الموضوع: اسمحلي اسألكككك .. و احرجكككك .. يعني ايه قانون !؟

صباح الفل علي رجالة نايل موتورز
ده موضوع صغير كدة نزلي في المصري اليوم انهاردة يا رب يكون حد جابه
ضمن ملف (مصر اللي جايا)

قانونجي !

اتولدت من ٢١ سنة ومش بس كده لأ.. ولدت مواطنا مصريا.. ولحد كده أنا لم أعترض ولا قلت حاجة.. ولكن في كل هذه المدة حاولت أجد تعريفا أو جملة مفيدة تقولي «ماهو القانون؟!» لقد قرأت عنه في كتب المدرسة.. وفي مجلة ميكي.. ولما كبرت شوية قريت عنه ع الإنترنت، وعرفت إنه حاجة جامدة لابد من احترامها يعني..
ولكن الواضح ان مش أنا بس اللي مش عارف يعني إيه قانون.. بدليل إن كل مصري قرر أنه يتصرف ويعمل لنفسه القوانين بتاعته.. بل أن يكون هو القانون ذاته علي طريقة «أنا الحكومة.. اااااانا الحكومة!».. فمثلا سواق مقطورة قد عقد لجنة بمفرده، وناقش فيها قانون أصدره بنفسه يتيح له إنه يمشي ع الشمال في الطريق السريع عادي جداً.. وموظف يري إن لو واحد غ مزه بعشرين جنيه فهذا قانون يتيح له إنه يخلصله ورقه ويمشيه بسرعة الراجل برضه أكيد وراه مشاغل!
طب لو بصينا للقوانين اللي بتصدرها الدولة شخصيا مشكورة.. قانون مثلا زي ربط حزام الأمان.. أثر القانون ده إيه في حياة المواطن المصري؟ إنه بيدفع من الضرايب بتاعته مرتب أمين الشرطة اللي بيقوفه يقوله الحزام فين؟ ثم بيدفع العشرة جنيه لذات أمين الشرطة عشان يعمل نفسه مش واخد باله إنه مش رابط الحزام.. ثم بيدفع المخالفات اللي أمين شرطة تاني كتبها كده من دماغه لأنه لازم يملي الدفتر اللي معاه! طب والله دي حاجه زي الفل! ولكن أنا مازلت في حيرة.. ما هو القانون؟
هل هو شوية كلام علي ورق في أدراج الوزارات من أجل أن يبقي عندنا قوانين ودستور زي الدول المحترمة؟ ولا هو قرارات تقرها الدولة لفتح باب رزق آخر لموظفيها؟ ولا عشان الناس في مجلس الشعب تلاقي حاجه تعملها؟ ولا هو مادة نضعها لنلتف حولها بشتي الطرق والوسائل؟ أم إنه حاجة محطوطة علي سبيل الاحتياط عشان لو حد مش علي مزاجنا نديله الوش «الميري»؟.. بجد لغاية دلوقتي نفسي أعرف إيه الحاجة اللي داوشين دماغنا بيها دي واسمها قانون؟!

انا مع من قال ان القانون موجود، ويجب احترامة ، ولكن العيب ليس فى القانون ذاتة ، ولكن العيب فيمن يطبق القانون ! ونجد فى بعض الاحيان ان القانون يتم تطبيقة بحذافيرة ، وممكن يطلعوا له حذافير ان لم يوجد له حذافير ! لمن ! لمن يرغبون فى مرمتطة او اذلاله ! او المغضوب عليهم
ولا حول ولاقوة إلا بالله