النجدة يا أهل الخبرة: عملت حادثة بالعربية
أخواني الأعزاء
وأنا راجع البيت دلوقتي فؤجئت بموتوسيكل بينحرف قدامي فجأة حاولت أفاديه طلعت فوق رصيف عالي جداً بالناحية الشمال من العربية يعني من ناحيتي، والحمد لله رب العالمين، طبعاً كل اللي على الرصيف شلته قدامي ، إشارة مرور أرضية وحبة زرع على ما قسم، المهم نزلت بالعربية بسرعة والحمد لله إني مكنتش ماشي بسرعة عالية، العربية شغالة تمام مفهاش حاجة نزلت أفتح الكبوت عشان أطمئن لقيت الكبوت مكلبش ومش راضي يفتح معاي بصيت تحت العربية لقيت الخبطة اتركزت على العتب اللي راكب فوقه الريداتير، ويبدو والله أعلم إن الخبطة خلت الريداتير يرتفع عن مكانه، ويمسك في الكبوت، ده اللي أنا بعتقده، طبعاً دلوقتي الساعة واحدة ونص بالليل مفيش صنايعية، كنت عاوز حد من الأخوة يدلني أو يشرحلي الموقف بالضبط على أساس لو رحت لسمكري أفهم هو بيعمل ايه، ربما يعمل حاجة تبهدل الدنيا.
طبعاً مفيش أي تسريبات لا ميه ولا خلافه والحمد لله رب العالمين، قدر الله وما شاء فعل.
بعد الخبطة دي سامع صوت سوست ناشفة كإني راكب عربية نقل محملة وبتاخد مطب.
يعني تزييق.
آسف للإطالة بس متسني بفارغ الصبر مش حروح لأي صنايعي غير لما تردوا علي.
بلاش حد من الأخوة يوصفلي صنايعي معين، لإني في الصعيد الدواني.