الموضوع: اسوء تجربة شد ! ! مع الهوندا سيفيك ! مش اصحاب الكوري بس اللى منفسنين ! !

السلام عليكم ورحمة الله وبركاته

خرجت من الجامعة بعد امتحان Therapeutics طحن السنين بقى !

الجو كان حر جدا ! كان معايا 2 زمايلي واحد منهم وزن تقيل حبتين ! وانا من النوع اللى مش بيحب يقرص على العربية لو معايا وزن وخاصا في الحر

بس في اثناء مانا ماشي هادي لقيت هوندا سيفيك "الشكل اللى قبل الحالي موديلات 2007:2011"

لونها اسود وجاي بيجري وغرزة في التانية ! بصراحة ماقدرتش اقاووووم رحت طافي التكييف ودايس وراه ! وقلت فرصة بقى اجرب العربية بعد الصيانة

انا عارف انه التجربة غير متكافاة بالمرة انا معايا وزن جامد وانا عربيتي مع الوزن بتتقتل ! بس بصراحة انا نفسي من زمان اجري مع سيفيك وكنت عارف اني كدة ولا كدة هيتعلم عليا بس قلت اشوف العربية دي جريها عامل ازاي !

انا دوست وراه وهو هدى عشان في مطب كنت عارف اني هلحقه عند المطب

بعد المطب دوسنا ثبت معاه لحد 60 بعدها بدا يفرق عني ! ملحقناش نوصل لسرعة 100 وكان فيه ملف "كنا جايين من اكتوبر وداخلين على طريق الواحات" طبعا الملف ده ضيق جدا فهدينا احنا الاتنين طبعا هو كان حط فرق حوالي عربية بيني وبينه

لقيته جيه عند الجامعة وراح واخد u-turn عشان يكمل في اتجاه الدايري قلت مصلحة ده داخل معايا يبقى نتسلى سوا وبالمرة اتفرج على السيفيك وهي بتجري <<< انا بعشق العربية دي

خدنا ال u-turn وانا بصراحة ماكنتش عارف احصله ! ماتوره قوي جدا ماشاء الله وانا معايا وزن قاااتل العربية ! بس كنت بتفرج على السيفيك وهي بتجري بصراحة ماشاء الله ماتور وهاندلنج وثبات روعة

بعد كدة لقيته هدي مرة واحدة ! وانا كمان هديت

عديته وهو كان ورايا وانا ماشي براحتي 120 تقريبا مش دايس وهو كمان ورايا مش عارف كان مثبت ورايا بفرق عربية ! ليه !

لقيته مرة واحدة راح جاي من ورايا وسامع صوت ماتوره وراح طاير ! رحت انا كمان دوست وراه كان هو قدامي وانا لازق في شنطة بفرق عربية ونص تقريبا

مرة واحدة لقيته راح لاطش يمين ولقيت تاكسي قدامي ! ! المعلم عايز يلبسني ! ! مع ان يمينه فاضي من زمان بس فضل مستني لحد ماقرب جدا من التاكسي وراح لاطش الغرزة

طبعا بحمد ربنا انا رحت سنة فرامل وواخد الغرزة وراه وعديت التاكسي ! قلت بقى دي اخرتها يا سيفيك ؟ ؟

المهم فضلت وراه غرزة في التانية لحد ما مرة واحدة لقيته وقف ! مسك فرامل جامد جدا !

وراح واخد شمال ولقيت قدامي عربية واقفة ! ! طبعا انا جبت اخر الفرامل ! العربية زحفت زحف السنين مش عارف ال Abs اللى فيها راح فين ! !

ربنا نزل عليا اهداء كدة مرة واحدة اني اسقط نقلات بالفتيس وده لان ايدي كانت اصلا على الفتيس

رجلي جايبة اخر الفرامل وايدي بتسقط نقلات بالفتيس من D ل 3 ثم 2 ! لحد مالعربية وقفت على اخر لحظة ! زميلي اللى كان قاعد ورا قالي ماشاء الله عليك انت لولا انك سقطت نقلات بالفتيس العربية عمرها ماكنت هتقف ! قلتله الحمد لله ربنا ستر جت بالصدفة وحياتك

زميلي التاني متنرفز جدا وعمال يشتم وهاته ده لازم يضرب ! هو انت عملتله حاجة يعني عشان يلبسك ! بيقولي انت قلبلته اشارات ؟ قلتله والله ولا جيت جمبه اصلا

زميلي التاني قالي خلاص سيبه ماتجريش وراه ده عيل منفسن ! ! وطبعا صاحبنا بتاع السيفيك لقيته بيصبعلي من الشباك ! !

انا مش عارف بصراحة هو دماغه كان فيها ايه ! ! يعني ايه المشكلة لما نشد سوا وبعد كدة سلام يا صاحبي وكل واحد في حاله ! انا والله سعات بشد مع حد وبنبقى خايفين على بعض ! مرة كنت بشد مع واحد راكب سوبارو ولقيته مرة واحدة راح مكلكلسي ومطلعلي ايده من الشباك ! اتاري فيه مطب انا مش واخد بالي منه وهو بينبهني ! !

دايما كنا نقول ان اصحاب الكوري هما اللى منفسنين وبيلبسو الناس وبيشدو مع اي حد ! بس اظاهر ان الناس كلها كدة مش اصحاب الكوري بس !

وبصراحة ان جينا للحق ده مش اول واحد اشوفه راكب سيفيك واحسه واخد قلم في نفسه او بيتنك ! ماتفهمش على ايه ! كذا مرة اعدي من جمب سيفيك وبحكم حبي للعربية دي ببص عليها الاقي صاحبها لو كان شب يروح باصصلك كدة من فوق لتحت بإستحقار !

انا مش عارف هو كان عايز يثبت لنفسه ايه ؟ او هيستفيد ايه ! !

انا بعد محاولته الاخيرة لتلبيسي قررت اني اسيبه ينفسن مع نفسه ! وخاصا اني ماكنتش عارف اجاريه في قوة المواتير ! والطريق كان مفتوح والكلمة الاولى للمواتير

وبصراحة كنت متوقع السيفيك اقوى من كدة ! صحيح انا ماكنتش عارف اجيبه بس ماكنش بيروح مني بعيد

واعتقد اني لو لوحدي في العربية او مش معايا وزن كان هيبقى فيه كلام تاني والله واعلم برضوا

المهم بعدها مشيت براحة وماشي في طريقي عادي جدا وقفت عشان اخد u-turn عند دريم بارك عشان اطلع على الدايري

مرة واحدة مكروباص من ورا يقوم داخل فيا حاككلي الرفرف من اوله لاخره !

الحمد لله على كل شئ