده و انا بتسمم ...
ينقطع الخط الدارمى للاحدث بعد ما و صلت الى درجه البكاء و الشحتفه على الطفله الرضيعه اللى صدعتنى بأوأها ... و يجى اعلان ... يا سلام
فقولت اهى فرصه الواحد يشوف الجديد ... هو يبقى ولا شرى و فرجه كمان ؟؟؟؟ ... يا عم خد فكرة ......
تقوم سماعات التليفزيون تطلع تراب ممزوج بصوت واحد بيحزق زى ما يكون بيجر مقطورة و يقول ... فرصصصصصصصصصه عظييييمه ..
ايه بقى الفرصصصصصصصصصه العظييييييييييييييييمه ده؟؟؟ و خد عندك بقى ...... بس بصراحه مكانش عندى حاجه اخد فيها ...
" اذا كنت تعاني من الغازات و الانتفاخات المتكررة نتيجه الاكل غير الصحى و المتوازن مما يسببلك حرج امام الناس و المحطين بك ... فاليك المنظم السحرى ... لا يحتاج الى فنين فى تركيبه ....كما انه يتميز بكونه كاتم للصوت ... و معه هديه بخاخ عطر الافندر يتم تركيبة على المنظم لتغيير روائح الغازات الى روائح عطرية مستحبة ... لا احراج بعد اليوم ...و اكرر لا يحتاج فنين الى تركيبة ... سهل جدا !!!!!! جربه بنفسك ... امام المحيطين .. و اذا لم يلاقى قبولك ستسترد اموالك فى الحال ......
اغتنم الفرصه ... لا تتردد و اتصل الان ... ليس لدينا وكيل .. من المصنع راسا اليك ....
" اذا كنتى تعانين من الشعر الزائد فى جسمك ... و تشعرين انه توجد صله قرابه بينك و بين الغوريلا او تنحدرين من فصيله القنفذ ... فاليك الحل السحرى الوحيد ..الدوارة العجيبه ... تعتمد فكرتها عى فكرة ماكينه الريش بتاعت الفراخ ... ادخلى الدوارة ... ثم اضغطى على زر التشغيل ... و سوف ترى النتيجه المزهله ... لن تصدقى نفسك ... اطلبية لنفسك الان .. و لكل نساء العائلة .... ملحوظه هامه اربطى شعرك بايشارب قبل التشغيل........
انتى لسه متصلتيش .... اتصلى الان .....
" تعبت من التفكير ... زادت هموم الحياة عليك ..... لم تستطيع التركيز .... فاليك الحل الجهنمى ... بالتركيبة المبتكرة .... نخاع ديل البرص ..
خلاصه المادة الفعاله فى ديل البرص ... حتى بعد ما يموت البرص .... ادهن المكان المصاب 24 ساعه فى اليوم ... ستشعر بالنتجه فى اقرب وقت
اتصل الان ..... ""
" اذا كنت ممن يعانون من ظهور الفسافيس فى قفاك .... لن تهرش بعد اليوم ... الابتكار المذهل ... بخلاصه ركب النمل ..... ادهن قفاك صباحا فقط و سترى النتيجه المذهلة... سوف تشعر بتنميل فى البداية ... انه من اثار ركب النمل ... و لن تشعر بقفاك طوال اليوم .... سوف تختفى الفسافيس الى الابد ..كما انه لو فوائد عدة ... تستطيع دخول اى مشاجره مع من يفوقك قوة ... بلا خوف ... يعنى لن تشعر بأى الام على القفا خالص ... و اذا كنت لا تعانى من الامراض السابقه ... فنحن ننصحك بأستعمال .. نملو كريم ... للوقايه من الضربات الفجائية ......"
مش فاكر بقى بقيه الاعلانات ..... بس حسيت انى انا محتاج تأهيل عقلى .....او عاوز اخش مدرسه تربية فكرية .... ايه ده ؟؟؟؟؟؟
انا ولادى لما يشوفوا الاعلانات ده .... هيطلعوا معوقين فكريا ... اه و الله ... طيب راضى ذمتك يا شيخ ؟؟؟ مش حاسس انك عاوز تروح السرايا الصفرا .... حد بس يرح بالى .... المشكله فين بالظبط .... عارفين انا بعد ما اكلت ... حسيت انى عاوز اجرب المنظم السحرى .......