موضوع للنقاش : بتلاقى مكان تركن عربيتك ؟!
السلام عليكم و رحمة الله
زى ما هو واضح من العنوان ,هل بتلاقى مكان تركن فيه عربيتك ؟؟؟
فكلنا شايفين دلوقتى كل محل و كل بيت يأما تلاقيه حاطط حجارة او مركب حديد امامه علشان ماحدش يركن
لا و الجديد كمان و اللى طلع فى المقدر جديد ان المحلات بقت مش عايزة حد يركن لا يمينها و لا شمالها و لا امامها بعشرة متر بالرغم من وجود اماكن فاضية مش ضراهم فى شيئ ابدا و لكن ديه الموضة الجديدة
و شخصيا اتعرضت لموقفين فى يومين
الاول من يومين و كنت بركن فى ساحة كبيرة بجوار منزلى و الساحة ديه بقالى سنتين بركن فيها و لكن فوجئت بأصحاب ثلاث محلات كل واحد اصلا واخذ خمسة متر خارج محله بيقولوا متركنش فى الساحة و الحجة الموضة ان كده بنقفل و ندارى على المحلات و شوية تخاريف
طبعا اتكلمت معاهم بالعقل شوية و التهديد شوية و قلتلهم لو اتحط طوب او حديد فهاشيله و هما ملهمش فى الساحة ديه و هجمع اصحاب العربيات عليهم و هاقلب الحى و اخليه يجيلهم و يتسلى عليهم بسبب مخالفاتهم الكثير
الموقف الثانى بالامس فى الليل حيث امام عمارتى فى مكان لو مفيش عربية واقفة بركن عربيتى فيه و لكن فوجئت بمحل بجانب المكان ده جايب واحد بيكسر فى الاسفلت اللى لسه معمول جديد و ملحقناش نفرح بيه و بيعمل حديد رحت واقف بالعربية و نزلتله كلمته بالذوق مانفعش رحت بالعافية شايله الحديد و رحت راكن بالعافية و اقسمتله انه لو فكر يعملهم تانى لاشيلهملوا و عملت معاه مشكلة و تدخل الناس و الجيران و شهدتهم عليه و غلطوه
و لما اتكلمنا بتعمل ليه كده كانت فى الاول حجته ان الناس بتحط زبالة جمب العربية و شخصيا لما بلاقى زبالة بجيب شنط و اخذها معايا و انا ماشى
و لكنه وقع بالسبب الحقيقى و هو الموضة الجديدة ان العربية بتدارى على المحل و للعلم محله عبارة عن سنترال صغير بيبيع كروت شحن بس مافيش حتى عدد و لا حاجة الناس تتفرج عليها
طبعا فى مواقف برده فى اماكن تانية و لما بلاقى حد بيحط حجارة باشيلهم و اركن
فيا ترى بتتعرضوا للمواقف ديه و بتصرفوا فيها ازاى ؟؟
هل بتستسلموا لأصحاب المحلات و تشوفولكم اماكن تانية ؟؟
ام بتأخذوا مواقف و بتصرفوا طالما مابتضروش حد و فى حدود الاصول ؟؟
منتظر مشاركات الزملاء الاعزاء