سبحان الله.. في عز الحر ده و شهر 6 الدنيا برة رعد و برق و ريح بتزوم.. فعلا مش المفروض الواحد يطمن لحاجة في الدنيا دي.
عرض للطباعة
سبحان الله.. في عز الحر ده و شهر 6 الدنيا برة رعد و برق و ريح بتزوم.. فعلا مش المفروض الواحد يطمن لحاجة في الدنيا دي.
ده فين ده !؟
عندك حق السما شغالة برق و رعد و صوت واضح جدا ربنا يستر
فين يا جدعان !؟
انا طلعت البلكونة مفيش حاجة !!
شكله توقف.. بس كان شغال من شوية و شفت البرق بعيني.
ومطر كمان ... كان فيه من شوية مطر ... المطر نازل سخن من كتر الحر
انا كنت لسه بكلم صاحبى فى الهرم قعد يحلفلى انه عنده رعد و برق و مطر و انا مكنتش مصدقه لأنى عندى فى شبرا محستش بحاجه بس واضح من كلامكو ان كان فيه مطر
حاليا رعد + رياح شديدة جداً في شبرا :)
hell yeah :evil1:
بحب الحجات دي
هيا فعلا مطرت فى الجيزة من شوية
مطرت عليا خفيف و انا عند سيتي ستارس...و عند منشية ناصر كده الأرض كانت سايحة...غالبا كانت ممطرة جامد....و دلوقتي الهواء عندنا في حلوان شديد جدا...و الأمطر تتقترب مننا
هو ده الجو الاستوائي:)
في المقطم فعلا من ساعة كده كان هوا جامد زعابيب
و برق و رعد و مطر..
و برة الشبابيك.. :)
سبحان الله العظيم و بحمده.. ولا حول ولا قوة الا بالله..
مراسلكم من مدينة نصر رامي الطنطاوي :embarrassed2:
الجو عندنا سيء جداً جداً وفيه رياح شديده والناس بتطير في الشوارع والشجر هاين عليه يسيبنا ويمشي وكان في شوية مطر على خفيف من حوالي ربع ساعه .
على فكره انا دائما ما أشعر بكمية غضب من ربنا سبحانه وتعالى لما الدنيا بتقلب كده في عز الحر تلاقي رياح وامطار وهو شيء الى حد كبير منافي لقواعد الجو ان الصيف حرو شمس ورطوبه والشتا برد ومطر لما الاتنين بيدخلوا في بعض مش عارف ليه بكون تعبان نفسياً :no:
مش عارف انا باحس بالعكس ليه..
باحس ان دايما المطر بينضف و يهدي و يكسر حر الجو..
هتلاقفي الحو بعديه حلو جدا..
و المطر من اوقات استجابة الدعاء..
يبقي خير ان شاء الله.
انا عندى منذ ساعة ونصف بدأ الرعد والبرق يشتغل لفترة فى نفس الوقت
انقطعت الاشارات فى اجهزة الريسيفرات بسبب الرعد والبرق
وبعدين قلب بمطر شديد جداااا وعادات اشارات الرسيفرات مرة اخرى
وبعد ربع ساعة مطر شديد توقفت الامطار وبعدين الجو بقا هوا جــــامد
جدااا ودلوقتى ابتدت تمطر تانى
صرح مسئول بوزارة الأرصاد أن مصر اقتربت من خط الإستواء والأمطار أصبحت صيفا وشتاء ونشرت جريدة المصرى اليوم أن الحكومة تخطط للإستفادة من هذه الظواهر الجوية الجديدة بفرض ضريبة "معونة الصيف" طبعا بالإضافة لمعونة الشتاء
:censored:اقتباس:
صرح مسئول بوزارة الأرصاد أن مصر اقتربت من خط الإستواء والأمطار أصبحت صيفا وشتاء ونشرت جريدة المصرى اليوم أن الحكومة تخطط للإستفادة من هذه الظواهر الجوية الجديدة بفرض ضريبة "معونة الصيف" طبعا بالإضافة لمعونة الشتاء
مراسلكم من طريق القاهرة إسكندرية الزراعي:
أنا لسه واصل القاهرة حالا جاي من طنطا والجو على الطريق بشع جدا.فيه 3 حوادث منهم إتوبيس.مفيش أي عواميد نور شغالة على طول الطريق.الرياح شديدة جدااااااااااااااااااااااا ا لدرجة إن مفيش أي عربية صمدت أمام الرياح ده والعربيات بجميع أنواعها بتتمرجح على الطريق.الظاهرة الغريبة فعلا إن كل العربيات الصغيرة زي 128 أو 127 واقفين على جنب بسبب الرياح.المطر شوية خفيف وشوية جامد جدا وشوية متوسط.
انا كنت فى شارع فيصل وكنت مشغله المساحات من قوه الامطار
مطر غريب بينزل مش نقطه خفيفه لا يمكن وزن عشر نقط وبغزاره مع برق ورعد لكن ربنا سترها الحمد لله
وكله خير من عند الله
خلاص يا علا اكتشفت ان كان فيه مطر و رعد و برق بس انا اللى مكنتش حاسس
ولا حسيت بأي حاجة
شكلها كدة معملتهاش عندنا
بس قريت ده على مصراوي
اقتباس:
سقوط الأمطار المصاحبة بظاهرتى البرق والرعد على بعض مناطق القاهرة 6/8/2008 10:56:00 PM
القاهرة-محرر مصراوي- تعرضت بعض مناطق القاهرة مساء الاحد إلى حالة من عدم الاستقرار فى الأحوال الجوية مما أدى إلى سقوط الأمطار المصاحبة بظاهرتى البرق والرعد.
وقال مجدى أحمد عباس رئيس هيئة الأرصاد الجوية إن تلك الظاهرة هى ظاهرة طارئة واستثنائية فى مثل هذا الوقت من العام ، وتحدث نتيجة لارتفاع درجة حرارة سطح الأرض ، حيث سجلت القاهرة يوم الاحد 41 درجة مئوية وحدث انخفاض مفاجىء فى درجات حرارة طبقات الجو العليا مما أدى إلى حالة من عدم الاستقرار وسقوط الأمطار الرعدية.
وأشار رئيس هيئة الأرصاد الجوية إلى أن تلك الظاهرة لا تستغرق إلا فترة قليلة جدا لا تتعدى الساعة .. ومن المتوقع حدوث تحسن فى درجات الحرارة خلال الأيام القادمة ، حيث ستصل درجات الحرارة على القاهرة الإثنين إلى 36 درجة بانخفاض خمس درجات عن اليوم وعلى السواحل الشمالية إلى 29 درجة مئوية.
المصدر: وكالة انباء الشرق الاوسط