الموضوع: مفاجأة!!حاوية بضائع تقع على هيونداي إلنترا وتخفض من ارتفاعها فقط !!

المشاركة الأصلية كتبت بواسطة elmohandes1

حضرتك الكونتينر ده مكتوب عليه وزنه 22 طن !! قوايم إيه؟!! و انهى سقف عربيه دى اللى هايشيل 22 طن؟!!
الصورة دى تركيب يا معلم و لما يبقوا يشيلوا كونتينر من على العربية يبقى يصوروها و يوروهلنا.

حضرتك الحاويات مقاسات 10 و 20 و 40 قدم و اقصى وزن لحاوية فارغة هو لل 40 قدم وزنها فارغة 4 طن و كسور

و وزن الحاوية فارغة بيكون اقل رقم مكتوب عليها

المشاركة الأصلية كتبت بواسطة sha2e

اولا الصوره بنسة 99% مش فوتوشوب
لكن ده ميمنعش ان الواقعه كلها متفبركه

1- الحاويه "الحديد" جنبها يتطبق والعربيه "الصاج" ميحصلهاش حاجه
2- ليه الحاويه لسه لازقه فى المقطوره "الى واقفه على عجلتين" ما كانت اتزحلقت من فوقها
3- ايه قوة الرياح الى تقلب مقطوره بالشكل ده ؟ الاعصار بس الى يقدر يعمل كده ومسمعناش عن اعاصير اليومين دول فى كوريا
4- كمية الاوناش الموجوده اتنين فى الجنب وواجد فى الامام وواحد فى الخلف دول بس الى ظهرو فى الصور المفروض يبقى واحد بس او اتنين بالكتير لان المفروض فى عربيات تانيه الاعصار مدمرها وعايزه اغاثه
5- الجرار او رأس المقطوره زي ما هوا منقلبش ازاي والمقطوره مايله بالزاويه دي

ده طبعا غير الصور الى واضح من زواياها ان الى مصورها محترف مش تصوير حد عادي

عادي
و بالنسبة لأن الحاوية ليه متزحلقتش بسبب ان العربية وقفتها
قوة الرياح بسبب ان الضغط على مساحة الكونتينر الكبيرة بتسبب قوة كبيرة
كمية الاوناش مش شرط لأنه ممكن تكون دي الحادثة الوحيدة لأن باقي مستخدمي الطريق سيارات ملاكي متأثرتش جدا بالرياح
راس الجرار منقلبش علشان لسان المقطورة انكسر
و كمان ردي على موضوع القوي و الضعيف في مشاركتي دي

المشاركة الأصلية كتبت بواسطة mzeid

يا شبابا فيه ايه بس ؟! :)

أولا الكونتينر ساند على كمرة السقف الشمال مش على قشرة السقف نفسها

ثانيا هقولكوا على تجربة بسيطة هاتوا 2 شفاطة
اضغطوا على واحدة فيهم في اي مكان تحبوه هتلاقوها اتبططت و اتنت لجوة ايا كان اللي هيحصلها بدون اي مقاومة تذكر
التانية بقى بايدكم الاثنين و اضغطوا عليها عاموديا على طرفاها الاثنين و شوفوا ايه اللي هيحصل


و بعدين بالنسبة للسؤال اللي هو اشمعنا ليه العربية محصلهاش حاجة من الهوا بسبب بسيط جدا جدا و هي انها كانت معدية جنب النقل و حتى لو كانت مواجهة للريح نفسها مش هتتأثر زي النقل ﻷن الكونتينر مساحته أكبر من مساحة بروفيل العربية



و على فكرة انا متعصب جدا للسيارات الألمانية يعني كان من السهل أني أقولك يا عم كوري ايه و بتاع دي أكيد فوتوشوب

و دة رد بشمهندس سمير الشهاوي و هو بيشتغل في المجال البحري و يعرف عن الحاويات طبعا

المشاركة الأصلية كتبت بواسطة se_coralsea

فيه تعليق بس علي الناس اللي بتقول أن هيونداي مفبركة الموضوع و أن الصور متركبة و هيونداي دول نصابين و أتباع الأخوان و أبو أسماعيل و المجلس العسكري ....

1- لاحظوا ان الحاوية فاضية و ده واضح من جنب الحاوية اللي أتطبق و زي ما قولت قبل كده الحاوية بتكون خفيفة جدا و صاجها خفيف علشان الوزن يكون اقل مايمكن

2- موضوع النور و الاشارات هناك الناس بتنور نور العربيات حتي الصبح لما يكون فيه غيوم أو هوا أو ظروف جوية علشان العربيات التانية تشوف العربية طبعا الثقافة دي مش عندنا لأن عادي تلاقي واحد ماشي بالليل و طافي النور

3- حكاية أن دلايات المقطورة هيونداي ده برضه طبيعي .... الصورة في كوريا بلد الهيونداي و الدايو

4- حكاية أن المقطورة أتقلبت و الجرار لأ عادي لأن الوصلة بين الاثنين ممكن تتكسر و أظن بنشوف المنظر ده كتير علي الطرق عندنا و خاصة الدائري ... و لا أيه ؟

5- الصور واضحة أن مافيش كابلات و لا حاجة ماسكة الحاوية

6- طبيعي أن يتم التصوير من أكثر من جهة و بدرجة وضوح عالية لأنها حادثة و الاوناش واقفة علشان ترفع الحاوية عن العربية و لا هاينتظروا الهوا يغير أتجاهه و يعدل العربية

7- المنظر ده كان ممكن يحصل مع اي عربية حتي صيني و برضه مايحصلهاش حاجة بس علشان الحاوية وقعت علي الألنترا الجديدة (اللي واخدة لقب سيارة العام في أمريكا و كوريا و خمس نجوم في اختبارات التصادم) لازم نطلع القطط الفاطسة في العربية اللي مالهاش ذنب غير أن حاوية وقعت عليها و ماحصلهاش حاجة ظاهريا - الله اعلم ايه اللي حصل للزجاج الجانبي أو البوية او الابواب أو القائم نفسه اللي ممكن يكون أتأثر و لو بشكل بسيط

8- برافو شركة هيونداي لأن فيها ناس بتفكر و بتعرف تستغل حادثة زي دي في الدعاية لسيارتها عكس ناس تانية عندهم سيارات أحسن من الهيونداي و مش عارفين يسوقوا لعربياتهم أو يحققوا ربع مبيعات هيونداي