مصيبة ...العلاقة بين الكربيراتير والسنتر لوك

**abdinsemred** · 09-06-2008 01:05 AM

مصيبة كبرى .....العربية مفتوحة ..ومش عارف أقفل الآبواب ...
الأخوة الأفاضل ..الخبراء ..دايماً بنرجع لكم فى المشاكل الكبرى ..ودايماً بتعملوا فينا خير ..
العربية لانسر 90 عيون صفية ..مشتريها من حوالى عشرة أيام.. ونظام الخلط فيها كربيراتير..
وطبعاً ده أسعدنى جداً لسهولة الصيانة وكمان هى ذات مواصفات خليجية ..يعنى تستحمل الحرارة العالية فى شوارعنا وإشارتنا الطويله .

المهم ...قريت فى منتدانا الرائع عن إمكانية إستعمال البنزين 80 مع تأخير الكهربة من الإسبراتير ..وفولت التانك بنزين 80 ..ورحت للميكانيكى لتأخير الكهرباء ..فقام بتأخيرها لكن لاحظت رجة بالموتور وصلت للتابلوه والدركسيون والعربية ساكنه فى مكانها ...فقام بضبط الكربيراتير من مسمار الهواء وعلا السلانسيه شوية...المهم العربية إشتغلت كويس ..والسسحب أصبح ممتاز بالرغم من إستعمال بنزين 80 ( بنزينها الأصلى 90 92 )

وعملت بيها فوراً بمجرد التعديل مشوار للسادس من اكتوبر طريق الواحات ...وهوب... سنتر الأبواب يقفل ويفتح لوحده ( مع إنه كان هايل قبل ضبط هواء الكربيراتير) وبالكاد عرفنا نخرج من العربية أنا والمدام.....

تانى يوم ..كان الميكانيكى قافل ..رحت غسلت العربية فى محطة البنزين....وتالت يوم رحت للميكانيكى علشان حكاية ضبط الكربيراتير وعلاقته بمشاكل السنتر فى الأبواب.. قال السبب هو غسيل العربية فى محطة البنزين ( مع أن السنتر خرف قبل الغسيل )

حاول الضبط مرة تانية ...أصبحت الأبواب لاتغلق نهائياً وبصفة خاصة الباب الرئيسى للسنتر ( باب السائق )...مصيبة ..والعربية دلوقت بالجراج والأبواب مفتوحة على البحرى ...
وطبعاً أنا خايف على شقا عمرى مع أن التخزين مسؤلية الدفاس وابو دقشوم هههههههههه

معلش ..اصل أنا محتاج أضحك بدل البكاء ...سمعت إن فى نوع من السنتر يعتمد على الهواء فى تشغيله ..وآخر يعتمد على الكهرباء.... فتوقعت أن إللى راكب عندى نوع هواء ..عشان بدأ يخرف لما الميكانيكى لعب فى هواء الكربيراتير؟؟؟؟؟

المهم إلحقونى ..أعمل إيه دلوقتى ..العربية مفتوحه ..وخايف على شقا عمرى

**Dr_Smart** · 09-06-2008 01:23 AM

يا باشا ده مالوش اي علاقة ببعض

حضرتك تروح على كهربائي ويشوفلك السنتر جايز فيه سلوك ملمسة

واحتمال كبير برضو يكون من غسيل العربية .. الميا دي بتعمل بلاوي مع الكهربا

**eldeplomasy** · 09-06-2008 01:25 AM

رأيي الشخصي أرجعله تاني بعد ما تفول بنزين 90 او 92 وخليه يضبطهالك زي ماكانت وجرب لو بقت كويسه خلاص لو فضلت زي ما هي يبقى في حاجه حصلت في الجهاز اللى بيشغل السنتر وان شاء الله ترجع زي ماكانت

**waleed24ag** · 09-06-2008 01:30 AM

اعتقد ان مفيش اي علاقه بين الكاربيراتير و السنتر لوك

**eldeplomasy** · 09-06-2008 01:34 AM

المفروض مفيش علاقة بينهم في حالة لو السنتر كهربا لكن لو السنتر هوا يبقى أكيد في علاقة بين ضبط الهوا بتاع الموتور والسنتر الهوا

طيب هو في سؤال يا استاذ عابدين هو السنتر بعد ما تسرع بالعربية بيقفل لوحده او لما تدوس بنزين جامد كان بيقفل لوحده ولا لأ؟؟؟

