الموضوع: الأوبترا مع الكاسترول (رحلة مع الزيت)

الحمد لله بعد تفكير وسؤال واستخارة أستقريت على زيت كاسترول ودي كانت التفاصيل:
لما أشتريت العربية وكنت بصاين في المواعيد المحددة كان الوكيل (أبو غالي - العبور) بيحط لي زيت زافتس ... قصدي كالتكس وكان مخلي العربية زي الجرار الزراعي، لعدم خبرتي مكنتش واخد بالي بس حاسس أن صوت العربية عالي، وبعدين لظروف الزحمة وإحتياجي لصيانة وكان عندي سفر لمده طويلة ذهبت لعمل الصيانة عند حرامي مكسور... أقصد ياسين منصور وغيرت يومها لموبل وان وطبعا حسيت بفرق كبييييييير بين النوعين في صوت الموتور والسحب وكملت علية كام غيار وبعد ما انضميت للمنتدى وقرأت مواضيع السادة الأعضاء عن زيت كاسترول قررت أني أغير وكنت قد أكتسبت بعض الخبرات وتمكنت من أتخاذ قرار التغيير بقلب جرئ وذهبت للموزع المعتمد بمصر الجديده بشارع دمشق وسألته عن كاسترول إيدج قاللي أني أخليني في كاسترول ماجنيتيك أفضل لسيارتي لأن الإيدج بتاع المواتير العالية (بي إم - مرسيدس - بورش - أودي - .....) وحاولت أغير رأيه فيا وفي عربيتي مقدرتش وأقنعني وتوكلت على الله واشتريت وغيرت الزيت والفلتر
وكان الفارق كبييييييييييييييييييييييي ييييييييييييييييييييييييي يييييييييييييييييييير جدا في الصوت والسحب حسيت كأني مخبي وحش جوه الكبوت مش موتور والنعومية ولا المكواه التيفال على القماش
وطبعا عارف أن ده مش تقييم منطقي للزيت فقررت أن يكون الحكم النهائي على الزيت في آخر مدته (10000كم) ولكن ده تعتبروه تقرير مبدئي وسأوافيكم بالتقارير كل 3000 كم إن شاء الله لكن مبدأيا كله يغير لزيت كاسترول ماجنيتيك
السعر كان 220 لـ 4 لتر وفلتر 20 جنيه وتغيير 10 جنيه يبقى المجموع 250 جنيه لتجربة جديده رائعة حتى الآن
بس سألت على زيت الفتيس كان 175 جنية للتر الواحد والفتيس عندي بياخد 4 لتر !!!!! يبقى المجموووووووووع .........( مخدنهاش في المدرسه الأرقام دي)
شكرا لإهتمامكم