**جمال** · 09-06-2008 01:58 AM

لو العربية بتقفل السنتر بعد سرعة معينة يبقى احتمال فيه علاقة بين السنتر و الكاربيراتير ( خرطوم فك او وصله نسيها الميكانيكى ) ارجع للميكانيكى خليه يشيك على شغله و وصلات و خراطيم الكاربيراتير

**ahmed_su** · 09-06-2008 10:25 AM

بص ياباشا انا هاقولك على حاجة حصلتلى فى عربيتى القديمة 132 اناركبت فيها جهاز انذار و خليته يعمل على السنتر لوك الاصلى (الفبريقة) وكله كان تمام لحد ماجاء يوم وعملت بعض اصلاحات فى الكربراتير وما استدعاه من تقديم وتأخير الكهرياء حتى ظبطط وبقت تمام واول مامشيت من عند المكانيكى بقى السنتر يفتح ويقفل بمزاجه وطول الوقت والانذار يشتغل ويفصل واحترت جدا فى العطل ده واخيرا رحت للركبلى جهاز الانذار وحكيتله اللى حصل بخصوص السنتر فبنجرب السنتر والانذار والعربية متوقفة شغال تمام اول ماندور الموتور يبتدى الجنان قفل وفتح فقلى تقديم وتاخير الكهربة ممكن يكون هو اللى عمل كده طيب والحل ياسيدى نغير اسلاك الاسبراتير الخمسة بنوعية جيدة ويكون الشيلد بتعها كويس وفعلا اشتريت اغلى نوع ساعتها وركب كله تمام والسبب ان الاسلاك القديمة كانت بتشوشر على وحدة الانذار الرئيسية وبتخليها تطلع اوامر غلط للسنتر ووحدات الرفع (ملحوظة السنتر عندى كان كهرباء وليس هواء) انا قلت اقلك على تجربتى لعلها تفيدك لانى شايف فيها تشابه الا اذا لم يكن عندك وحدة تحكم الكترونية

**abdinsemred** · 09-06-2008 12:23 PM

الف الف الف شكر للإهتمام ونجاملكم كده فى الأفراح إن شاء الله

الأخ الكريم الدبلوماسى الأخ العزيز هايما ( على فكرة عربيتك حلوة جداً ربنا يبارك لك فيها). بشأن العلاقة بين سرعة العربية وجنان السنتر...لا مافيش علاقة..إللى بيحصل هو إنى لو دوست على المسوجر بتاعى يققل مسوجر كل الأبواب لمدة ثانيةثم يفتح تانى...ولو حاولت أفتح يفتح الكل لمده ثانية ثم يقفل تانى....وأخيراً دللوققتى بقفل الأبواب الخلفية وباب أمامى يمين من جوة .... وأطلع برة العربية وبالمفتاح أحاول قفل باب السواق ولا حياة لمن تنادى كللها محاولات فاشلة لقفل بابى

الأخ إبيزا ..شكراً لأهتمامك بشأن وجود طلمبة هوة بالشنطة ...أعتقد ده موجود فى سيارات أحدث من عربيتى ( موديل 90) لأنى فتشت العربية جتة حتة فى محطة البنزين أثناء اليوم الأسود بتاع الغسيل وظهر أمامى كل شى فى العربية حتى صاج الشنطة ....الزهايمر إللى أصاب السنتر بمجرد ضبط هواء الكربيراتير قبل الغسيل ..ثم بعد الغسيل وإعادة ضبط هواء الكربيراتير أصبح معتوه وهايسبب مصيبة

أشكركم ياجماعة للإهتمام ...ولو حد يعمل لى جميل كبير ..يوصف لى حد متخصص فى الحكاية دى يكون قريب للجيزة أكون له شاكر جداً ..ويمكن ألحق العربية قبل ماتتسرق

-

-

الموضوع: مصيبة ...العلاقة بين الكربيراتير والسنتر لوك

LinkBack

أدوات الموضوع

عرض

-

-

-

المواضيع المتشابهه

استشارة عن الكربيراتير

تجربتي مع منظفات الكربيراتير

الكربيراتير جننى

الكربيراتير أم الانجيكشن؟؟

الكربيراتير و سنينة

الكلمات الدلالية لهذا الموضوع

المفضلات

المفضلات

ضوابط المشاركة